প্ৰশ্নঃ আগৰ সময়ত নাৰীসকল লিংগ সমতা বা নিজৰ সম অধিকাৰ সম্পৰ্কে বৰ বেছি সচেতন নাছিল। যাৰ বাবে তেতিয়া নাৰী-পুৰুষৰ সম্পৰ্কবোৰত কঠিনতা নাছিল। কিন্তু লাহে লাহে নাৰীসকল নাৰীবাদী হৈ উঠাৰ লগে লগে নাৰী-পুৰুষৰ বৈবাহিক বা প্ৰেমৰ সম্পৰ্কত কিবা জটিলতা আহি পৰিছে নেকি? মিলাপ্ৰীতি কমিছে নেকি?
(প্ৰশ্নকৰ্তা: অলকেশ বৰকটকী)
উত্তৰঃ এফালৰ পৰা চাবলৈ গ’লে কথাটো নোহোৱা নহয়। কিন্তু কথাটো হৈছে যে ‘আগতে’ লিংগভিত্তিক সমতাৰ কথাটোক লৈ মানুহ সচেতন নাছিল বুলি কোৱাটো টান। কাৰণ ‘আগতে’ শব্দটো এটা অস্পষ্ট শব্দ। আমি যদি ৬০ ৰ দশকলৈ চাওঁ তেন্তে দেখা পাম বৰ্তমান সময়ৰ দৰে সেই সময়ত লিংগ সমতাৰ বিষয়ে মানুহ ইমান বেছি অৱগত নাছিল। কিন্তু লিংগ বৈষম্যৰ বিষয়ে মানুহ কিছু পৰিমাণে সজাগ আছিল। এতিয়া কথাটো হ’ল, লিংগ বৈষম্য সম্পৰ্কে নাৰীৰ মাজত গঢ়ি উঠা সজাগতাই নাৰী-পুৰুষৰ আত্মিক সম্পৰ্কত প্ৰভাৱ পেলাইছে নেকি?
পুৰুষ আৰু নাৰীৰ মাজত থকা সম্পৰ্কটো বিৰোধমূলক সম্পৰ্ক নহয়। নিজৰ অধিকাৰ বা বৈষম্যৰ প্ৰতি সজাগ হ’ল বুলিয়েই যে অনবৰতে কাজিয়া কৰি থাকিব তেনেকুৱা কথা নাই। আমি দেখিছোঁ যে নাৰীয়ে নিজৰ অধিকাৰৰ বাবে কিমান সংগ্ৰাম কৰিবলগীয়া হৈছে। কিন্তু যেতিয়ালৈকে পুৰুষে এই কথাবোৰ বুজি নাপাব তেতিয়ালৈকে এটা বিৰোধ থাকিব। গতিকে সৌহাৰ্দ্যপূৰ্ণ সম্পৰ্কটো নাৰী আৰু পুৰুষ দুয়ো বিচাৰিব লাগিব। দুয়োটা পক্ষই সম অধিকাৰৰ কথাটো গ্ৰহণ কৰিব লাগিব। তেতিয়া নাৰী-পুৰুষৰ সম্পৰ্কত মিলাপ্ৰীতিৰ সমস্যা আৰু বৈষম্যৰ কথাটো নাহে।
((উত্তৰদাতা : অৰিন্দম বৰুৱা)
প্ৰশ্নঃ প্ৰেম সম্পৰ্ক এটাত যদি কোনোৱে মৰম যাচিব বিচাৰে বা নিজেও কিছু ৰোমাণ্টিক বা সহজ হৈ প্ৰেমিকাৰ ওচৰত গৈ আকৌ নানান সন্দেহৰ বলি হৈ মনৰ আনন্দ উল্লাস নাইকিয়া হৈ দুখ মনৰে দিন অতিবাহিত কৰিবলগীয়া হয়… তেন্তে প্ৰেমিকজনে কি কৰা উচিত? কিন্তু একপ্ৰকাৰে সৰু সৰু সন্দেহবোৰ যদি অভিনয় সুৰত প্ৰেমিকজনে কৰিব আৰম্ভ কৰে তেন্তে প্ৰেমিকাই বেয়া মনৰ বা ঠেক মনৰ মানুহ বুলি গালি দিয়ে? এনেকুৱা সম্পৰ্ক মসৃণ আৰু ফলপ্ৰসূ কৰি তোলাৰ কিবা উপায় আছে নে?
(প্ৰশ্নকৰ্তা: কল্যাণ ভূঞা)
উত্তৰঃ প্ৰেম বা ভালপোৱাৰ যিটো ভাব, সেইটোক জোখাৰ কোনো যন্ত্ৰ নাই। কিন্তু গুৰুত্বপূৰ্ণ কথাটো হ’ল এনে সমস্যাৰ ক্ষেত্ৰত আমি চোৱা উচিত যে সম্পৰ্কটো কিহৰ ভিত্তিত কৰি আৰম্ভ হৈছিল। শাৰীৰিক আকৰ্ষণক কেন্দ্ৰ কৰি হৈছিল নেকি? আচলতে সম্পৰ্কত শাৰীৰিক আকৰ্ষণৰ গুৰুত্ব আছে যদিও কেৱল শাৰীৰিক সম্পৰ্কক কেন্দ্ৰ কৰি আৰম্ভ হোৱা সম্পৰ্ক শক্তিশালী নহয়। এতিয়া তোমালোকে তোমালোকৰ প্ৰেমৰ আৰম্ভণিটো কিহক ভিত্তিত কৰি গঢ় লৈ উঠিছিল সেয়া বিচাৰিব লাগিব। সন্দেহ মানুহৰ কিয় হয়? যেতিয়া এজনক ভালপোৱা যায় তেতিয়া ভালপোৱা ব্যক্তিগৰাকীক কেৱল নিজৰ কৰি লোৱাৰ হাবিয়াস থাকে।
নিজৰ প্ৰেমিক বা প্ৰেমিকাক আনৰ লগত কল্পনাও কৰিব নোৱাৰি। সেই ভাবটোৰ বাবেই সন্দেহৰ সৃষ্টি হয়। গতিকে তোমালোকে তোমালোকৰ সম্পৰ্কটোৰ আৰম্ভণি হোৱাৰ ভিত্তিটো কি আছিল সেয়া চাব লাগিব। তাৰ পিছত তোমালোকে কেনেদৰে কথা-বতৰা পাতিছা, কি কৰিছা সেয়া লক্ষ্য কৰিব লাগিব। তুমি মোৰ এই কথাখিনিৰ উত্তৰ দিলে মই আৰু বহলকৈ কথাখিনি ক’ব পাৰিম।
(উত্তৰদাতা : অৰিন্দম বৰুৱা)
