প্ৰমোদ বড়ো আৰু ভৱেশ কলিতালৈ ৪ কিল’গ্ৰাম ঘাঁহৰ বীজ পঠালে বিৰোধী দলপতি দেৱব্ৰত শইকীয়াই।
মুখ্যমন্ত্ৰী হিমন্ত বিশ্ব শৰ্মাই উপ-নিৰ্বাচনৰ প্ৰচাৰৰ সময়ত প্ৰমোদ বড়ো আৰু বিজেপিক ভালকৈ দানা খুৱালে ২৬ লিটাৰকৈ গাখীৰ দিব বুলি উল্লেখ কৰিছিল।
মুখ্যমন্ত্ৰীৰ এই ‘আহ্বান’ৰ প্ৰতি ‘সঁহাৰি’ জনাই জ্যেষ্ঠ কংগ্ৰেছ নেতা তথা বিৰোধী দলপতি দেৱব্ৰত শইকীয়াই উপ-নিৰ্বাচনৰ ভোটগ্ৰহণৰ প্ৰাকমুহূৰ্তত শুকুৰবাৰে প্ৰমোদ বড়ো আৰু ভৱেশ কলিতালৈ অনলাইনত ৪ কিলোগ্ৰামকৈ ঘাঁহৰ বীজ প্ৰেৰণ কৰিছে।
দুয়োজন নেতালৈ শইকীয়াই ব্যক্তিগতভাৱে পত্ৰও প্ৰেৰণ কৰিছে বুলি জানিব পৰা গৈছে।
ইপিনে, তেওঁৰ শুভাকাংক্ষীসকলকো দুয়োজন নেতালৈ দানা প্ৰেৰণ কৰিবলৈ আহ্বান জনাইছে বিৰোধী দলপতিগৰাকীয়ে।
ঘাঁহৰ বীজ বিৰোধী দলপতিজনে বড়োলৈ তেওঁৰ গাঁৱৰ ঠিকনাত আৰু কলিতালৈ তেওঁৰ বিধায়ক নিৱেশৰ ঠিকনাত প্ৰেৰণ কৰিছে।
দুয়োলৈ লিখা পত্ৰখনত শইকীয়াই লিখি কয় “যাতে ইয়াৰ সদব্যৱহাৰ কৰি আপোনালোকৰ সদস্যসকলে দৈনিক ২৬ লিটাৰকৈ গাখীৰ দিব পাৰে আৰু প্ৰতি ঘৰ পৰিয়ালে গাখীৰ খোৱাৰ উপৰি ৰাহি হোৱা গাখীৰ চৰকাৰে দিয়া চাউলৰ লগত ব্যৱহাৰ কৰি পায়স তৈয়াৰ কৰিব পাৰে।”
