সমাগত অসম বিধানসভা নিৰ্বাচনৰ বাবে নিৰ্বাচন আয়োগে শনিবাৰে প্ৰথম পৰ্যায়ৰ প্ৰাৰ্থী সকলৰ নিৰ্বাচনী প্ৰচাৰত অনুমতি প্ৰদান কৰিছে।
সেই অনুসৰি ৭৭নং বিহালী বিধানসভা সমষ্টিত কংগ্ৰেছ নেতৃত্বাধীন মিত্রজোঁটৰ মনোনীত চিপিআই এম-এল দলৰ প্ৰাৰ্থী বিবেক দাসে শ্ৰীমন্ত শংকৰদেৱৰ স্মৃতি বিজড়িত গাংমৌথানত আশিস লৈ মটৰচাইকেলেৰে সমদল কৰি নিৰ্বাচনৰ প্ৰচাৰ অভিযানৰ শুভাৰম্ভ কৰে।
তিনি সহস্ৰাধিক মটৰচাইকেলৰে গাংমৌথানৰ পৰা মধ্যবিহালী, নাচবৰ বৰঝাৰণিলৈকে গাওঁ, চাহ বাগিচা সামৰি সমদলটো আগবাঢ়ে।
অসম প্ৰদেশ কংগ্ৰেছৰ সম্পাদক প্ৰেড়লাল গঞ্জু আৰু ৰূপক শৰ্মা, প্ৰনৱ চৌধুৰী, যুৱ কংগ্ৰেছৰ জিলা পৰ্যায়ৰ নেতা মনোজ গৌতম আৰু দীপজ্যেতি বৰা, বিহালী আৰু বাঘমৰা ব্লক কংগ্ৰেছ সমিতি, চিপিআই এম-এলৰ জিলা সম্পাদক অনন্ত হাজৰিকা আৰু জিলা সমিতিৰ নেতা সকলে সমদলৰ নেতৃত্ব দিয়ে।
প্ৰাৰ্থী বিবেক দাসে কয়,”বিজেপিয়ে নাগৰিকত্ব সংশোধনী আইন আনি অসমীয়া জাতিক পংগু কৰিব বিচাৰিছে। শ্ৰীমন্ত শংকৰদেৱে সকলো জাতি-জনজাতি বিভিন্ন ভাষা-ভাষী লোকক একত্ৰিত গঢ়া অসমীয়া জাতিৰ ভাষা-সংস্কৃতি ৰক্ষাৰ বাবে মহাজোঁট ন্ধন হৈছে। গতিকে আজি গুৰুজনাৰ গঢ়ি থৈ যোৱা গাংমৌথানৰ পৰাই নিৰ্বাচনী প্ৰচাৰ আৰম্ভ কৰা হয়।‘’
তেওঁ লগতে কয়, ‘’বিহালী সমষ্টিত ৰঞ্জিত দত্তই তিনিটা কাৰ্যকালৰ বাবে বিধায়ক হ’ল আৰু এইবাৰ মন্ত্ৰীও হ’ল কিন্তু বিহালীবাসীয়ে মন্ত্ৰীৰ পৰা দুৰ্নীতিৰ বাহিৰে কোনো সুফল নাপালে। গতিকে এইবাৰ বিহালীবাসীয়ে পৰিত্ৰাণ বিচাৰিছে। বিহালীবাসীয়ে মহাজোঁটৰ সপক্ষে ভোটদান কৰিব।”
