সম্পূৰ্ণ চৰকাৰীভাৱে অন্ত্যেষ্টিক্ৰিয়া সম্পন্ন কৰা হ’ব প্ৰয়াত গীতিকাৰ, সুৰকাৰ, গায়ক অপূৰ্ব বেজবৰুৱাৰ ।
সাংস্কৃতিক মন্ত্ৰী বিমল বৰা আৰু সাংস্কৃতিক সঞ্চালক ড° দেৱজিৎ খনিকৰৰ সৈতে এইমাত্ৰ হোৱা কথা-বতৰাৰ জৰিয়তে এই কথা জানিব পৰাৰ লগতে শিল্পীগৰাকীৰ চিকিৎসালয়ৰ সকলো ব্যয়ো চৰকাৰে বহন কৰিব বুলি তেওঁলোকে জনালে ।
ইতিমধ্যে পৰিয়ালৰ আত্মীয়ই যদি চিকিৎসালয়ত আগতীয়াকৈও কিবা ধন আদায় দিছিল সেই ধনো চৰকাৰে পৰিয়ালক ওভতাই দিব বুলি তেওঁলোকে জনালে ।
কিছুসময় পিছতে চিকিৎসালয়ৰ পৰা শিল্পীগৰাকীৰ মৃতদেহ কাহিলীপাৰাস্থিত তেওঁৰ বাসভৱনলৈ অনা হ’ব ।
তাৰ পিছতেই মৃতদেহ লৈ যোৱা হ’ব জ্যোতি চিত্ৰবন ষ্টুডিঅ’ আৰু ৰবীন্দ্ৰ ভৱনলৈ । ইয়াৰ পিছতেই তেওঁৰ শেষকৃত্য সম্পন্ন কৰা হ’ব নৱগ্ৰহ শ্মশানত ।
ইতিমধ্যে চৰকাৰে শেষকৃত্যৰ বাবে সকলো দায়িত্ব বহন কৰিছে ।
সাংস্কৃতিক মন্ত্ৰী বিমল বৰা, সাংস্কৃতিক সঞ্চালক ড° দেৱজিৎ খনিকৰকে ধৰি কেবাগৰাকী মন্ত্ৰী, বিধায়ক শেষকৃত্য অনুষ্ঠানত চৰকাৰৰ তৰফৰ পৰা উপস্থিত থাকিব ।
