বুধবাৰে সন্ধিয়া ডিব্ৰুগড়ৰ অসম চিকিৎসা মহাবিদ্যালয়ৰ পেডিয়াট্ৰিক ৱাৰ্ডৰ এক ইনচেণ্টিভ কেয়াৰ ইউনিটত (ICU) জুই লগাৰ পিছত কমেও ১২ টা নৱজাতক শিশুৰ কথমপি প্ৰাণ ৰক্ষা হয়।
চিকিৎসালয় কৰ্তৃপক্ষই জনোৱা অনুসৰি সন্ধিয়া প্ৰায় ৬:৩০ বজাত এটা ভেণ্টিলেটৰ গোটত শ্বৰ্ট চাৰ্কিটৰ ফলত জুই লাগিছিল।
AMCHৰ অধীক্ষক প্ৰশান্ত দিহিঙিয়াই জনায় যে শিশু ৰোগ ৰক্ষী ৱাৰ্ডৰ ভেণ্টিলেটৰৰ মনিটৰত জুই লাগিছিল যদিও কোঠাটোত ৰখা অগ্নি নিৰ্বাপকৰ সহায়ত কৰ্মচাৰীসকলে লগে লগে নিয়ন্ত্ৰণ কৰিছিল।
“ৱাৰ্ডটোত ছয় মাহৰ পৰা ১০ বছৰ বয়সৰ ভিতৰত ১২ টি শিশু আছিল। কোনো লোক আঘাতপ্ৰাপ্ত হোৱা নাই।”— তেওঁ লগতে কয়।
AMCH ৰ অধ্যক্ষ তথা মুখ্য অধীক্ষক ডাঃ সঞ্জীৱ কাকতিয়ে জনায় যে নিৰ্দিষ্ট গোটটোৰ কেঁচুৱাকেইটি আৰু ICU ৰ আন সকলো কেঁচুৱা সুৰক্ষিত।
সতৰ্কতামূলক ব্যৱস্থা হিচাপে চিকিৎসালয়খনে ঘটনাটোৰ পিছত সকলো ৰোগীক চৌহদৰ আন এটা শিশু ৰোগ ৱাৰ্ডলৈ স্থানান্তৰিত কৰে বুলি AMCHৰ অধীক্ষক প্ৰশান্ত দিহিংগিয়াই কয়।
তেওঁ কয় যে প্ৰভাৱিত ৱাৰ্ডত ছয়টা ভেণ্টিলেটৰ আছিল আৰু তাৰে দুটা পিএম-কেয়াৰ্ছ পুঁজিৰ অধীনত প্ৰাপ্ত হৈছিল। পিএম-কেয়াৰ্ছ ভেণ্টিলেটৰৰ এটাত শ্বৰ্ট চাৰ্কিটৰ ফলত জুই লাগিছিল।
অগ্নিকাণ্ডৰ কাৰণ সম্পৰ্কে তেওঁ কয় যে ভেণ্টিলেটৰৰ কোনো সমস্যা আছে নে ৱাৰ্ডত বিদ্যুৎ সংযোগত সমস্যা আছে সেয়া তাৎক্ষণিকভাৱে জনা নাযায়।
অগ্নি নিৰ্বাপক আৰু শক্তি বিভাগৰ কৰ্মচাৰীসকল উপস্থিত হৈ ঘটনাটোৰ তদন্ত চলাই আছে বুলি তেওঁ সদৰী কৰে।
AMCH এ ইতিমধ্যে এটা আভ্যন্তৰীণ তদন্ত আৰম্ভ কৰিছে বুলিও অধীক্ষক গৰাকীয়ে জানিবলৈ দিয়ে।
সাংবাদিকৰ আগত তেওঁ কয়, “আমি অসম চৰকাৰকো স্বতন্ত্ৰভাৱে তদন্ত কৰিবলৈ অনুৰোধ জনাইছো। তদন্তৰ ফলত প্ৰকৃত কাৰণ সম্পৰ্কে জানিব পৰা যাব।”