স্কুলৰ গুৰুত্বপূৰ্ণ পৰীক্ষাৰ শেষ দিনটোত সাধাৰণতে ছাত্ৰ-ছাত্ৰীসকলে স্বস্তিৰ হুমুনিয়াহ কাঢ়ি ঘৰলৈ উভতি আহে। কিন্তু মধ্যপ্ৰদেশৰ ডামো চহৰত শেষৰ পৰীক্ষাৰ দিনটোতে এক ভয়ংকৰ হত্যাকাণ্ড সংঘটিত হ’ল। দশম শ্ৰেণীৰ এজন ছাত্ৰক বিদ্যালয়ৰ গেটৰ বাহিৰত সহপাঠীয়ে ঘেৰি ধৰি ছুৰীৰে আঘাত কৰি হত্যা কৰাৰ অভিযোগ উত্থাপন হৈছে। আটাইকেইজন অভিযুক্ত নাবালক।
আৰক্ষীৰ মতে, নিহত ছাত্ৰজনৰ নাম ঋষি আহিৰৱাৰ (১৫)। শুকুৰবাৰে পৰীক্ষা দি ওলোৱাৰ পিছত ডামো চহৰৰ ওজস্বিনী স্কুলৰ সন্মুখত তেওঁক আক্ৰমণ কৰা হয়। অভিযোগ অনুসৰি ছয়জনতকৈ অধিক ছাত্ৰই তেওঁক ঘেৰি ধৰি চোকা অস্ত্ৰৰে আক্ৰমণ কৰে।
প্ৰাথমিক তদন্তৰ পৰা জানিব পৰা গৈছে যে কেইবাদিনো ধৰি চলি থকা বিবাদৰ ফল এই আক্ৰমণ। আৰক্ষীয়ে দাবী কৰিছে যে অভিযুক্তসকলো দশম শ্ৰেণীৰ ছাত্ৰ।
আৰক্ষী সূত্ৰৰ পৰা জানিব পৰা মতে, পৰীক্ষাৰ দিনবোৰৰ মাজতেই এই ঘটনা আৰম্ভ হৈছিল। অভিযোগ অনুসৰি পৰীক্ষাৰ প্ৰশ্নৰ উত্তৰ দিবলৈ ঋষিক হেঁচা প্ৰয়োগ কৰিছিল একাংশ ছাত্ৰই। কিন্তু ঋষিয়ে এই দাবী মানিবলৈ অস্বীকাৰ কৰে।
তেতিয়াৰ পৰাই দুই পক্ষৰ মাজত উত্তেজনা বৃদ্ধি পায়। ২৭ ফেব্ৰুৱাৰীত আৰু পুনৰ ২ মাৰ্চত দুয়োদিনাই বিদ্যালয়ৰ ভিতৰত তেওঁলোকৰ মাজত কাজিয়া আৰু অশান্তিৰ সৃষ্টি হৈছিল বুলি তদন্তত পোহৰলৈ আহিছে। আনকি চূড়ান্ত পৰীক্ষাৰ দিনা ঋষিক “শিক্ষা দিয়া”ৰ ভাবুকি দিয়া হৈছিল বুলিও আৰক্ষীৰ সূত্ৰই প্ৰকাশ কৰিছে।
শুকুৰবাৰে দুপৰীয়া ঋষিয়ে চূড়ান্ত পৰীক্ষা দি স্কুলৰ গেটৰ পৰা ওলাই আহি থাকোঁতে ৰৈ থকা ছাত্ৰৰ দল এটাই তেওঁক ঘেৰি ধৰে। তাৰ পিছত আৰম্ভ হ’ল মাৰাত্মক আক্ৰমণ।
অভিযোগ অনুসৰি কিশোৰকেইজনে ইজনৰ পিছত সিজনকৈ চোকা ছুৰীৰে আঘাত কৰে। এই আক্ৰমণৰ পিছতে অভিযুক্তই পলায়ন কৰে। গুৰুতৰ অৱস্থাত ঋষিক ততাতৈয়াকৈ জিলা চিকিৎসালয়লৈ প্ৰেৰণ কৰা হয়। কিন্তু তেতিয়ালৈকে তেওঁৰ শৰীৰৰ পৰা বিপদজনক পৰিমাণে ৰক্তক্ষৰণ হৈছিল।
চিকিৎসালয়খনৰ আই চি ইউত কৰ্তব্যৰত চিকিৎসক বাহাদুৰ পেটেলে কয় যে ঋষিৰ শৰীৰত গুৰুতৰ আঘাত হৈছে। চিকিৎসকগৰাকীৰ মতে, “ছুৰীৰ আঘাতত এডাল শিৰা কাটি গৈছিল। ফলত বহুত তেজ ওলাইছিল। আমি তেজৰ ব্যৱস্থা কৰিবলৈ চেষ্টা কৰি আছিলো। কিন্তু তেওঁৰ শাৰীৰিক অৱস্থা অতি সোনকালে অৱনতি ঘটিছিল আৰু শেষত তেওঁক বচাব পৰা নগ’ল।”
এই ঘটনাই সমগ্ৰ চহৰখনত ব্যাপক উত্তেজনা বিয়পাই দিয়ে। ঋষিৰ মৃত্যুৰ খবৰ বিয়পি পৰাৰ লগে লগে পৰিয়ালৰ লোক আৰু স্থানীয় ৰাইজে জিলা চিকিৎসালয়ত ভিৰ কৰে।
এই আক্ৰমণৰ পিছতে আৰক্ষীয়ে তৎক্ষণাত তদন্ত আৰম্ভ কৰে। ডামো চহৰৰ চি এছ পি এইচ আৰ পাণ্ডেই কয় যে এই কাণ্ডৰ সৈতে জড়িত কেইবাজনো কিশোৰক আটক কৰি জেৰা কৰা হৈছে।
আৰক্ষীৰ সূত্ৰ অনুসৰি এই হত্যাকাণ্ডৰ গোচৰত মুঠ ৮ গৰাকী ছাত্ৰৰ নাম উল্লেখ কৰা হৈছে। ডামো জিলাৰ আৰক্ষী অধীক্ষক শ্ৰুতকীৰ্তি সোমবংশীয়ে ঘটনাটোক অতি চিন্তনীয় বুলি অভিহিত কৰে। তেওঁৰ ভাষাত “এজন বিদ্যালয়ৰ ছাত্ৰক এনেদৰে হত্যা কৰাটো অতি দুখজনক আৰু চিন্তনীয়। এই ঘটনাত আঠজন নাবালকৰ বিৰুদ্ধে গোচৰ ৰুজু হৈছে।”
আৰক্ষী অধীক্ষকে আন এক বৃহৎ উদ্বেগ সদৰী কৰে। তেওঁৰ মতে, শেহতীয়াকৈ কিশোৰ-কিশোৰীসকলৰ মাজত অপৰাধীক ‘আদৰ্শ’ হিচাপে চোৱাৰ প্ৰৱণতা বৃদ্ধি পাইছে।
তেওঁ কয়, ‘বিদ্যালয়লৈ যোৱা কিশোৰ-কিশোৰীসকলে সমাজত ভয়ৰ সৃষ্টি কৰা অপৰাধীক অনুকৰণ কৰি আছে—এয়া চিন্তাৰ বিষয়। এই মানসিকতাৰ বিৰুদ্ধে সজাগতা সৃষ্টিৰ বাবে আমি এক বিশেষ অভিযান চলাব লাগিব।’
