দিল্লী উচ্চ ন্যায়ালয়ত সংঘটিত হৈছে এক লজ্জাজনক ঘটনা। আদালত ভাৰ্চুৱেল শুনানি চলি থকাৰ সময়তে কম্পিউটাৰৰ স্ক্ৰীণত ভাঁহি আহে অশ্লীল ছবিৰ দৃশ্য। যাৰ বাবে আধাতে বন্ধ কৰিবলগা হয় শুনানি।
এই সমগ্ৰ ঘটনাটো মুখ্য ন্যায়াধীশ দেৱেন্দ্ৰ কুমাৰ উপাধ্যায় আৰু ন্যায়াধীশ তেজস কাৰিয়াৰ বিচাৰপীঠৰ সন্মুখত সংঘটিত হৈছে। দিনৰ প্ৰায় ১২ বাজি ৫৬ মিনিটত যেতিয়া এখন ৰাজহুৱা স্বাৰ্থজড়িত আৱেদনৰ শুনানি চলি আছিল, তেতিয়াই হঠাৎ পৰ্দাত অত্যন্ত আপত্তিজনক দৃশ্য আৰু শব্দ ভাঁহি আহে। কেৱল দৃশ্যই নহয়, সেই সময়ত এটা যন্ত্ৰচালিত কণ্ঠস্বৰো বাৰে বাৰে শুনা গৈছিল যিয়ে আদালতৰ লোকসকলক কৈছিল যে আপোনালোকৰ ব্যৱস্থাটো হেক কৰা হৈছে।
পৰিস্থিতি বিষম হোৱা যেন দেখি আদালতৰ কৰ্মচাৰীসকলে লগে লগে ভিডিঅ’ সংযোগটো বিছিন্ন কৰি দিয়ে। অলপ সময়ৰ পাছত যেতিয়া শুনানি পুনৰ আৰম্ভ কৰিবলৈ চেষ্টা কৰা হৈছিল, তেতিয়াও একেই সমস্যাৰ সৃষ্টি হয়।
জানিব পৰা মতে, এজন লোকে এটি বিশেষ নামৰ আইডি ব্যৱহাৰ কৰি পুনৰবাৰ অশ্লীল ছবি চলাই দিছিল। এনেদৰে বাৰে বাৰে কামত বাধা পৰাৰ বাবে অৱশেষত সম্পূৰ্ণ শুনানি প্ৰক্ৰিয়াটোৱেই বন্ধ কৰি দিবলগীয়া হয়।
বুধবাৰৰ দিনটো যিহেতু ৰাজহুৱা স্বাৰ্থজড়িত গোচৰৰ বাবে নিৰ্ধাৰিত আছিল, সেয়েহে সেইদিনা প্ৰায় এশখন গোচৰৰ তালিকা আছিল। এই আকস্মিক বিঘিনিৰ বাবে আদালতলৈ অহা অধিবক্তা আৰু সাধাৰণ মানুহবোৰে যথেষ্ট সমস্যাৰ সন্মুখীন হয়। এই ঘটনাটোক দিল্লী উচ্চ ন্যায়ালয়ৰ প্ৰশাসনে অতি গুৰুত্বসহকাৰে লৈছে আৰু ইতিমধ্যে আৰক্ষীক অভিযোগ দাখিল কৰিছে।
বৰ্তমান দিল্লী আৰক্ষীৰ বিশেষ চাইবাৰ শাখাই এই বিষয়টোৰ তদন্ত আৰম্ভ কৰিছে। এয়া কোনো চাইবাৰ আক্ৰমণ নে কোনো লোকে জানি বুজি এই কাণ্ড সংঘটিত কৰিছে, সেইটো এতিয়া পৰীক্ষা কৰি থকা হৈছে। ন্যায়ালয়ৰ দৰে এক পবিত্ৰ স্থানত ঘটা এই ঘটনাই সমগ্ৰ দেশজুৰি চাঞ্চল্যৰ সৃষ্টি কৰিছে আৰু ডিজিটেল সুৰক্ষা ব্যৱস্থাক লৈও প্ৰশ্ন উত্থাপন কৰিছে।
