আজি ডিব্ৰুগড়ত মুখ্য মন্ত্ৰী সৰ্বানন্দ সোণোৱালৰ সৈতে অসম চাহ মজদুৰ সংঘৰ এখন বৈঠক অনুষ্ঠিত হয়।
মুখ্য মন্ত্ৰীৰ লক্ষ্মীনগৰস্থিত বাসভৱনত অনুষ্ঠিত বৈঠকত কোভিড-১৯-ৰ ফলত চাহ উদ্যোগলৈ আহি পৰা প্ৰত্যাহ্বান আৰু এই সম্পৰ্কত লোৱা ব্যৱস্থাৰাজী সম্পৰ্কে বিতংভাৱে আলোচনা কৰা হয়।
বৈঠকত মুখ্য মন্ত্ৰী সোণোৱালে অসমৰ অৰ্থনৈতিক উত্তোণৰৰ ক্ষেত্ৰত চাহ উদ্যোগৰ ভূমিকা অতিশয় গুৰুত্বপূৰ্ণ বুলি মত প্ৰকাশ কৰে।
ৰাজ্য চৰকাৰে সেইবাৰে চাহ উদ্যোগৰ উন্নয়নৰ বাবে অগ্ৰাধিকাৰ ভিত্তিত পদক্ষেপ গ্ৰহণ কৰি আহিছে বুলিও সোণোৱালে লগতে কয়।
ক’ৰ’না ভাইৰাছৰ সংক্ৰমণৰ ফলত ৰাজ্যৰ চাহ উদ্যোগলৈ প্ৰত্যাহ্বান নামি আহিছে যদিও এই প্ৰত্যাহ্বানৰ সৈতে মোকাবিলা কৰিবলৈ অসম চৰকাৰে সম্পূৰ্ণৰূপে প্ৰস্তুত বুলি সোণোৱালে মত ব্যক্ত কৰি স্বাস্থ্য বিভাগৰ নীতি-নিৰ্দেশনাৰ আধাৰত ইতিমধ্যে চাহ বাগিচাসমূহত কাম-কাজ আৰম্ভ হৈছে বুলি কয়।
আনহাতে, চাহ বাগিচাৰ শ্ৰমিকসকলে সামাজিক দূৰত্ব বজাই ৰাখি কৰ্মত জড়িত হৈ থকা বাবে সোণোৱালে অসম চাহ মজদুৰ সংঘৰ জৰিয়তে ৰাজ্যৰ চাহ শ্ৰমিক সকলক ধন্যবাদ জ্ঞাপন কৰে।
এই ক্ষেত্ৰত অসম চাহ মজদুৰ সংঘই আগবঢ়োৱা সহযোগিতাৰ বাবে মুখ্য মন্ত্ৰীয়ে সংঘৰ বিষয়ববীয়াসকলৰ শলাগ লয়।
তদুপৰি, মুখ্য মন্ত্ৰীয়ে আসাম কোম্পানী লিমিটেডৰ অধীনত থকা ১৪ খন বাগিচাৰ শ্ৰমিকসকলৰ লগতে সকলো চাহ বাগিচা তথা ক্ষুদ্ৰ চাহ বাগিচাসমূহৰ শ্ৰমিকসকলে যাতে ল’কডাউনৰ সময়ছোৱাত কোনো ধৰণৰ অসুবিধাৰ সন্মুখিন হ’ব নালাগে তাৰ বাবে উপায়ুক্তসকলক নিৰ্দেশ দিয়া হৈছে বুলি কয়।
আলোচনাৰ সয়ত সোণোৱালে কয় যে লকডাউনৰ সময়ছোৱাত চাহ উদ্যোগে সন্মুখীন হোৱা লোকচানৰ প্ৰতি লক্ষ্য ৰাখি অসম চাহ কোম্পানী লিমিটেডে গেছ যোগান ধৰা ৰাজ্যৰ ৪০৯ খন চাহ বাগানৰ পৰা চুক্তি মৰ্মে লাভ কৰিবলগীয়া নূন্যতম চাহিদা নিৰিখ ৰেহাই দিবলৈ কোম্পানীটোক নিৰ্দেশ দিয়া হৈছে বুলি কয়। এই পদক্ষেপে চাহ উদ্যোগক বিশেষ সকাহ দিব বুলিও মুখ্য মন্ত্ৰীয়ে উল্লেখ কৰে।
বৈঠকত অসম চাহ মজদুৰ সংঘই আসাম কোম্পানী লিমিটেডৰ ১৪ খন বাগিচাৰ ৪০ হাজাৰ স্থায়ী আৰু অস্থায়ী শ্ৰমিকৰ বিষয়টো সোণোৱালক অৱগত কৰে।
সংঘই লকডাউনৰ মাজতে অসমৰ চাহ উদ্যোগক গতিশীল কৰি তোলাৰ বাবে মুখ্য মন্ত্ৰীয়ে লোৱা পদক্ষেপৰ শলাগ লয়।
ইপিনে, মজদুৰ সংঘই মুখ্য মন্ত্ৰীক পূৰ্বে চাহ বাগানৰ শ্ৰমিকসকলে মুকলি বজাৰৰ পৰা প্ৰয়োজনীয় ৰেচন ক্ৰয় কৰি অহাৰ বিপৰীতে যোৱা দুমাহে ভাৰতীয় খাদ্য নিগমৰ পৰা পোনপটীয়াকৈ তেওঁলোকে ৰেচন লাভ কৰি আহিছে বুলি অৱগত কৰি ভৱিষ্যতেও এই ব্যৱস্থা বাহাল ৰখাৰ ক্ষেত্ৰত যাৱতীয় পদক্ষেপ ল’বলৈ অনুৰোধ কৰে।