মাত্ৰ দুদিন পূৰ্বে কোৱা নিজৰ কথাকে ‘ভিত্তিহীন’ বুলি নিজেই প্ৰমাণ কৰিলে ৰঞ্জিত দাসে। ১৫ মাৰ্চত সংবাদ মাধ্যমৰ আগত কৈছিল যে অসম তথা উত্তৰ-পূৰ্বাঞ্চলত বিজেপিৰ প্ৰভাৱ বিস্তাৰৰ ক্ষেত্ৰত গ্ৰহণ কৰা ভূমিকাৰ বাবে বিজেপিৰ কেন্দ্ৰীয় নেতৃত্বই হিমন্ত বিশ্ব শৰ্মাক দেশৰ যিকোনো এটা সমষ্টি প্ৰতিদ্বন্দ্বিতাৰ বাবে বাচি ল’বলৈ দি পুৰস্কৃত কৰিব বিচাৰিছে।
স্থানীয় সংবাদ মাধ্যমৰ লগতে ৰাষ্ট্ৰীয় সংবাদ মাধ্যমতো ৰঞ্জিত দাসৰ এই মন্তব্য প্ৰকাশ হৈছিল ১৬ মাৰ্চত। “আমাৰ কেন্দ্ৰীয় নেতৃত্বই যেতিয়া মোক অৱগত কৰিছিল যে হিমন্তই লোকসভা নিৰ্বাচনত প্ৰতিদ্বন্দ্বিতা কৰাটো দলে বিচাৰিছে আৰু তেওঁ পচন্দ অনুসৰি প্ৰতিদ্বন্দ্বিতাৰ বাবে যিকোনো সমষ্টি বাচি ল’ব পাৰে। মই লগে লগে ইয়াক এক উত্তম সিদ্ধান্ত বুলি জনাইছিলো। কিন্তু তেওঁৰ বাবে সমষ্টি নিৰ্ধাৰণৰ সময়ত অসমক অগ্ৰাধিকাৰ দিবলৈ অনুৰোধ কৰিছিলো,” –সংবাদ মাধ্যমত ৰঞ্জিত দাসৰ এই উদ্ধৃতি প্ৰকাশ পাইছিল।
বিজেপিৰ কেন্দ্ৰীয় নেতৃত্বৰ এই সিদ্ধান্তৰ কথা ঘোষণা কৰি ৰাজ্যিক বিজেপিৰ সভাপতি ৰঞ্জিত দাসে কেন্দ্ৰীয় নেতৃত্বক শৰ্মাৰ প্ৰাৰ্থিত্ব প্ৰদানৰ সময়ত অসমক অগ্ৰাধিকাৰ বাবে অনুৰোধ জনোৱা বুলিও জানিবলৈ দিছিল।
কিন্তু তাৰ দুদিন পিছতে আজি সংবাদ মাধ্যমৰ আগত দাসে কয় যে নেডাৰ আহ্বায়ক হিচাপে সমগ্ৰ উত্তৰ–পূবত নিৰ্বাচনী প্ৰচাৰৰ দায়িত্ব ল’বলৈ আহ্বান জনাই কেন্দ্ৰীয় নেতৃত্বই হিমন্তক প্ৰতিদ্বন্দ্বিতাৰ পৰা আঁতৰি থাকিবলৈ কৈছে।
মাত্ৰ দুদিনৰ ভিতৰত কেন্দ্ৰীয় নেতৃত্বই এনেকুৱা ওলোটা স্থিতি যে নলয় সেয়া সাধাৰণ লোকৰো বোধগম্য। অৱশ্যে ৰঞ্জিত দাসে মিছা মাতিছিল নে হিমন্তই নিজৰ হৈ এইদৰে প্ৰচাৰ কৰাইছিল সেয়া এতিয়াও স্পষ্ট নহয়।
আনহাতে তেজপুৰ সমষ্টিৰ বাবে ৰাজ্যিক নেতৃত্বই প্ৰস্তুত প্ৰেৰণ কৰা প্ৰাৰ্থীৰ তালিকাত আৰ পি শৰ্মাৰ নাম আছিল বুলিও ৰঞ্জিত দাসে আজি জানিবলৈ দিয়ে। সেয়াও কিমান দূৰ সত্য সন্দেহৰ আৱৰ্তত। কাৰণ ১৬ মাৰ্চত সাংসদজনে নতুন দিল্লীত এখন সংবাদমেল দি পেনেলত তেওঁৰ নাম অন্তৰ্ভুক্ত হোৱা নাই বুলি স্পষ্ট কৰিছিল, যাৰ বাবেই অপমানিত বোধ কৰা আৰু সেয়ে দলত্যাগ কৰা বুলি কৈছিল। আৰ পি শৰ্মাই দলত্যাগ কৰি প্ৰধান মন্ত্ৰী মোদীলৈ পত্ৰ লিখাৰ পিছত সাংসদজনৰ নাম কিয় অন্তৰ্ভুক্ত হোৱা নাই বুলি ৰাজ্যিক নেতৃত্বক জবাবদিহি কৰিছিল ৰাষ্ট্ৰীয় নেতৃত্বই।
আজি ৰঞ্জিত দাসে জনোৱা মতে, তেজপুৰ আৰু নগাঁৱৰ প্ৰাৰ্থীক লৈ কিছু জটিলতা এতিয়াও অব্যাহত আছে। বাকী ৮টা সমষ্টিৰ প্ৰাৰ্থীৰ তালিকা চূড়ান্ত হৈছে কেৱল সভাপতি অমিত শ্বাহৰ স্বাক্ষৰলৈ অপেক্ষা কৰি থকা হৈছে।