কংগ্ৰেছ দলটোৱে কেৱল ক্ষমতা দখলৰ ৰাজনীতি কৰাৰ বাহিৰে একো নকৰিলে। কংগ্ৰেছে বহু পিছপৰা দৰিদ্ৰ জনসাধাৰণৰ আধুনিক ধ্যান-ধাৰণাৰে উন্নয়নৰ যাত্ৰাত তেওঁলোকক অংশীদাৰ কৰাব নোৱাৰাটো অতি দুৰ্ভাগ্যজনক।
নগাঁৱৰ আমলখি চাহ বাগানত চাহ শ্ৰমিকৰ আৱাসৰ আঁচনি মুকলি কৰি মঙলবাৰে এই মন্তব্য মুখ্য মন্ত্ৰী সৰ্বানন্দ সোণোৱালৰ।
কলিয়াবৰৰ আমলখি চাহ বাগিচাত অসম চৰকাৰৰ চাহ জনজাতি কল্যাণ বিভাগৰ অনুদানেৰে অসম চাহ নিগমৰ ১৫খন বাগিচাৰ শ্ৰমিকসকলৰ বাবে ৰাজ্য চৰকাৰে এই আঁচনি গ্ৰহণ কৰিছে।
শ্ৰমিকসকলৰ বাবে আগবঢ়োৱা ১৯০৩টা বাসগৃহ নিৰ্মাণ কাৰ্য্যৰ আধাৰশিলা স্থাপন কৰি মুখ্য মন্ত্ৰী সৰ্বানন্দ সোণোৱালে ৰাইজক উদ্দেশ্যি কয় যে এতিয়া আমাৰ চৰকাৰে ৩ কোটি ২০ লক্ষ লোকৰ আত্মনিৰ্ভৰশীল কৰাৰ মানসিকতাৰে এইখন চৰকাৰে দৃঢ় পদক্ষেপ গ্ৰহণ কৰিছে।
তেওঁ লগতে কয় যে প্ৰধান মন্ত্ৰী ডাঙৰীয়াই আত্মনিৰ্ভৰ অভিযানৰ যোগেদি ২০ লক্ষ কোটি টকা ঘোষণা কৰিছে।
তেওঁ চাহ নিগমৰ পৰি থকা মাটিত কাম কৰি অধিক উৎপাদন বৃদ্ধি কৰিবলৈ সংশ্লিষ্ট পক্ষক আহ্বান জনায়।
অসম চাহ নিগম উদ্যোগটো এক সফল উদ্যোগ বুলি অভিহিত কৰি মুখ্য মন্ত্ৰীগৰাকীয়ে লগতে আৰু কয় যে উদ্যোগটো জীয়াই ৰাখি অসম চৰকাৰৰ অৰ্থনৈতিক বুনিয়াদ গঢ় দিয়াত অধিক সফল হ’ব লাগিব।
অনুষ্ঠানত জলসম্পদ মন্ত্ৰী কেশৱ মহন্তই তেওঁৰ ভাষণত নিগমৰ বাগিচাই এই চৰকাৰৰ দিনত এক নতুন জীৱন পালে বুলি মন্তব্য কৰে।
কৃষি মন্ত্ৰী অতুল বৰাই নিগমৰ বাগিচাত চাহৰ বাদেও আন উপাৰ্জনমুখী খেতি কৰাৰ পৰামৰ্শ আগবঢ়ায়।
আনহাতে সাংসদ পল্লৱ লোচন দাসে কংগ্ৰেছৰ দিনত নিগমত বহুত পইচা সিঁচিলে বুলি মন্তব্য কৰি কয় যে পইচা সিঁচাকে উন্নয়ন বুলি নুবুজায়।
অনুষ্ঠানটোত মন্ত্ৰী চন্দ্ৰ মোহন পাটোৱাৰী, অতুল বৰা, কেশৱ মহন্ত, সঞ্জয় কিষান, সাংসদ কামাখ্যা প্ৰসাদ তাছা, পল্লৱ লোচন দাস, আয়ুক্ত সচিব জে বি এক্কা, বিধায়ক ৰূপক শৰ্মা, ডিম্বেশ্বৰ দাস, অসম চাহ নিগমৰ অধ্যক্ষ অমিয় বৰাকে ধৰি বহু কেইগৰাকী উচ্চপদস্থ বিষয়া উপস্থিত থাকে।
