মেঘালয়ৰ মুখ্যমন্ত্ৰী কনৰাড কে চাংমাই শুকুৰবাৰে ৰাষ্ট্ৰীয় মানৱ অধিকাৰ আয়োগক (এনএইচআৰচি) ২২ নৱেম্বৰত অসম সীমান্তত ছয়জন লোকৰ হত্যাৰ বাবে দায়ী লোকসকলৰ বিৰুদ্ধে ব্যৱস্থা গ্ৰহণ নিশ্চিত কৰিবলৈ আহ্বান জনায়।
মুখ্যমন্ত্ৰী চাংমাৰ নেতৃত্বত মেঘালয় চৰকাৰৰ এটা উচ্চ পৰ্যায়ৰ দলে শুকুৰবাৰে নতুন দিল্লীত এনএইচআৰচিৰ অধ্যক্ষ অৰুণ কুমাৰ মিশ্ৰক সাক্ষাৎ কৰে। এই বাতৰি প্ৰকাশ কৰিছে ‘দ্য হিন্দু’য়ে।
চাংমা আৰু তেওঁৰ দলটোৱে এনএইচআৰচিৰ অধ্যক্ষ আৰু আন সদস্যসকলক অসম-মেঘালয় সীমান্তৰ পৰিস্থিতিৰ অৱগত কৰে আৰু মেঘালয়ৰ পাঁচজন গাওঁবাসী আৰু অসমৰ এজন বনৰক্ষীৰ প্ৰাণ হেৰুওৱা গুলীচালনাৰ ঘটনাৰ সৱিশেষ দাঙি ধৰে।
এনএইচআৰচিৰ মুৰব্বীৰ সৈতে বৈঠকৰ পিছত চাংমাই এটা ভিডিঅ’ বাৰ্তাত কয়, “গুলীচালনাৰ ঘটনাটো অসম আৰক্ষী আৰু অসম বনৰক্ষীৰ দ্বাৰা মানৱ অধিকাৰৰ স্পষ্ট উলংঘন আছিল। এটা কেন্দ্ৰীয় সংস্থাই বিষয়টো তদন্ত কৰিব।”
ৰাষ্ট্ৰীয় মানৱ অধিকাৰ আয়োগৰ সহযোগ বিচাৰি তেওঁ স্পৰ্শকাতৰ সীমান্ত অঞ্চলত নিয়োজিত বাহিনীৰ সংবেদনশীলতাৰ প্ৰয়োজনীয়তাৰ ওপৰত গুৰুত্ব আৰোপ কৰে যাতে মূল্যৱান লোকৰ প্ৰাণ হেৰুওৱা এনে ঘটনা প্ৰতিহত কৰিব পৰা যায়।
চাংমাৰ সৈতে উপ মুখ্যমন্ত্ৰী প্ৰেষ্টেন টিনচং, গৃহ সচিব চিৰিল ভি.ডি. ডিয়েংডো আৰু অন্যান্য জ্যেষ্ঠ বিষয়াসকল উপস্থিত আছিল।
ইয়াৰ আগতে মেঘালয় মানৱ অধিকাৰ আয়োগে মুক্ৰো গুলীচালনাৰ গোচৰটো গ্ৰহণ কৰিছিল আৰু ৰাজ্যখনৰ মুখ্য সচিবক ১৫ দিনৰ ভিতৰত এক বিতং প্ৰতিবেদন দাখিল কৰিবলৈ নিৰ্দেশ দিছিল।
