দিল্লীৰ ওচৰত নতশিৰ নেকি মুখ্যমন্ত্ৰী ড০ হিমন্ত বিশ্ব শৰ্মা?
দিল্লীয়ে উঠ বুলি ক’লে উঠিব আৰু দিল্লীয়ে বহ বুলি ক’লে বহিব নেকি মুখ্যমন্ত্ৰী ড০ হিমন্ত বিশ্ব শৰ্মাই।
তেনে এক কথাৰে যেন উমান পোৱা গ’ল মুখ্যমন্ত্ৰী ড০ হিমন্ত বিশ্ব শৰ্মাৰ বক্তব্যত।
যোৱা ২৬ জুলাইৰ দিনা মিজো আৰক্ষী আৰু উন্মত্ত জনতাৰ গুলিত প্ৰাণ হেৰুৱালে ৬ গৰাকীকৈ আৰক্ষী জোৱানে।
তাৰ পাছতো শান্তি দূতৰ ভুমিকাত অৱতীৰ্ণ হৈ অসম আৰক্ষীয়ে গুলি নচলায় বুলি দাবী কৰা মুখ্যমন্ত্ৰীৰ মন্তব্য নিশ্চয়কৈ নুই কৰিব নোৱাৰি।
কিন্তু কালি শিলচৰত মুখ্যমন্ত্ৰীয়ে সম্বোধন কৰা এক সংবাদমেলত অত্যুক্তি কৰিবলৈ গৈ কৈ পেলালে বহু কথাই। যি কথাই এতিয়া ৰাজ্যৰ চৌদিশে সৃষ্টি কৰিছে তীব্ৰ প্ৰতিক্ৰিয়াৰ।
মুখ্যমন্ত্ৰীয়ে কৈছিল ‘কেৱল বৰাক উপত্যকাই নহয়, কেন্দ্ৰই বিচাৰিলে বা সংসদত আইন প্ৰণয়ন হ’লে গুৱাহাটী-নলবাৰীলৈকে মিজোৰামক গতালেও মোৰ আপত্তি নাই।‘
বুদ্ধিত বৃহস্পতি, কথাত দম থকা তথা কালৈকো ভয় নকৰা মুখ্যমন্ত্ৰীৰ পৰা এনেধৰণৰ মন্তব্য সচাৰচৰ কোনো অসমীয়াই আশা নকৰে। সেয়েহে হয়তো তীব্ৰ প্ৰতিক্ৰিয়াৰ সৃষ্টি হৈছে চৌদিশে।
প্ৰতিক্ৰিয়া প্ৰকাশ কৰিছে প্ৰদেশ কংগ্ৰেছৰ নতুন সভাপতি ভুপেন বৰাই।
ভুপেন বৰাৰ মতে ‘অসমৰ সীমান্ত পিছুৱাই অনা হৈছে! মুখ্যমন্ত্ৰীৰ বক্তব্যৰ পৰা স্পষ্ট হৈছে এই কথা মুখ্যমন্ত্ৰীৰ অদূৰদৰ্শিতা-অপৰিপক্কতাৰ বাবে আজি অসমৰ এই অৱস্থা!
প্ৰকৃত স্বৰূপ ওলাই পৰাৰ ভয়ত বিৰোধী দলৰ নেতাক সীমান্ত অঞ্চল পৰিদৰ্শনত বাধা প্ৰদান কৰাৰ গুৰুতৰ অভিযোগ তোলে ভুপেন বৰাই।
ইপিনে, মুখ্যমন্ত্ৰীৰ কালিৰ বক্তব্যৰ বিৰোধিতা অসম জাতীয় পৰিষদৰ সভাপতি লুৰীণজ্যোতি গগৈৰ।
মুখ্যমন্ত্ৰীক ৰাজ্যৰ ভৌগলিক অখণ্ডতাৰ কথা সোঁৱৰালে লুৰীণজ্যোতিয়ে। লগতে মুখ্যমন্ত্ৰীৰ বক্তব্য নিৰাশাজনক আৰু লজ্জাজনক আখ্যা দিয়ে।
সীমা সুৰক্ষাৰ দায়িত্বত থকা শ্বহীদ জোৱানৰ প্ৰতি এয়া চুড়ান্ত অপমান বুলিও লুৰীণে কয়।
ইপিনে, নেডাৰ আহ্বায়ক হিচাপেও মুখ্যমন্ত্ৰী ড০ হিমন্ত বিশ্ব শৰ্মা চুড়ান্ত ব্যৰ্থ হোৱা বুলি দাবী লুৰীণজ্যোতি গগৈৰ।
লুৰীণে কয় ‘নেডাৰ বৈঠকৰ মূল বিষয় সীমা সুৰক্ষাৰ প্ৰসংগ এৰাই চলিছে মুখ্যমন্ত্ৰীয়ে। উত্তৰ পূৱৰ সমন্বয় ৰক্ষাতো চুড়ান্ত ব্যৰ্থ হৈছে কেন্দ্ৰীয় গৃহমন্ত্ৰী।২৬ জুলাইৰ পৰা এতিয়ালৈকে এটাও টুইট কৰা নাই প্ৰধান মন্ত্ৰী আৰু কেন্দ্ৰীয় গৃহমন্ত্ৰীয়ে।‘
মুখ্যমন্ত্ৰী হিচাপে কেন্দ্ৰৰ বিৰুদ্ধে গৰজি উঠাৰ উদাহৰণ দাঙি ধৰিছিল গোপীনাথ বৰদলৈয়ে। কিন্তু এতিয়াৰ ৰাজ্যৰ মুখ্যমন্ত্ৰী যেন ‘কেন্দ্ৰৰ ছাবি দিয়া পুতলা’ কিয়নো ‘বৰাক উপত্যকা, গুৱাহাটী নলবাৰীক মিজোৰামক গতাই দিলেও আপত্তি নাই মুখ্যমন্ত্ৰীৰ।
