কাৰিকৰী বিষয়াৰ প্ৰতিবেদন নোহোৱাকৈয়ে প্ৰধানমন্ত্ৰী আৱাস যোজনাৰ গৃহ নিৰ্মাণ অব্যাহত : ৰূপহীহাট উন্নয়ন খণ্ডত জিপিচিৰ দৌৰাত্ম্য

নগাঁও জিলাৰ ৰূপহীহাট উন্নয়ন খণ্ডৰ ১৪ খন গাঁও পঞ্চায়তত ৰূপায়িত হৈ থকা প্ৰধানমন্ত্ৰী আৱাস যোজনা (গ্ৰামীণ) চমুকৈ পিএমৱাই(জি) আচঁনিত ব্যাপক খেলি-মেলি সংঘটিত হোৱাৰ অভিযোগ অতি পুৰণি।

উন্নয়ন খণ্ডটোৰ একাংশ গাঁও পঞ্চায়ত সমন্বয়কে(জিপিচি) চৰকাৰী গাইড লাইন ভংগ কৰি হিতাধিকাৰীৰ পৰা উৎকোচ লোৱাৰ পৰিপ্ৰেক্ষিতত উন্নয়ন খণ্ড এলেকাৰ গৰিষ্ঠ সংখ্যক আৱাস গৃহই বিভাগীয় নিয়ম অনুসৰি সম্পূৰ্ণ হোৱা নাই।

উন্নয়ন খণ্ডটোৰ ভাৰপ্ৰাপ্ত খণ্ড উন্নয়ন বিষয়া হিৰণ্য কুমাৰ চমুৱাই যোগদান কৰাৰ পিছৰে পৰাই ৰহস্যজনক কাৰণত কনিষ্ঠ অভিযন্তা আৰু স্বীকৃতপ্ৰাপ্ত অভিযন্তাক পি এম এ ৱাই (জি) আঁচনি ৰূপায়নৰ পৰা আতঁৰাই ৰখাৰ ফলতেই জিপিচিসকলে নিজৰ খেয়াল খুচি মতে লুণ্ঠন অব্যাহত ৰখা বুলি সচেতন মহলে অভিযোগ উত্থাপন কৰিছে।

ফলত সৌসিদিনা উন্নয়ন খণ্ডটোৰ এলেকাধীন গেৰেকী গাঁও পঞ্চায়তৰ জিপিচি ৰিয়াজুল ইছলামক গ্ৰামোন্নয়ন বিভাগৰ আয়ুক্তই নিজৰ পত্নীৰ বেংক একাউন্টত হিতাধিকাৰীৰ ধন মোকলাই নিয়াৰ অভিযোগ প্ৰমাণিত হোৱাত চাকৰিৰ পৰা বৰ্খাস্ত কৰে।

ইপিনে হাতীপুখুৰী পঞ্চায়তৰ জিপিচি নিপুমনি শইকীয়াই ৩০-৩৫ বছৰীয়া যুৱক-যুৱতীৰ নামত বৃদ্ধ পেঞ্চন দিয়াৰ ফলত বাতৰিৰ শিৰোনাম দখল কৰিছিল। এইগৰাকী জি পি চিয়ে শেষতীয়াকৈ পকী ঘৰ থকা মানুহক পি এম এ ৱাই (জি) গৃহ আবন্টন দিয়াৰ অভিযোগ উঠিছে।

অভিযোগ অনুসৰি হাতীপুখুৰী গাওঁ পঞ্চায়তৰ ঘেহুৱা চলচলি গাঁৱৰ আব্দুল মন্নান নামৰ হিতাধিকাৰীজনৰ ( আই ডি নং-১১২৮৯৭৮) পকীঘৰ থকাৰ পিছতো কেনেদৰে দুটা কিস্তিৰ ধন মোকলাই দিলে সেয়া এক নিৰপেক্ষ তদন্তৰ প্ৰয়োজন বুলি জিলা উপায়ুক্তক অভিযোগ দিয়াৰ যো-জা চলাইছে।

তাৰোপৰি চতুৰ জিপিচি গৰাকীয়ে অন্য মানুহৰ নিৰ্মীয়মান গৃহৰ ফটো জনৈক মন্নান নামৰ হিতাধিকাৰীৰ বিপৰীতে এম আই এছত আপলোড কৰি চৰকাৰৰ শূন্যসহনশীল নীতিক ভেঙুচালি কৰা বুলি জানিব পৰা গৈছে।

আনপিনে ফাকলী গাঁও পঞ্চায়তত পি এম ৱাইৰ গৃহ নিৰ্মাণৰ নামত ব্যাপক খেলিমেলি সংঘটিত হোৱা বুলি পঞ্চায়ত সভানেত্ৰীৰ অভিযোগ আৰু মূখ্য কাৰ্যবাহী বিষয়াৰ প্ৰতিবেদন অনুসৰি গ্ৰামোন্নয়ন আয়ুক্তই জি পি চি ছাদ্দাম হোছেইনক গোলাঘাট জিলাৰ গ্ৰামোন্নয়ন বিভাগৰ মেৰাপানী পঞ্চায়তলৈ শাস্তিমূলক বদলি কৰিছিল।

জি পি চি ছাদ্দামে গ্ৰামোন্নয়ন বিভাগৰ এগৰাকী যুটীয়া সঞ্চালকৰ হতুৱাই পূনৰ ৰূপহীহাটৰ হাতীপাৰালৈ বদলি হৈ অহাত ৰাইজৰ মাজত বিৰূপ প্ৰতিক্ৰিয়াৰ সৃষ্টি হৈছে। চতূৰ ছাদ্দামক ৰূপহীহাটলৈ উভতাই আনিবলৈ গৈ হাতীপাৰাৰ জি পি চি ক মেৰাপানীলৈ বদলি কৰিছে গ্ৰামোন্নয়ন বিভাগে।