মেঘালয়ৰ ক’ৰ’না আক্ৰান্ত ৰোগী এগৰাকী ১৪ দিনৰ নিৰীক্ষণত থকাৰ পাছত কৰা প্ৰথমটো পৰীক্ষাত ফলাফল নিগেটিভ অহাৰ পাছত পুনৰ তৃতীয়টো পৰীক্ষাত ফলাফল পজিটিভ অহাক লৈ চিন্তিত হৈ পৰিছে চিকিৎসাকৰ্মী সকল।
দেওবাৰে ৰোগী গৰাকীৰ দ্বিতীয়টো পৰীক্ষাটো ফলাফল পজিটিভ আহিছিল।
ইয়াৰ পাছত মঙলবাৰে কৰা তৃতীয়টো পৰীক্ষাটো ৰোগী গৰাকীক পুনৰ পজিটিভ পোৱা যায়।
‘‘পজিটিভ ৰোগী গৰাকীক তৃতীয় বাৰৰ পৰীক্ষাতো পুনৰ পজিটিভ পোৱা গৈছে। প্ৰথমবাৰ পৰীক্ষাত তেওৰ ফলাফল নিগেটিভ আহিছিল। তিনি দিনৰ অন্তত পুনৰ আক্ৰান্ত ৰোগী গৰাকীক চতুৰ্থবাৰৰ বাবে পৰীক্ষা কৰা হ’ব,’’ মঙলবাৰে ৰাজ্যখনৰ স্বাস্থ্য সেৱাৰ সঞ্চালক ড০ এ ৱাৰে কয়।
আনহাতে, তৃতীয়টো পৰীক্ষাত ৰোগী গৰাকীক ক’ৰ’না পজিটিভ পালেও তেওঁৰ স্বাস্থ্য বৰ্তমান সুস্থ অৱস্থাতে আছে বুলি চিকিৎসা কৰ্মী সকলে প্ৰকাশ কৰিছে।
মেঘালয়ত পূৰ্বে ১২ গৰাকী লোক ক’ৰ’নাত আক্ৰান্ত হৈছিল। প্ৰথম গৰাকী ৰোগীৰ মৃত্যু হোৱাৰ বিপৰীতে আন ১০ গৰাকী ক’ৰ’না আক্ৰান্ত বৰ্তমান সম্পূৰ্ণ ৰূপে আৰোগ্য হৈ উঠিছে।
ক’ৰ’নাত আক্ৰান্ত হোৱা ব্যক্তি সকলক চিকিৎসাৰ অন্তত বিশ্ব স্বাস্থ্য সংস্থা আৰু কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰ্যালয়ৰ নিৰ্দেশ অনুসৰি তিনি দিনৰ অন্তৰে অন্তৰে পৰীক্ষা কৰা হয়।
