দীৰ্ঘদিনীয়া অপেক্ষাৰ অন্তত আজিৰে পৰা দেশত ১৫-১৮ বছৰৰ কিশোৰ কিশোৰী সকলৰ টিকাকৰণ কাৰ্যসূচী শুভাৰম্ভ কৰা হৈছে ।
৭ দিনত সম্পূৰ্ণ কৰিব লগা এই টিকাকৰণ প্ৰদান প্ৰক্ৰিয়াত বিদ্যালয় সমুহৰ ছাত্ৰ ছাত্ৰী সকলেও গ্ৰহণ কৰিছে ভেকচিন ।
সকলো জিলাৰ উপায়ুক্তলৈ স্বাস্থ্য মন্ত্ৰীৰ নিৰ্দেশ অনুসৰি বিশ্বনাথত এতিয়া ব্যস্ত হৈ পৰিছে স্বাস্থ্য কৰ্মী সকল । বিশ্বনাথৰ The East Indian School ৰ ১৫-১৮ বছৰ বয়সৰ ছাত্ৰ ছাত্ৰী সকলক আজি প্ৰদান কৰা হৈছে ভেকচিন ।
চৰকাৰৰ তথা স্বাস্থ্য বিভাগৰ এই বিশেষ প্ৰচেষ্টাক শলাগ লৈছে বিদ্যালয় কৰ্তৃপক্ষই।
কোকৰাঝাৰতো ১৫ বছৰৰ পৰা ১৮ বছৰ বয়সৰ শিক্ষাৰ্থীক ক’ভিডৰ টিকাকৰণ কাৰ্যসূচীৰ শুভাৰম্ভ কৰে বি টি আৰ প্ৰধান প্ৰমোদ বড়োই।
কোকৰাঝাৰ বিজ্ঞান মহাবিদ্যালয়ত টিকাকৰণ কাৰ্যসূচী আনুষ্ঠানিক ভাবে আজি উদ্ধোধন কৰা কাৰ্যসূচীত সংগ দিয়ে বি টি আৰ স্বাস্থ্য বিভাগৰ কাৰ্যবাহী সদস্য অৰুপ কুমাৰ দেই। প্ৰথম দিনা বিদ্যালয়খনত ২০০ গৰাকী ছাত্ৰ-ছাত্ৰীক কভিড ভেকচিন প্ৰদানৰ ব্যৱস্থা কৰিছে স্বাস্থ্য বিভাগে ।
৯ জানুৱাৰীৰ ভিতৰত ১৫ বছৰৰ পৰা ১৮ বছৰৰ মুঠ পঞ্চাশ হেজাৰ ছাত্ৰ-ছাত্ৰীক ভেকচিন প্ৰদানৰ কাম সম্পন্ন কৰাৰ প্ৰচেষ্টা হাতত লৈছে জিলা স্বাস্থ্য বিভাগে ।