উজনি অসমৰ ভয়াবহ বান পৰিস্থিতিক ‘ৰাষ্ট্ৰীয় দুৰ্যোগ’ বা ‘National Disaster/Calamity of Severe Nature’ হিচাপে ঘোষণা কৰা, বানপানীৰ স্থায়ী সমাধানৰ ব্যৱস্থা কৰা আৰু বানপীড়িত লোকক অধিক সাহায্য প্ৰদানৰ দাবীত মুখ্যমন্ত্ৰী হিমন্ত বিশ্ব শৰ্মাক সাক্ষাৎ কৰিলে চিপিআই(এম)-ৰ অসম ৰাজ্যিক কমিটিৰ প্ৰতিনিধি দলে। দলটোৱে মুখ্যমন্ত্ৰীক এখন স্মাৰক-পত্ৰও প্ৰদান কৰে।
চিপিআই(এম)-ৰ ৰাজ্যিক সম্পাদক সুপ্ৰকাশ তালুকদাৰ, কেন্দ্ৰীয় কমিটিৰ সদস্য ঈশ্বাক বহমান, প্ৰাক্তন বিধায়ক মনোৰঞ্জন তালুকদাৰ আৰু ৰাজ্যিক নেত্ৰী সংগীতা দাসক লৈ গঠিত প্ৰতিনিধি দলটোৱে উজনি অসমৰ বানপানীক ‘জাতীয় দুৰ্যোগ’ ঘোষণা কৰি বানপীড়িতক সাহায্য আৰু পুনৰসংস্থাপনৰ বাবে অধিক ধন আবণ্টনৰ দাবী জনায়।
দলটোৰ মতে, ১৯ জুলাইৰ পৰা শিৱসাগৰ, চৰাইদেউ, যোৰহাট আদি জিলাত বানপানীয়ে ভয়ংকৰ ৰূপ ধাৰণ কৰিছে। ইয়াৰ ফলত ইতিমধ্যে ব্যাপক ক্ষতি হৈছে আৰু ক্ষতিগ্ৰস্ত জনসাধাৰণক উদ্ধাৰ, সাহায্য আৰু পুনৰ সংস্থাপনৰ ক্ষেত্ৰত চৰকাৰৰ অধিক সক্ৰিয় হস্তক্ষেপৰ প্ৰয়োজন আছে বুলি চিপিআই(এম)-এ উল্লেখ কৰে।
চিপিআই(এম)-এ লগতে দাবী কৰে যে উজনি অসমৰ বানপানীৰ প্ৰকৃত কাৰণ নিৰ্ধাৰণৰ বাবে বিশেষজ্ঞ কমিটি গঠন কৰি প্ৰতিবেদন দাখিলৰ ব্যৱস্থা কৰিব লাগে। দলটোৱে অভিযোগ কৰে যে প্ৰাকৃতিক কাৰকৰ লগতে নগাঁও আৰু অসমত হোৱা অবৈধ খনন আৰু পৰিৱেশ ধ্বংসৰ ফলতো জলপ্ৰলয়ৰ তীব্ৰতা বৃদ্ধি পাইছে।
স্মাৰক-পত্ৰত ব্ৰহ্মপুত্ৰ আৰু অন্যান্য নদীৰ বান নিয়ন্ত্ৰণৰ বাবে দীৰ্ঘম্যাদী ব্যৱস্থা গ্ৰহণ, আন্তঃৰাজ্যিক নদীসমূহৰ ক্ষেত্ৰত উপযুক্ত প্ৰাধিকৰণ গঠন, বানপানী-গৰাখহনীয়াক জাতীয় সমস্যা হিচাপে বিবেচনা আৰু স্থায়ী সমাধানৰ বাবে সময় নিৰ্ধাৰিত কাৰ্যসূচী ঘোষণা কৰাৰ দাবী জনোৱা হৈছে।
চিপিআই(এম)-এ বানত নিহত লোকৰ পৰিয়ালক অন্ততঃ ২০ লাখ টকাৰ সাহায্য প্ৰদানৰ দাবী জনাইছে। ক্ষতিগ্ৰস্ত প্ৰতিটো পৰিয়ালক শীঘ্ৰে ১ লাখ টকাৰ এককালীন সাহায্য, সম্পূৰ্ণৰূপে ধ্বংস হোৱা পকী বা কেঁচা ঘৰৰ ক্ষতিৰ বাবে অধিক ক্ষতিপূৰণ আৰু গৃহপালিত পশু-পক্ষীৰ মৃত্যুৰ ক্ষেত্ৰত ক্ষতিপূৰণৰ পৰিমাণ বৃদ্ধি কৰাৰ দাবীও উত্থাপন কৰিছে।
ইয়াৰ উপৰি বানপীড়িত পৰিয়ালক বিনামূলীয়াকৈ খাদ্য যোগান, ক্ষতিগ্ৰস্ত কৃষকক পুনৰ খেতিৰ বাবে বিনামূলীয়াকৈ কঠিয়া, বীজ আৰু সাৰ যোগান, ক্ষতিগ্ৰস্ত অঞ্চলত মহামাৰী ৰোধ আৰু উপযুক্ত চিকিৎসা সেৱা নিশ্চিত কৰাৰ দাবী জনাইছে দলটোৱে।
চিপিআই(এম)-এ বানত ক্ষতিগ্ৰস্ত গাঁওসমূহত চৰকাৰৰ উদ্যোগত অন্ততঃ ২০০ দিনৰ কাম নিশ্চিত কৰা, ক্ষতিগ্ৰস্ত শিক্ষানুষ্ঠান আৰু অংগনৱাড়ী কেন্দ্ৰ মেৰামতিৰ বাবে বিশেষ পুঁজি আবণ্টন, ছাত্ৰ-ছাত্ৰীক বিনামূলীয়াকৈ ইউনিফৰ্ম আৰু কিতাপ-পত্ৰ যোগান আৰু বানত ক্ষতিগ্ৰস্ত লোকৰ ঋণ মাফ কৰাৰো দাবী উত্থাপন কৰিছে।
দলটোৱে মুখ্যমন্ত্ৰীৰ ওচৰত দাখিল কৰা স্মাৰক-পত্ৰত এই দাবীসমূহ শীঘ্ৰে পূৰণ কৰি বানপানী সমস্যাৰ স্থায়ী সমাধানৰ বাবে চৰকাৰে পদক্ষেপ গ্ৰহণ কৰিব বুলি আশা প্ৰকাশ কৰে।
