ৰাজ্যত কাৰিকৰী শিক্ষাৰ সম্প্ৰসাৰণৰ অংশ হিচাপে মুখ্য মন্ত্ৰী সৰ্বানন্দ সোণোৱালে আজি ডিব্ৰুগড় জিলাৰ টিংখং বিধানসভা সমষ্টিৰ অন্তৰ্গত ১ নং বেতনি গাঁৱত এছ অ পি দি আঁচনিৰ অধীনত নিৰ্মাণ হ’ব লগীয়া টিংখং পলিটেকনিকৰ আধাৰশিলা স্থাপন কৰে।
আধাৰশিলা স্থাপন কৰি মুখ্য মন্ত্ৰীয়ে কয় যে শিক্ষাৰ যোগেদিহে এখন সমাজ আৰু ৰাষ্ট্ৰ শক্তিশালী হয়। সেয়ে সমগ্ৰ ৰাজ্যতে শিক্ষাৰ আন্তঃগাঁথনি সবল কৰাৰ উপৰি উন্নত মানৰ শৈক্ষিক পৰিবেশ গঢ় দিয়াৰ ক্ষেত্ৰত আমাৰ চৰকাৰে গুৰুত্ব আৰোপ কৰিছে।
বৰ্তমান যুগ বিজ্ঞান আৰু প্ৰযুক্তিবিদ্যাৰ যুগ বুলি মন্তব্য কৰি কয় যে অভিভাৱক আৰু শিক্ষক-শিক্ষয়ত্ৰীসকল হৈছে এক মহাশক্তি আৰু এই শক্তিয়ে ছাত্ৰ-ছাত্ৰীসকল সৎ, দায়বদ্ধ সুনাগৰিক হিচাপে গঢ়ি তোলাৰ দায়িত্ব গ্ৰহণ কৰিব লাগিব।
ইয়াৰ উপৰি আৰ্থিকভাৱে দুৰ্বল পৰিয়ালৰ শিক্ষাৰ্থীৰ সুবিধাৰ্থে বিজেপি চৰকাৰে বিদ্যালয়, মহাবিদ্যালয় পৰ্যায় পৰ্যন্ত বিনামূলীয়া পাঠ্যপুথি, য়ুনিফৰ্ম যোগান ধৰাৰ লগতে নামভৰ্তিৰ মাছুল আৰু পৰীক্ষা মাছুল ৰেহাই দিয়া বুলিও মুখ্য মন্ত্ৰী সোণোৱালে প্ৰকাশ কৰে।
অসমখনক বিদেশীমুক্ত কৰিব লাগে বুলি দাবী উত্থাপন হৈ থকা প্ৰসংগতো সোণোৱালে তাৎপৰ্যমূলক মন্তব্য কৰি কয় যে অসমীয়া যুৱক-যুৱতীয়ে দক্ষ আৰু কৌশলী হৈ উঠি কৰ্মক্ষেত্ৰত প্ৰভুত্ব বিস্তাৰ কৰিব পাৰিলেহে অসমখন বিদেশী মুক্ত কৰিব পৰা যাব।
ইয়াৰ উপৰি ৰাজ্যৰ শিক্ষাখণ্ডক এক বিশেষ মাত্ৰা প্ৰদান কৰাৰ উদ্দেশ্যে ৰাজ্য চৰকাৰে ইতিমধ্যে ৰাজ্যত ৬খন চিকিৎসা মহাবিদ্যালয়, ৯খন অভিযান্ত্ৰিক মহাবিদ্যালয়, ৩০ খন পলিটেকনিক আৰু প্ৰতিটো উন্নয়নখণ্ড সামৰি ২৪০খন দক্ষতা উন্নয়ন কেন্দ্ৰ নিৰ্মাণৰ পদক্ষেপ গ্ৰহণ কৰাৰ কথাও উল্লেখ কৰে।
উল্লেখ্য যে পলিটেকনিকখন অসম চৰকাৰৰ কাৰিকৰী শিক্ষা সঞ্চালকালয়ৰ অধীনত ৫০ কোটি ব্যয় সাপেক্ষে ৩৫ বিঘা ভূমিত নিৰ্মাণ কৰা হ’ব। এই অনুষ্ঠানৰ লগতে সংগতি ৰাখি মুখ্য মন্ত্ৰী সোণোৱালে ৰাজগড় সামূহিক স্বাস্থ্য কেন্দ্ৰ সৱলীকৰণ আঁচনিৰো শুভাৰম্ভণি কৰে।
আজিৰ এই অনুষ্ঠানত মুখ্য মন্ত্ৰী সোণোৱালৰ উপৰি শিক্ষা মন্ত্ৰী সিদ্ধাৰ্থ ভট্টাচাৰ্য, ডিব্ৰুগড় লোকসভা সমষ্টিৰ সাংসদ ৰামেশ্বৰ তেলী, আৰু টিংখং বিধানসভা সমষ্টিৰ বিধায়ক বিমল বৰা, লাহোৱাল সমষ্টিৰ বিধায়ক ঋতুপৰ্ণ বৰুৱাৰ লগতে বহুতো গণ্য-মান্য ব্যক্তি উপস্থিত থাকে।