আজি পুনৰ জম্মুত সংঘটিত হৈছে সন্ত্ৰাসবাদী আক্ৰমণৰ ঘটনা। এইবাৰ উগ্ৰপন্থীৰ গুলীচালনাত মৃত্যু হৈছে চি আৰ পি এফৰ এজন পৰিদৰ্শক। জম্মুৰ উধমপুৰৰ দাদু অঞ্চলত সংঘটিত হৈছে এই ঘটনা। অৰ্ধসামৰিক বাহিনী আৰু বিশেষ অভিযান গোটৰ যৌথ অনুসন্ধান অভিযানত এই আক্ৰমণ সংঘটিত হয়।
উল্লেখযোগ্য যে যোৱা ১৪ আগষ্টত জম্মুৰ ডোডা জিলাত উগ্ৰপন্থী গুলীচালনাত এজন সেনা বিষয়াই প্ৰাণ হেৰুৱাইছিল। বুধবাৰে উগ্ৰপন্থীৰ সৈতে হোৱা সংঘৰ্ষত নিহত হয় অধিনায়ক পদৰ বিষয়া দীপক সিং। এই আক্ৰমণত এজন সাধাৰণ মানুহো আহত হয়।
খবৰ অনুসৰি ডোডাৰ আছাৰ অঞ্চলৰ শিৱগড়-আছাৰ এলেকাৰ ঘন অৰণ্যত উগ্ৰপন্থীয়ে বাহৰ পাতি থকাৰ তথ্য লাভ কৰি সেনা-আৰক্ষীৰ দলে সেই স্থান ঘেৰাও কৰি অভিযান চলাই। লগে লগে উগ্ৰপন্থীয়েও গুলীচালনা কৰে আৰু বিষয়াগৰাকী উগ্ৰপন্থীৰ গুলীত নিহত হয়।
সেনাৰ অনুমান অনুসৰি সেনাৰ বন্দুকৰ গুলীত ৪ টা উগ্ৰপন্থী নিহত হয়। অৱশ্যে এই কথা এতিয়াও নিশ্চিত হোৱা নাই।
অঞ্চলটোৰ পৰা নিৰাপত্তা বাহিনীয়ে এটা আমেৰিকান এম ৪ ৰাইফল আৰু তিনিটা ৰকচেক উদ্ধাৰ কৰে।
