এদিন আগতেই যি ইংগিত পোৱা গৈছিল আৰু সেই পথেই অৱলম্বন কৰিলে কেন্দ্ৰীয় চৰকাৰে। বিতৰ্কিত এফ চি আৰ এ (FCRA) বিধেয়কখন গৃহীত কৰাত কোনো ধৰণৰ খৰখেদা নকৰি মোদী চৰকাৰে ইয়াক যুটীয়া সংসদীয় সমিতিলৈ প্ৰেৰণ কৰে। বিৰোধীয়ে বিচাৰিছিল যে এই বিধেয়কখন সম্পূৰ্ণৰূপে প্ৰত্যাহাৰ কৰা হওক। কিন্তু সেই দাবী মানি নলৈ বিধেয়কখনৰ ওপৰত অধিক আলোচনাৰ বাবে ইয়াক যুটীয়া সংসদীয় সমিতিলৈ প্ৰেৰণ কৰাৰ সিদ্ধান্ত লয় কেন্দ্ৰই।
বুধবাৰে লোকসভাত বিধেয়কখন যুটীয়া সংসদীয় সমিতিলৈ প্ৰেৰণ কৰাৰ বাবে এক প্ৰস্তাৱ উত্থাপন কৰে সংসদীয় পৰিক্ৰমা মন্ত্ৰী কিৰেণ ৰিজিজুৱে। লগে লগে সমগ্ৰ বিৰোধী শিবিৰে ইয়াৰ বিৰোধিতা কৰে। অখিলেশ যাদৱে স্পষ্টকৈ কয় যে সমগ্ৰ বিৰোধী শিবিৰে এই বিধেয়কখন প্ৰত্যাহাৰ কৰাটো বিচাৰে আৰু ইয়াক যিকোনো প্ৰকাৰে প্ৰত্যাহাৰ কৰিবই লাগিব। সদনত অখিলেশ আৰু ৰিজিজুৰ মাজত তীব্ৰ বাকবিতণ্ডাও হয়। অখিলেশে অভিযোগ কৰে যে এই চৰকাৰে যিমানবোৰ বিধেয়ক আনিছে সকলোবোৰ সংখ্যালঘু বিৰোধী। ইয়াৰ প্ৰত্যুত্তৰত ৰিজিজুৱে প্ৰত্যাহ্বান জনাই কয় যে এই বিধেয়কখনত এনে এটা চৰ্ত দেখুৱাওক যিটো পোনে পোনে সংখ্যালঘু বিৰোধী। এই বাকবিতণ্ডাৰ মাজতেই ধ্বনি ভোটত প্ৰস্তাৱটো গৃহীত হৈ যায়। অৰ্থাৎ বিধেয়কখন এতিয়া যুটীয়া সংসদীয় সমিতিৰ মজিয়ালৈ গ’ল।
চলিত বৰ্ষৰ ২৫ মাৰ্চত সংসদত বিধেয়কখন উত্থাপন কৰা হৈছিল যদিও ইয়াৰ ওপৰত এতিয়ালৈকে কোনো আলোচনা হোৱা নাছিল। দৰাচলতে বিধেয়কখন সংসদত উত্থাপন হোৱাৰ পিছৰে পৰা বিৰোধী দলসমূহে ইয়াৰ কেইটামান ধাৰাক লৈ তীব্ৰ আপত্তি দৰ্শাই আহিছে। প্ৰস্তাৱিত সংশোধনী অনুসৰি, যদি কোনো সংস্থা বা ব্যক্তিয়ে বিদেশী অনুদান গ্ৰহণৰ অনুমতি বা লাইচেন্স হেৰুৱায়, তেন্তে তেওঁলোকে নিৰ্মাণ কৰা সম্পত্তি যেনে স্কুল, চিকিৎসালয় বা উপাসনাস্থলী এক নিৰ্দিষ্ট কৰ্তৃপক্ষৰ হাতলৈ গুচি যাব পাৰে। আটাইতকৈ উদ্বেগজনক বিষয়টো হ’ল এই সমগ্ৰ প্ৰক্ৰিয়াটো প্ৰায় স্বয়ংক্ৰিয়ভাৱে হ’ব, য’ত কোনো ন্যায়াধীশৰ পৰ্যালোচনাৰ সুবিধা নাথাকিব। এইখিনিতেই বিৰোধী দলসমূহৰ মূল আপত্তি।
আনহাতে কেন্দ্ৰীয় চৰকাৰৰ বক্তব্য হ’ল যে দেশৰ স্বাৰ্থতেই এই বিধেয়কখন অনা হৈছে, যাতে বিদেশী ধন ভাৰতত সন্ত্ৰাসবাদী কাৰ্যকলাপ আৰু বিচ্ছিন্নতাবাদী কামত ব্যৱহাৰ কৰিব পৰা নাযায়। চৰকাৰে স্পষ্ট কৰি দিছে যে জনকল্যাণৰ বাবে বিদেশী ধন পোৱাত তেওঁলোকে কোনো ধৰণৰ বাধা সৃষ্টি কৰা নাই। যোৱা কেইবাদিনো ধৰি কেথলিক চাৰ্চৰ লগতে ইয়াৰ লগত জড়িত বিভিন্ন অংশীদাৰসকলৰ সৈতে খোদ অমিত শ্বাহে বৈঠকত মিলিত হৈছে। সকলো ধৰ্মীয় সংস্থাক বুজোৱা হৈছে যে এই বিধেয়কখনত আপত্তি কৰিবলগীয়া একো নাই। আমেৰিকা আৰু জাৰ্মানীকে ধৰি যিবোৰ দেশে এই বিধেয়কখনক লৈ উদ্বেগ প্ৰকাশ কৰিছিল, তেওঁলোককো নতুন দিল্লীয়ে উচিত উত্তৰ দিছে।
