অসমৰ ৫টা সমষ্টিৰ উপ নিৰ্বাচনৰ ভোটগণনা আৰম্ভ; পোষ্টেল বেলটৰে আৰম্ভ কৰা হৈছে গণনা

By-Election-2021 Counting Starts অসমৰ পাঁচটা সমষ্টি ক্ৰমে মৰিয়নি, থাওৰা, ভৱানীপুৰ, গোসাইগাঁও আৰু তামুলপুৰৰ উপ নিৰ্বাচনৰ ভোটগণনা সংশ্লিষ্ট ভোটগণনা কেন্দ্ৰসমূহত ইতিমধ্যে আৰম্ভ হৈছে। আজি পুৱা ৮ বজাৰ পৰা আৰম্ভ হৈছে ভোটগণনা।

সম্পূৰ্ণ কটকটীয়া নিৰাপত্তা ব্যৱস্থাৰ মাজত আৰম্ভ কৰা হৈছে ভোটগণনা প্ৰক্ৰিয়া। প্ৰথমতে পোষ্টেল বেলটৰ গণনা আৰম্ভ কৰা হৈছে।

প্রতিটো সমষ্টিৰ বাবে গণনা কৰা প্রতিটো ৰাউণ্ডৰ ফলাফলসমূহ নির্বাচন আয়োগৰ ৱেৱছাইট https://results.eci.gov.in যোগে উপলব্ধ হ’ব৷ ‘ভোটাৰ হেল্পলাইন’ ম’বাইল এপযোগেও এই ফল উপলব্ধ হ’ব৷ এই এপ গুগল প্লে ষ্ট’ৰ আৰু এপ’ল এপ ষ্ট’ৰৰ পৰা ডাউনল’ড কৰিব পাৰিব৷

এই নিৰ্বাচনত বিভিন্ন দলৰ মুঠ ৩১গৰাকী প্ৰাৰ্থীয়ে প্ৰতিদ্বন্দ্বিতা আগবঢ়াইছে। পাঁচটা সমষ্টিত সামগ্ৰিক ভোটদানৰ হাৰ হৈছে ৭৩.৩৮ শতাংশ।

তামুলপুৰ সমষ্টিত সৰ্বনিম্ন ৬৭.৮৮ শতাংশ ভোটদান হোৱাৰ লগতে ভৱানীপুৰ সমষ্টিত সৰ্বাধিক ৭৮ শতাংশ ভোটদান হয়। থাওৰা সমষ্টিত ৭৫.০৭ শতাংশ, গোঁসাইগাঁও সমষ্টিত ৭৭.৩৭ শতাংশ ভোটদান হয়। সেইদৰে,মৰিয়নি সমষ্টিত ৬৯.৮১ শতাংশ ভোটদান হয়।

উপ নিৰ্বাচনত মৰিয়নি সমষ্টিত বিজেপিৰ ৰূপজ্যোতি কুৰ্মী, কংগ্ৰেছৰ লোহিত কোঁৱৰ, অসম সংগ্ৰামী মঞ্চৰ গোপাল চন্দ্ৰ ঘাটোৱাৰ আৰু সঞ্জীৱ গগৈয়ে নিৰ্দলীয় প্ৰাৰ্থী হিচাপে প্ৰতিদ্বন্দ্বিতা আগবঢ়াইছে।

ভৱানীপুৰত বিজেপিৰ ফনীধৰ তালুকদাৰৰ লগতে কংগ্ৰেছৰ শৈলেন্দ্ৰ নাথ দাস, এআইইউডিএফৰ জব্বৰ আলী, নেশ্যনেল ৰোডমেপ পাৰ্টি অফ ইণ্ডিয়াৰ মেৰাজুল হক, ভোটাৰ্ছ পাৰ্টি ইন্টাৰনেশ্যনেলৰ শিবেন দাসৰ উপৰি চৌকত আলী আহমেদ, খাম্ফা খুংগুৰ গয়াৰী আৰু আৰিফুল ইছলামে নিৰ্দলীয় প্ৰাৰ্থী হিচাপে প্ৰতিদ্বন্দ্বিতা আগবঢ়াইছে।

থাওৰাত বিজেপিৰ সুশান্ত বৰগোঁহাইৰ উপৰি প্ৰতিদ্বন্দ্বিতা আগবঢ়াইছে কংগ্ৰেছৰ মনোৰঞ্জন কোঁৱৰ, চিপিআইৰ কৃষ্ণ গগৈ আৰু নিৰ্দলীয় হিচাপে ধৈৰ্য কোঁৱৰ আৰু লোহিত গোৱালাই।

তামুলপুৰত বিজেপি সমৰ্থিত ইউপিপিএলৰ জলেন দৈমাৰী, কংগ্ৰেছৰ ভাস্কৰ দাহাল, গণ সুৰক্ষা পাৰ্টিৰ ব্ৰজেন্দ্ৰ নাথ ডেকা, ভিপিআইৰ ৰাজ কুমাৰ বড়োৰ উপৰি গনেশ কছাৰী আৰু যোশৱান্ত চৌহানে নিৰ্দলীয় প্ৰাৰ্থী হিচাপে প্ৰতিদ্বন্দ্বিতা কৰিছে।

সেইদৰে, গোঁসাইগাঁওত বিপিএফৰ ধ্ৰুৱ কুমাৰ ব্ৰহ্ম নাৰ্জাৰী, ইউপিপিএলৰ জিৰন বসুমতাৰী, কংগ্ৰেছৰ জুৱেল টুডু, এআইইউডিএফৰ খাইৰুল আনম খণ্ডকাৰৰ উপৰি উত্তম কুমাৰ তালুকদাৰ, কমল ৰায়, ওচমান গনি এছ কে আৰু আব্দুল হাছেম আকণ্ডে নিৰ্দলীয় প্ৰাৰ্থী হিচাপে প্ৰতিদ্বন্দ্বিতা কৰিছে।