দেশৰ পৰীক্ষা ব্যৱস্থাত সংঘটিত হোৱা অনিয়মৰ বিৰুদ্ধে ককৰোচ জনতা পাৰ্টি চমুকে চি জে পিয়ে দিল্লীৰ যন্তৰ মন্তৰত চলাই থকা প্ৰতিবাদ দেওবাৰে তেইশ দিনত ভৰি দিয়াৰ সময়তে অসম জাতীয় পৰিষদৰ সভাপতি লুৰিণজ্যোতি গগৈয়ে প্ৰতিবাদস্থলীত উপস্থিত হৈ আন্দোলনকাৰীসকলৰ প্ৰতি সমৰ্থন জনাইছে। শিক্ষাৰ্থীসকলৰ ন্যায়ৰ দাবীত যন্তৰ মন্তৰত চলি থকা এই প্ৰতিবাদত অংশগ্ৰহণ কৰা জলবায়ু কৰ্মী সোণম ৱাংচুকৰ অনিৰ্দিষ্টকালীন অনশনো পোন্ধৰ দিনত ভৰি দিছে আৰু তেওঁৰ স্বাস্থ্যৰ দ্ৰুত অৱনতি ঘটিবলৈ ধৰিছে। সমগ্ৰ দেশৰ শিক্ষা খণ্ডত দেখা দিয়া এই সংকট আৰু শিক্ষাৰ্থীসকলৰ ভৱিষ্যতৰ প্ৰতি লক্ষ্য ৰাখি ব্যৱস্থাটোৰ স্বচ্ছতা আৰু দায়বদ্ধতা নিশ্চিত কৰাৰ দাবীত অসম জাতীয় পৰিষদে এই প্ৰতিবাদলৈ পূৰ্ণ সমৰ্থন আগবঢ়োৱা বুলি সদৰী কৰিছে।
অসম জাতীয় পৰিষদৰ সভাপতিগৰাকীয়ে প্ৰতিবাদস্থলীত উপস্থিত হৈ জলবায়ু কৰ্মী সোণম ৱাংচুক আৰু চি জে পিৰ প্ৰতিষ্ঠাপক অভিজিৎ ডিপকেকে ধৰি অন্যান্য প্ৰতিবাদকাৰীসকলৰ সৈতে মত বিনিময় কৰে। সংবাদ মাধ্যমৰ আগত গগৈয়ে কয় যে সমগ্ৰ দেশৰ শিক্ষা খণ্ড এক গুৰুতৰ সংকটৰ মাজেৰে পাৰ হৈছে আৰু ইয়াৰ ফলত দেশৰ শিক্ষাৰ্থী সমাজ গভীৰভাৱে হতাশ হৈছে। তেওঁ উল্লেখ কৰে যে এই হতাশাৰ ফলতেই কুৰিগৰাকী শিক্ষাৰ্থীয়ে আত্মহত্যাৰ দৰে চৰম পথ বাছি লৈছে, যিটো কেৱল পোহৰলৈ অহা পৰিসংখ্যাহে। অসমৰ পৰা গৈ এই প্ৰতিবাদকাৰীসকলৰ প্ৰতি একতা প্ৰদৰ্শন কৰাটো তেওঁলোকৰ উদ্দেশ্য বুলি গগৈয়ে জানিবলৈ দিয়ে। পৰৱৰ্তী সময়ত সামাজিক মাধ্যমত এক পোষ্ট যোগে তেওঁ যন্তৰ মন্তৰত শিক্ষাৰ্থীসকলৰ কাষত থিয় হ’বলৈ পাই গৌৰৱান্বিত বুলি প্ৰকাশ কৰাৰ লগতে দেশৰ যুৱপ্ৰজন্মই ন্যায় আৰু স্বচ্ছতা পোৱাৰ যোগ্য বুলি মত প্ৰকাশ কৰে।
অসম জাতীয় পৰিষদৰ সমৰ্থনৰ প্ৰতি সঁহাৰি জনাই চি জে পিৰ প্ৰতিষ্ঠাপক অভিজিৎ ডিপকে লুৰিণজ্যোতি গগৈক ধন্যবাদ জ্ঞাপন কৰে। দেওবাৰে প্ৰতিবাদস্থলীত সমাজবাদী পাৰ্টিৰ সাংসদ পুষ্পেন্দ্ৰ সৰোজ, কেৰালাৰ প্ৰাক্তন স্বাস্থ্যমন্ত্ৰী কে কে শৈলজা আৰু কেৰালাৰ আন দুগৰাকী প্ৰাক্তন মন্ত্ৰী ক্ৰমে কে এন বালাদোগোপাল আৰু পি ৰাজীৱেও অনশনস্থলীত উপস্থিত হৈ প্ৰতিবাদকাৰীসকললৈ সমৰ্থন আগবঢ়ায়।
ইপিনে, যোৱা ২৮ জুনৰ পৰা প্ৰতিবাদত চামিল হৈ অনিৰ্দিষ্টকালীন অনশন আৰম্ভ কৰা সোণম ৱাংচুকৰ স্বাস্থ্যলৈ লৈ গভীৰ উদ্বেগৰ সৃষ্টি হৈছে। চি জে পিয়ে প্ৰকাশ কৰা স্বাস্থ্য সম্পৰ্কীয় তথ্য অনুসৰি, পোন্ধৰদিনীয়া অনশনৰ ফলত ৱাংচুকৰ ৰক্তচাপ ১০৪/৬৬ লৈ অৱনমিত হোৱাৰ লগতে তেওঁৰ ওজন ৭.৮ কিলোগ্ৰাম হ্ৰাস পাইছে। সামাজিক মাধ্যমত এই তথ্য প্ৰকাশ কৰি ডিপকেয়ে চৰকাৰৰ মৌনতাক লৈ প্ৰশ্ন উত্থাপন কৰি চৰকাৰে কেতিয়া সাৰ পাব বুলি আক্ষেপ প্ৰকাশ কৰে।
নিট পৰীক্ষাৰ প্ৰশ্নকাকত ফাদিলৰ অভিযোগক লৈ চি জে পিয়ে কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবী কৰাৰ লগতে এই বিতৰ্কৰ পাছত আত্মহত্যা কৰা শিক্ষাৰ্থীৰ পৰিয়াললৈ এক কোটি টকাৰ ক্ষতিপূৰণ প্ৰদানৰ দাবী জনাই আহিছে। যোৱা ২০ জুনৰ পৰা যন্তৰ মন্তৰত আৰম্ভ হোৱা এই প্ৰতিবাদৰ পৰৱৰ্তী কাৰ্যসূচী হিচাপে সংগঠনটোৱে সংসদৰ বৰ্ষাকালীন অধিৱেশনৰ প্ৰথম দিনটোত অৰ্থাৎ ২০ জুলাই তাৰিখে সংসদ ভৱনলৈ এক বিশাল প্ৰতিবাদী সমদল বাহিৰ কৰাৰ কথা আনুষ্ঠানিকভাৱে ঘোষণা কৰিছে।
