লোকসভা নিৰ্বাচনৰ বাবে কংগ্ৰেছ আৰু এ আই য়ু ডি এফ দলৰ মাজত গোপন মিত্ৰতা গঢ়ি উঠা বুলি ৰাজনৈতিক মহলত ব্যাপক ৰূপত চৰ্চিত হৈ থকাৰ সময়তে এই মিত্ৰতা অসমৰ বাবে অশনি সংকেত বুলি মন্তব্য কৰিছে বিজেপি বিধায়ক প্ৰশান্ত ফুকনে।
ডিব্ৰুগড়ৰ বিধায়ক ফুকনে এই প্ৰসংগত কয়, ‘এতিয়া আৰু কংগ্ৰেছ-এ আই য়ু ডি এফৰ মিত্ৰতা গোপন হৈ থকা নাই। দুয়ো দলৰ মিত্ৰতা অসমৰ বাবে অশুভ’।
একমাত্ৰ ক্ষমতাৰ খক তথা কলিয়াবৰ সমষ্টিৰ পৰা সাংসদ হিচাপে যাতে পুনৰ এবাৰ প্ৰাক্তন মুখ্য মন্ত্ৰী তৰুণ গগৈৰ পুত্ৰ গৌৰৱ গগৈ নিৰ্বাচিত হয় সেই কথা লক্ষ্য ৰাখিয়েই কংগ্ৰেছ দলে এ আই য়ু ডি এফৰ সৈতে হাত মিলাইছে বুলিও বিধায়কগৰাকীয়ে মন্তব্য কৰে।
আনহাতে তৰুণ গগৈ আৰু বদৰুদ্দিন আজমলৰ মাজত হোৱা এই মিত্ৰতাই অসমখনক দ্বিতীয় কাশ্মীৰ বনোৱাৰ ক্ষেত্ৰত সহায়ক হ’ব বুলিও মন্তব্য কৰে বিধায়ক ফুকনে। তদুপৰি বদৰুদ্দিন আজমল সন্দৰ্ভত পূৰ্বে আক্ৰমণাত্মক হোৱা তৰণ গগৈয়ে এতিয়া গ্ৰহণ কৰা নৰম স্থিতি সন্দৰ্ভত কয় যে তৰুণ গগৈৰ গাত লাচিতৰ তেজ আছে নে নাই ক’ব নোৱাৰি কিন্তু বদনৰ যে তেজ আছে সেই কথা এতিয়া স্পষ্ট হৈ পৰিছে।
উল্লেখ্য যে এইবাৰৰ লোকসভা নিৰ্বাচনত এ আই য়ু ডি এফে ধুবুৰী, কৰিমগঞ্জ আৰু বৰপেটা আসনতহে প্ৰতিদ্বন্দ্বিতা কৰিব। এই কথা যোৱা ২৫ মাৰ্চত সংবাদমেল যোগে দলটোৰ সাধাৰণ সম্পাদক আমিনুল ইছলামে জানিবলৈ দিছিল।
দলটোৰ এই ঘোষণাৰ পিছৰে পৰা বিষয়টোৱে ৰাজনৈতিক মহলত ব্যাপক চৰ্চা লাভ কৰি আছে। এ আই য়ু ডি এফৰ এনে সিদ্ধান্ত কংগ্ৰেছৰ সৈতে হোৱা ভিতৰুৱা বুজাবুজিৰ ফলশ্ৰুতি বুলি বিজেপিৰ লগতে আন আন বিৰোধী ৰাজনৈতিক দলসমূহে মন্তব্য কৰিছে।
আনহাতে কংগ্ৰেছে এই অভিযোগ সম্পূৰ্ণৰূপে নাকচ কৰাৰ লগতে কংগ্ৰেছৰ বিৰুদ্ধে এয়া অপপ্ৰচাৰ বুলিহে মন্তব্য কৰে।
এইখিনিতে মন কৰিব লগীয়া যে বিগত লোকসভা নিৰ্বাচনত এ আই য়ু ডি এফ দলে কংগ্ৰেছৰ ভোট ভঙাৰ লগতে বহু কেইটা সমষ্টিত গুৰুত্বপূৰ্ণ ভূমিকা গ্ৰহণ কৰিছিল। সেই পৰিসংখ্যাৰ প্ৰতি লক্ষ্য ৰাখি এইবাৰৰ নিৰ্বাচনত কংগ্ৰেছ আৰু এ আই য়ু ডি এফ দলে ভিতৰুৱাকৈ বুজাবুজি কৰা বুলি ৰাজনৈতিক বিশ্লেষকসকলে সন্দেহ প্ৰকাশ কৰিছে।
