পঞ্জাৱ নেশ্যনেল বেংকৰ ২৩ হাজাৰ কোটি টকাৰ জালিয়াতিৰ গোচৰৰ মূল অভিযুক্ত মেহুল চোক্সিৰ সৈতে জড়িত ১৩টা সম্পত্তি নিলামৰ নিৰ্দেশ দিছে মুম্বাইৰ এখন বিশেষ আদালতে। এই নিলামৰ পৰা পোৱা ধন বিশেষ আদালতৰ নামত ফিক্সড ডিপ’জিট হিচাপে সংৰক্ষিত ৰাখিব লাগে বুলি আদালতে কয়।
আদালতৰ ৪ নৱেম্বৰৰ নিৰ্দেশ অনুসৰি গীতাঞ্জলি জেমছ লিমিটেডৰ এই সম্পত্তিৰ মূল্য প্ৰায় ৪৬ কোটি টকা বুলি অনুমান কৰা হৈছে। ইয়াৰ ভিতৰত বৰিভলীৰ চাৰিটা ফ্লেট (প্ৰায় ২.৬ কোটি টকা), এটা বাণিজ্যিক ইউনিট আৰু বান্দ্ৰা-কুৰ্লা কমপ্লেক্সৰ ভাৰত ডাইমণ্ড বৌৰ্ছ ভৱনত ১৪টা পাৰ্কিং স্থান (প্ৰায় ১৯.৭ কোটি টকা), গুৰগাঁও পূৱৰ ৬টা উদ্যোগিক উদ্যান আৰু উদ্যোগ নগৰৰ আন এখন উদ্যান। এই তালিকাত জয়পুৰৰ এটা কাৰখানাৰ ৰূপৰ ইটা, অৰ্ধ মূল্যবান শিল আৰু যন্ত্ৰপাতিও সন্নিবিষ্ট কৰা হৈছে। এই সম্পত্তিসমূহৰ মূল্যায়ন ২০১৮ চনত কৰা হৈছিল।
আদালতে স্পষ্ট কৰি দিয়ে যে এতিয়াৰ বাবে কেৱল অসুৰক্ষিত সম্পত্তিহে নিলাম কৰিব পাৰি, যিবোৰ কোনো নিৰাপদ পাওনাদাৰে দাবী কৰা নাই। অৱশ্যে এই নিলামৰ পৰা পোৱা ধনৰ মালিকীস্বত্ব আৰু বাজেয়াপ্ত কৰাৰ সিদ্ধান্ত গোচৰটোৰ ৰায় ঘোষণাৰ পিছতহে লোৱা হ’ব।
আদালতৰ নিৰ্দেশত কোৱা হৈছে, “গীতঞ্জলি জেমছ আৰু সংশ্লিষ্ট লিকুইডেটৰসকলে নিলামৰ পৰা পোৱা ধন বিশেষ আদালতৰ নামত স্থায়ী জমা হিচাপে আইচিআইচিআই বেংকত জমা কৰিব লাগিব। নিলামৰ খৰচ বাদ দি বাকী থকা ধনৰাশি আদালতৰ সপক্ষে এফডিৰ ৰূপত ৰখা হ’ব।”
মন কৰিবলগীয়া যে পিএনবি কেলেংকাৰিৰ এনফৰ্চমেণ্ট ডাইৰেক্টৰেট (ইডি)ৰ তদন্তৰ অন্যতম মূল সংস্থা গীতাঞ্জলি জেমছ লিমিটেড। ইতিমধ্যে মেহুল চোক্সিক ‘পলাতক অৰ্থনৈতিক অপৰাধী’ হিচাপে ঘোষণা কৰা হৈছে।
শেহতীয়াকৈ বেলজিয়ামৰ এখন আদালতে চোক্সিক ভাৰতলৈ প্ৰত্যাৰ্পণৰ অনুমতি প্ৰদান কৰিছে। আদালতৰ মতে, তেওঁৰ বিৰুদ্ধে উত্থাপিত অভিযোগ যথেষ্ট গুৰুতৰ – যেনে অপৰাধচক্ৰত চামিল, জালিয়াতি, দুৰ্নীতি আৰু জাল নথি-পত্ৰ ব্যৱহাৰ। যদিও ভাৰতীয় দণ্ডবিধিৰ ২০১ ধাৰাত ‘প্ৰমাণ ধ্বংস’ৰ অভিযোগ বেলজিয়ামত স্বীকৃতি দিয়া হোৱা নাই, আদালতে কয় যে সেই নিৰ্দিষ্ট ধাৰাত প্ৰত্যাৰ্পণৰ অনুমতি দিয়া নহ’ব। অৱশ্যে চোকচিয়ে ইতিমধ্যে এই ৰায়ৰ বিৰুদ্ধে বেলজিয়ামৰ উচ্চতম ন্যায়ালয়ত আবেদন জনাইছে।
দৰাচলতে ২০১৮ চনত প্ৰথম পিএনবি কেলেংকাৰী পোহৰলৈ আহিছিল। সেই গোচৰত মেহুল আৰু নীৰৱৰ বাহিৰেও পিএনবিৰ একাংশ কৰ্মচাৰী আৰু বিষয়া জড়িত আছিল। সমগ্ৰ দেশতে চাঞ্চল্যৰ সৃষ্টি হৈছিল। কেলেংকাৰী কেনেকৈ সংঘটিত হ’ল? অভিযোগ অনুসৰি বেংকৰ দুই এজন কৰ্মচাৰীৰ সহায়ত নীৰৱ আৰু তেওঁৰ মোমায়েক মেহুলে বেংকৰ পৰা কোটি কোটি টকা আত্মসাৎ কৰে। মুম্বাই আদালতত অৱস্থিত পিএনবিৰ ব্ৰেডী হাউছ শাখাত সংঘটিত হৈছে এই অপৰাধ।
তাৰ পৰাই বিভিন্ন বিদেশী কোম্পানীৰ নামত ভুৱা ‘Letters of Undertaking (LoU)’ জাৰি কৰি বিপুল পৰিমাণৰ ঋণ লোৱা হ’ল! বিদেশী বেংকৰ পৰা ঋণ ল’বলৈ হ’লে ভাৰতীয় বেংকৰ পৰা এল অ’ ইউ জাৰি কৰাটো প্ৰয়োজনীয় আছিল।
