তামিলনাডুৰ ১৯ বছৰীয়া ব্ৰাহ্মণ সম্প্ৰদায়ৰ কইনা গৰাকীয়ে তেওঁৰ ৩৫ বছৰীয়া দলিত সম্প্ৰদয়াৰ বিধায়ক স্বামীৰ সৈতে থাকিব পাৰিব। আজি মাদ্ৰাজ উচ্চ ন্যায়ালয়ে এই ৰায় প্ৰদান কৰে।
উল্লেখ্য যে তামিলনাডুৰ এগৰাকী দলিত সম্প্ৰদায়ৰ AIADMKৰ বিধায়ক এ প্ৰভুৱে ব্ৰাহ্মণ সম্প্ৰদায় তথা এটা মন্দিৰৰ পৰোহিত স্বামীনাথনৰ ১৯ বছৰীয়া কন্যা সৌন্দৰ্য্যাৰ সৈতে যোৱা সোমবাৰে বিবাহপাশত আৱদ্ধ হৈছিল।
এই বিবাহ ৰাজহুৱা হোৱাৰ লগে লগে কন্যাগৰাকীৰ পিতৃয়ে দলিত বিধায়কজনে তেওঁৰ কন্যাক অপহৰণ কৰি নি ফলুচুলাই বিয়া কৰোৱা বুলি আৰক্ষীৰ ওচৰত অভিযোগ দাখিল কৰিছিল।
ইফালে দলিত সম্প্ৰদায়ৰ বিধায়কজনে এই অভিযোগ খণ্ড কৰি কৈছিল যে তেওঁ যুৱতীগৰাকীৰ সৈতে প্ৰেমাপাশত আৱদ্ধ হৈহে বিয়া কৰোৱাইছিল আৰু এই বিবাহত যুৱতী গৰাকীৰ সন্মতি আছে।
লগতে পঢ়ক : ১৯ বছৰীয়া ব্ৰাহ্মণ তৰুণীৰে দলিত বিধায়কৰ বিবাহ : আত্মহত্যাৰ ভাবুকি যুৱতীৰ পিতৃৰ
আনকি বিধায়কজনৰ মতে তেওঁ দলিত সম্প্ৰদায়ৰ হোৱাৰ বাবেই কন্যাগৰাকীৰ পিতৃ স্বামীনাথনে এই বিয়াত সন্মতি প্ৰদান কৰা নাছিল।
কিন্তু পিতৃ গৰাকীয়ে এই অভিযোগ খণ্ডন কৰি আৰক্ষীক এই সন্দৰ্ভত বিহিত ব্যৱস্থা গ্ৰহণ কৰিবলৈ সকিয়নী দি আত্মতহ্যা কৰাৰো ভাবুকি প্ৰদান কৰিছিল।
স্বমীনাথনে তেওঁৰ কন্যা আৰু বিধায়ক গৰাকীৰ মাজৰ বয়সৰ বিস্তৰ ব্যৱধানৰ বাবে আপত্তি কৰা বুলি আৰক্ষীক জনাইছিল।
কন্যা গৰাকীৰ পিতৃৰ স্বামীনাথনৰ অটল স্থিতিৰ বাবে সমগ্ৰ ঘটনাটোৱে মাদ্ৰাজ উচ্চ ন্যায়ালয়ৰ মজিয়াত পায়গৈ।
“প্ৰভুৱে মোৰ কন্যাৰ সৈতে যোৱা চাৰি বছৰ ধৰি প্ৰেম কৰি আহিছে, যেতিয়া তাই নাবালিকা আছিল। তাই মোৰ নিয়ন্ত্ৰণৰ বাহিৰলৈ গুচি গৈছিল।” আদালতত পিতৃ স্বামীনাথনে অভিযোগ কৰি এইদৰে কয়।
এই অভিযোগ খণ্ড কৰি দলিত বিধায়ক প্ৰভুৱে কয়, “যেতিয়া মই ৩০ বছৰীয়া আছিলো তেতিয়া মই ৰাজনীতিত ব্যস্ত আছিলো। লকডাউনৰ সময়তহে তেওঁ(পত্নী সৌন্দৰ্য্যা)ৰ সৈতে আন্তৰিকতা বৃদ্ধি পাইছিল আৰু আমি তেতিয়াহে প্ৰেমাপাশত আৱদ্ধ হৈছো। হয় মোৰ পত্নীক মই কিছু বছৰৰ পৰা ভালকৈ চিনি পাওঁ। তেওঁ মোক বিশ্বাস কৰে, মোৰ সফলতাত তেওঁৰ অৱদান থকাৰ লগতে মোৰ সফলতাৰ বাবে তেওঁ প্ৰাৰ্থনা কৰে। মই ভাবো কোনো ৰাজনৈতিক শক্তিয়ে তেওঁক আমাৰ বিৰুদ্ধে উচতাইছে।”
দুয়ো পক্ষৰ যুক্তি শুনাৰ পিছতে মাদ্ৰাজ উচ্চ ন্যায়ালয়ে স্বামীনাথনৰ কন্যা সৌন্দৰ্য্যাক তেওঁৰ স্বামী তথা দলিত বিধায়ক এ প্ৰভুৰ সৈতে থাকিবলৈ ৰায় দিয়ে।