আজি দিনজোৰা কাৰ্য্যসূচীৰে অসম প্ৰদেশ কংগ্ৰেছ কমিটীয়ে দলৰ মূখ্য কাৰ্যালয়ত ১৩৭ তম প্ৰতিষ্ঠা দিৱস পালন কৰে। দলৰ সভাপতি ভূপেন বৰাই পতাকা উত্তোলন কৰি আজিৰ পৰিস্থিতিত দলৰ হকে সকলোকে এক উৎসাহীকৃত প্ৰাণ হিচাপে গঢ়ি তুলিবলৈ আহবান জনায়।
ইয়াৰ পাছতে নিখিল ভাৰত কংগ্ৰেছ সেৱাদলৰ ৰাষ্ট্ৰীয় সম্পাদক চন্দন বৰুৱাই সকলোকে শপত পাঠ কৰোৱায়। অনুষ্ঠানৰ লগত সঙ্গতি ৰাখি সেৱাদলৰ দ্বাৰা এক ত্ৰিৰংগা শোভা যাত্ৰা উলিওৱা হয়।
৭৫ বছৰীয়া স্বাধীনতা দিৱস উদযাপন সমিতিৰ অধ্যক্ষ শ্ৰীশৰৎ বৰকটকীদেৱৰ প্ৰস্তাৱমৰ্মে ভূপেন কুমাৰ বৰাই সভাপতিত্ব কৰা সভাত প্ৰাক্তন সাংসদ দ্বীজেন শৰ্মাই দলৰ প্ৰতিষ্ঠা কালৰ পটভূমি দাঙি ধৰে।
ডিব্ৰুগড় বিশ্ববিদ্যালয়ৰ ৰাজনীতি বিজ্ঞান বিভাগৰ অৱসৰপ্ৰাপ্ত অধ্যাপক ড০ আবু নাছাৰ ছাঈদ আহমদে লিখা লিখিত ভাষণ শৈলেন বৰা পাঠ কৰে। দলৰ সভাপতি শ্ৰীভূপেন কুমাৰ বৰাই সাম্প্ৰতিক সময়ত দলৰ প্ৰাসঙ্গিকতাৰ সন্দৰ্ভত সকলোকে সক্ৰিয় সহযোগিতা কামনা কৰে।
উক্ত সভাত বিৰোধী দলপতি দেৱব্ৰত শইকীয়া, প্ৰাক্তন সাংসদ বলীন কুলি, বিধায়ক ৰেকিবুদ্দিন আহমেদ, নুৰুল হুদা, নন্দিতা দাস, অপূৰ্ব কুমাৰ ভট্টাচাৰ্য্য, বিপুল গগৈ, নৃপেন্দ্ৰ ঠাকুৰীয়া প্ৰমুখ্যে বহু জ্যেষ্ঠ কংগ্ৰেছ নেতা উপস্থিত থাকে।
কংগ্ৰেছৰ প্ৰতিষ্ঠা দিৱসৰ লগতে আজি কংগ্ৰেছ সেৱাদলৰ ৯৮ তম প্ৰতিষ্ঠা দিৱস পালন কৰা হয়। উক্ত সভাতে অসম প্ৰদেশ কংগ্ৰেছ সেৱাদলৰ নৱনিযুক্ত সভাপতি হিচাপে দীপ বায়নে আনুষ্ঠানিকভাৱে কাৰ্য্যভাৰ গ্ৰহণ কৰে।
সভাৰ আৰম্ভণিতে প্ৰদেশ কংগ্ৰেছৰ সভাপতি ভূপেন বৰাই সেৱাদলৰ প্ৰতিষ্ঠাপক এন.এছ. হাৰ্ডিকাৰলৈ শ্ৰদ্ধাঞ্জলি জ্ঞাপন কৰে।
তেওঁ ভাষণত সেৱাদলৰ শৃংখলিত কাৰ্য্যসূচীক ভূয়সী প্ৰসংশা কৰে আৰু নিশ্চিতভাৱে দল শক্তিশালী হৈ উঠিব বুলি মত পোষণ কৰে। সেৱাদলৰ নৱনিযুক্ত সভাপতি দীপ বায়নে দলৰ সভাপতি ভূপেন বৰাৰ গতিশীল নেতৃত্ব, ব্যক্তিত্ব আৰু বলিষ্ঠ পদক্ষেপক শলাগ লয় লগতে ভৱিষ্যতে তেওঁৰ নেতৃত্বত সকলো ধৰণৰ সহায় সহযোগিতা আগবঢ়োৱাৰ প্ৰতিশ্ৰুতি দিয়ে।
সভাত বিৰোধী দলপতি দেৱব্ৰত শইকীয়াই সেৱাদলৰ ভূমিকা আৰু প্ৰাসঙ্গিকতা পাঠ কৰে।
