বাঘজানৰ গেছ নিৰ্গমনস্থলীত সংঘটিত হোৱা অগ্নিকাণ্ডৰ সন্দৰ্ভত মুখ্যমন্ত্ৰীয়ে প্ৰতিক্ৰিয়া প্ৰকাশ কৰিছে।
আজি খানাপাৰাস্থিত অসম প্ৰশাসনীয় পদাধিকাৰী আইন মহাবিদ্যালয় চৌহদত এক অনুষ্ঠানত অংশগ্ৰহণ কৰি সংবাদ মাধ্যমৰ আগত মুখ্যমন্ত্ৰীগৰাকীয়ে কয় ‘অসম চৰকাৰৰ তৰফৰ পৰা স্থানীয় ৰাইজক নিৰাপত্তা নিশ্চিত কৰিবৰ বাবে যাৱতীয় পদক্ষেপ গ্ৰহণ কৰা হৈছে। জিলা প্ৰশাসনকো এইক্ষেত্ৰত নিৰ্দেশ দিয়া হৈছে।‘
ৰাজ্যৰ মুখ্য সচিব, আৰক্ষী সঞ্চালক প্ৰধানকো এই ক্ষেত্ৰত অধিক তৎপৰতাৰে পদক্ষেপ ল’বলৈ নিৰ্দেশ দিয়া হৈছে বুলি তেওঁ কয়।
ইতিমধ্যে, আৰক্ষী, জিলা প্ৰশাসনৰ লোক, NDRF বাহিনী, অৰ্ধ সামৰিক বাহিনীৰ লোক ঘটনাস্থলীত উপস্থিত হৈছে বুলি তেওঁ জনায়।
ইয়াৰোপৰি, ভাৰত চৰকাৰৰ কেন্দ্ৰীয় পেট্ৰ’লিয়াম মন্ত্ৰী ধৰ্মেন্দ্ৰ প্ৰধানক গোটেই বিষয়টো অৱগত কৰা বুলি সদৰী কৰি সোণোৱালে কয় ‘তেওঁক অতি শীঘ্ৰে তৎপৰতাৰে বিস্ফোৰণৰ বিষয়টো সন্দৰ্ভত পদক্ষেপ ল’বলৈ আহ্বান জনাইছো।‘
সোণোৱালে লগতে কয় ‘ভাৰতীয় বায়ু সেনায়ো যাতে এইক্ষেত্ৰত ভূমিকা গ্ৰহণ কৰে বা জুই নুমোৱাৰ কামত নিজকে আত্ম নিয়োগ কৰে। কেন্দ্ৰীয় প্ৰতিৰক্ষা মন্ত্ৰী ৰাজনাথ সিঙকো এই সন্দৰ্ভত আহ্বান জনোৱা হৈছে। মুঠৰ ওপৰত অইল ইণ্ডিয়া লিমিটেড, অ’এনজিছি, অসম চৰকাৰ আৰু অৰ্ধ সামৰিক বাহিনীয়ে এই ক্ষেত্ৰত পদক্ষেপ লোৱাৰ বাবে প্ৰয়াস কৰিছো।’
‘আমাৰ দৃঢ় বিশ্বাস সকলোৰে সহযোগত এই কামত সফলতা লাভ কৰিব পাৰিম।‘ সোণোৱালে এইদৰে কয়।
তিনিচুকীয়াবাসী ৰাইজলৈ আহ্বান জনাই তেওঁ কয় ‘কোনো কাৰণতে আপোনালোক আতংকিত নহ’ব। পেট্ৰ’লিয়াম মন্ত্ৰণালয়ৰ পৰা বিদেশৰ যিসমূহ বিশেষজ্ঞ অনা হৈছে সকলোৱে এই কামত আত্ম নিয়োগ কৰিছে। যিমানখিনি যাৱতীয় ব্যৱস্থা গ্ৰহণ কৰাৰ দৰকাৰ আছে সিমানখিনি ল’বলৈ আমি দৃঢ় প্ৰতিজ্ঞ।‘
