ৰে’লৰ এচি কম্পাৰ্টমেণ্টত যাত্ৰা কৰিছিল এহাল দম্পতীয়ে। অভিযোগ অনুসৰি ৰে’লখনৰ পৰা নগদ ধন আৰু সোণৰ গহনা থকা এটা বেগ চুৰি হয়। বেগটোত সোণৰ মংগলসূত্ৰও আছিল। ৫ বছৰ পূৰ্বে এই ঘটনাত গ্ৰাহক সুৰক্ষা আয়োগত গোচৰ তৰিছিল দম্পতীহালে। সেই গোচৰত পঞ্জাৱৰ পাঠানকোটৰ গ্ৰাহক সুৰক্ষা আয়োগে ভাৰতীয় ৰে’লৱেক ৮০ হাজাৰ টকা ক্ষতিপূৰণ দিবলৈ নিৰ্দেশ দিছে।
গোচৰৰ বিবৰণ অনুসৰি ২০২১ চনত এই ঘটনাৰ সূত্ৰপাত। ১৪ ডিচেম্বৰত পঞ্জাৱৰ বাসিন্দা দম্পতীহালে সন্তানৰ সৈতে ডিব্ৰুগড়-নতুন দিল্লী ৰাজধানী এক্সপ্ৰেছত যাত্ৰা কৰিছিল। তেওঁলোকৰ হাতত থাৰ্ড ক্লাছ এচি কম্পাৰ্টমেণ্টৰ টিকট আছিল।
অভিযোগ অনুসৰি ট্ৰেইনৰ ভিতৰৰ পৰা তেওঁলোকৰ এটা হেণ্ডবেগ চুৰি হৈছিল। সেই বেগটোত প্ৰায় ১৫ গ্ৰাম ওজনৰ সোণৰ মংগলসূত্ৰ এডাল আছিল। ইয়াৰ বাহিৰেও নগদ পাঁচ হাজাৰ টকা আৰু বেংকৰ পাছবুক আছিল।
ঘটনাৰ পিছতে তেওঁলোকে এই সমগ্ৰ বিষয়টো আৰ পি এফ আৰু টি টি ইক অৱগত কৰে। দিল্লী পোৱাৰ লগে লগে তেওঁলোকে জিৰ’ এফআইআৰ দাখিল কৰে আৰু পিছত গ্ৰাহক সুৰক্ষা আয়োগৰ ওচৰত ৰে’লৱেৰ বিৰুদ্ধে অভিযোগ দাখিল কৰে। গোচৰৰ সময়ত উত্তৰ ৰে’লৱেই দাবী কৰিছিল যে ষ্টেচনত এজাহাৰ সময়মতে দাখিল কৰা হোৱা নাছিল।
অৱশ্যে অভিযোগকাৰীয়ে অভিযোগৰ তথ্য আৰ পি এফ আৰু টি টি ইক দিছিল। ইয়াৰ লগতে পৰিয়ালটোৱে নতুন দিল্লী ষ্টেচনত দাখিল কৰা জিৰ’ এফআইআৰৰ তথ্যও দাখিল কৰে। আনহাতে, আয়োগে সেইদিনা কোচ এটেণ্ডেণ্ট আৰু ৰে’লৰ আৰ পি এফৰ ডিউটি ৰষ্টাৰৰ কপি বিচাৰিছিল যদিও ৰে’লৱেই জমা দিব নোৱাৰিলে।
এই গোচৰৰ ৰায়দানত আয়োগে উত্তৰ ৰে’লৱেক দোষী সাব্যস্ত কৰে। আয়োগৰ সভাপতি কুলৱিন্দৰ সিং পান্নু আৰু আয়োগৰ সদস্য ৰাজকুমাৰ শুক্লাইও কয় যে ৰে’লৱেই পৰিয়ালটোক উপযুক্ত সুৰক্ষা আৰু সেৱা আগবঢ়োৱা নাছিল। এই ক্ষেত্ৰত ৰে’লৱেক হেৰুৱা সামগ্ৰীৰ ক্ষতিপূৰণ হিচাপে ৭০ হাজাৰ টকা আৰু পৰিয়ালৰ মানসিক হাৰাশাস্তিৰ বাবে ১০ হাজাৰ টকা দিবলৈ নিৰ্দেশ দিয়া হৈছে।
