শুকুৰবাৰে সংসদত মহিলা সংৰক্ষণ বিধেয়ক গৃহীত নোহোৱাৰ পিছৰে পৰা সমগ্ৰ দেশতে ৰাজনৈতিক উত্তাপ বৃদ্ধি পাইছে। শনিবাৰে নিশা প্ৰধানমন্ত্ৰী নৰেন্দ্ৰ মোদীয়ে দেশবাসীক সম্বোধন কৰে। তেওঁ দেশৰ সকলো মহিলাৰ ওচৰত ক্ষমা বিচাৰিলে। কংগ্ৰেছ, ডি এম কে, তৃণমূল কংগ্ৰেছকে ধৰি বিৰোধী দলসমূহক আক্ৰমণ কৰে।
ইয়াৰ পিছতে বিতৰ্কৰ মাত্ৰা আৰু বাঢ়িল। কংগ্ৰেছৰ সভাপতি মল্লিকাৰ্জুন খৰ্গে আৰু কংগ্ৰেছ নেতা জয়ৰাম ৰমেশে একেলগে প্ৰধানমন্ত্ৰীৰ ভাষণৰ বিৰুদ্ধে সৰৱ হৈছে।
দেশৰ উদ্দেশ্যি দিয়া ভাষণক ৰাজনৈতিক মঞ্চলৈ ৰূপান্তৰিত কৰা বুলি অভিযোগ উত্থাপন কৰিছে বিৰোধীয়ে।
মল্লিকাৰ্জুন খাৰ্গেই পোনপটীয়াকৈ অভিযোগ কৰে যে প্ৰধানমন্ত্ৰীৰ ভাষণত মহিলাৰ কথা খুব কমেইহে উল্লেখ কৰা হয়, বৰঞ্চ কংগ্ৰেছৰ সমালোচনাহে বেছি আছিল। তেওঁ দাবী কৰে, ‘ তেওঁৰ ভাষণত কংগ্ৰেছৰ নাম ৫৯ বাৰ উল্লেখ কৰা হৈছিল যদিও মহিলাসকলৰ প্ৰসংগ অতি কমেইহে উল্লেখ কৰা হৈছিল। চৰকাৰৰ অগ্ৰাধিকাৰৰ বিষয়ে ইয়াৰ পৰা কি বুজা যায়?’
তেওঁ লগতে কয় যে ভাষণটো ‘হতাশা আৰু ৰাজনৈতিক আক্ৰমণেৰে ভৰা’, য’ত বিধেয়কখন বিফল হোৱাৰ কাৰণ বুজাই নিদি বিৰোধীক দোষাৰোপ কৰা হৈছে।
ইপিনে, জয়ৰাম ৰমেশেও প্ৰধানমন্ত্ৰীৰ ভাষণক কঠোৰ ভাষাৰে আক্ৰমণ কৰে। তেওঁৰ ভাষাত, “জাতিক উদ্দেশ্যি দিয়া এটা ভাষণৰ এটা মৰ্যাদা থাকে, যিটো নিৰপেক্ষ হ’ব লাগে। কিন্তু এইটো আছিল এটা সম্পূৰ্ণ ৰাজনৈতিক, ‘হতাশাৰ সম্বোধন’।” তেওঁ প্ৰশ্ন উত্থাপন কৰে যে মহিলা সংৰক্ষণ কাৰ্যকৰী কৰাত কিয় পলম কৰিছে? তেওঁ এতিয়াই কাৰ্যকৰী কৰাৰ বাবে নতুন প্ৰস্তাৱ আনিবলৈও প্ৰত্যাহ্বান জনায়।
আন এগৰাকী কংগ্ৰেছ নেতা মনীষ তেৱাৰীয়ে কয় যে এনে ভাষণৰ পৰা নিৰপেক্ষতাৰ আশা কৰা হয়, কিন্তু তাত বিৰোধীক আক্ৰমণ কৰা হৈছে। তেওঁৰ মতে এয়া দুখজনক আৰু অভাৱনীয়।
সংবিধান বিধেয়কৰ ১৩১ সংখ্যক সংশোধনী হিচাপে অনা এই প্ৰস্তাৱত সংসদত মহিলাৰ বাবে ৩৩ শতাংশ সংৰক্ষণ বিচাৰিছিল। কিন্তু প্ৰয়োজনীয় দুই তৃতীয়াংশ সমৰ্থন নোপোৱাৰ বাবে বিধেয়কখন গৃহীত নহ’ল।
কেন্দ্ৰীয় চৰকাৰৰ মতে, ই আছিল মহিলা সবলীকৰণৰ দিশত এক বৃহৎ পদক্ষেপ। আনহাতে, কংগ্ৰেছে দাবী কৰিছে যে বিধেয়কখন ৰাজনৈতিকভাৱে ব্যৱহাৰ কৰি আসনৰ সীমা নিৰ্ধাৰণৰ লগত জড়িত কৰি বিভ্ৰান্তিৰ সৃষ্টি কৰিছে।
মুঠতে নাৰী সংৰক্ষণৰ বিষয়টো এতিয়া কেৱল নীতি বা আইন নহয় – ই এক বৃহৎ ৰাজনৈতিক যুঁজত পৰিণত হৈছে। ৰাজনৈতিক বিশ্লেষকসকলৰ মতে অনাগত দিনত বিজেপি বনাম কংগ্ৰেছৰ মাজত এই সংঘাতৰ বিতৰ্ক দৃদ্ধি পাব।
