আগন্তুক লোকসভা নিৰ্বাচনকলৈ ককালত টঙালি বান্ধিছে অসম প্ৰদেশ কংগ্ৰেছে। এক বিশেষ সূত্ৰৰ পৰা লাভ কৰা খবৰ অনুসৰি আজি বিয়লিৰ ভাগলৈ অসম প্ৰদেশ কংগ্ৰেছে অসমৰ ১৪ টা লোকসভাৰ প্ৰাৰ্থীৰ তালিকা ঘোষণা কৰাৰ পূৰ্ণ সম্ভাৱনা আছে।
মঙলবাৰে গুজৰাটত গান্ধীজীৰ দাণ্ডি যাত্ৰাৰ লগত সংগতি ৰাখি অনুষ্ঠিত কৰা কংগ্ৰেছ ৱৰ্কিং কমিটিৰ বৈঠকৰ পাছতে কংগ্ৰেছ ৰাষ্ট্ৰীয় নেতৃত্বই লোকসভা নিৰ্বাচনৰ প্ৰস্তুতি খৰটকীয়া কৰাৰ ক্ষেত্ৰত ৰাজ্য সমূহক অতি সোনকালে প্ৰাৰ্থীৰ তালিকা ঘোষণা কৰাৰ বাবে নিৰ্দেশ দিছিল।
আনহাতে, দলীয় হাইকামাণ্ডৰ নিৰ্দেশৰ পাছতে তৎপৰ হৈ পৰিছে অসম প্ৰদেশ কংগ্ৰেছ কমিটিৰ সভাপতি ৰিপুন বৰাকে কেন্দ্ৰ কৰি ৰাজ্যিক নেতৃত্ব। নতুন দিল্লীত কংগ্ৰেছ চেন্ট্ৰেল কমিটিৰ পুনৰীক্ষণৰ পাছত আজি বিয়লি তিনি বজাৰ পাছত ৰাজীৱ ভৱনত দলটোৱে অসমৰ প্ৰাৰ্থী সকলৰ নামৰ তালিকা প্ৰকাশ কৰাৰ সম্ভাৱনা আছে। কংগ্ৰেছে প্ৰাৰ্থীৰ তালিকা ঘোষণা কৰিলে বি পি এফৰ পাছতে প্ৰাৰ্থী তালিকা ঘোষণা কৰা ৰাজ্যৰ দ্বিতীয়টো দল হ’ব ।
উল্লেখযোগ্য যে, কংগ্ৰেছৰ প্ৰাৰ্থিত্ব প্ৰত্যাশী হাই প্ৰফাইল নেতাসকলৰ ভিতৰত আছে প্ৰাক্তন মুখ্য মন্ত্ৰী তৰুণ গগৈৰ পুত্ৰ গৌৰৱ গগৈ, পৱন সিং ঘাটোৱাৰ, ৰাজ্যসভাৰ সাংসদ ভুৱনেশ্বৰ কলিতা, প্ৰদ্যুত বৰদলৈ আদি। নতুনকৈ কংগ্ৰেছত যোগদান কৰা এম জি কে ভানুৱেও তেজপুৰ সমষ্টিৰ পৰা দলীয় টিকত লাভ কৰা সম্ভাৱনা আছে।
আজি কংগ্ৰেছৰ প্ৰাৰ্থীৰ তালিকা ঘোষণা কৰাৰ পাছত দলটোৱে পূৰ্ণ শক্তিৰে নিৰ্বাচনী প্ৰচাৰ অভিযানত নামি পৰিব বুলি বাতৰি পোৱা গৈছে।
