সোমবাৰে তিনিচুকীয়া জিলাৰ আৰ এছ এছ কাৰ্য্যালয়ত কেন্দ্ৰীয় সংৰক্ষিত আৰক্ষী বাহিনীৰ এগৰাকী জোৱানে আত্মহত্যা কৰাক লৈ চাঞ্চল্যৰ সৃষ্টি হৈছে।
আত্মহত্যা কৰা জোৱান গৰাকী বিহাৰৰ অমিত কুমাৰ(২৭) বুলি চিনাক্ত কৰা হৈছে। অতিম কুমাৰ চি আৰ পি এফৰ ৬৮ বেটেলিয়নত কৰ্মৰত আছিল।
আৰক্ষীৰ জনোৱা মতে, তিনিচুকীয়াৰ আৰ এছ এছৰ কাৰ্য্যালয়ত সুৰক্ষাৰ বাবে প্ৰতিদিনে চি আৰ পি এফৰ জোৱান মোতায়ন কৰা হয়।
কৰ্তব্যৰত অৱস্থাতে নিজৰ ৰিভলভাৰেৰে চি আৰ পি এফৰ জোৱান গৰাকীয়ে মুৰত গুলীয়াই আত্মহত্যা কৰে বুলি আৰক্ষী সুত্ৰত প্ৰকাশ।
‘‘কৰ্তব্যৰত অৱস্থাত চি আৰ পি এফৰ জোৱান গৰাকীয়ে নিজৰ ৰিভালভাৰেৰে মুৰত গুলীয়াই আত্মহত্যা কৰে। তেও অন্য জোৱান সকলৰ সৈতে কৰ্তব্যৰত আছিল আৰু হঠাৎ আত্মহত্যা কৰা জোৱান গৰাকীয়ে আৰ এছ এছৰ কাৰ্য্যালয়ৰ ভিতৰত থকা প্ৰস্ৰাৱগাৰত প্ৰৱেশ কৰে আৰু গুলীয়াই আত্মহত্যা কৰে। কি কাৰণত জোৱান গৰাকীয়ে আত্মহত্যাৰ পথ বাছি ল’লে সেই সম্বন্ধে বৰ্তমানলৈ আমি জানিব পৰা নাই যদিও এই এই সম্বন্ধত প্ৰাথমিক তদন্ত অব্যাহত ৰখা হৈছে,’’ নৰ্থ-ইষ্ট নাওৰ সৈতে হোৱা টেলিফোনিক বাৰ্তালাপত এনেদৰে কয় তিনিচুকীয়াৰ আৰক্ষী অধীক্ষক শিলিদিত্য চেতীয়াই।
চেতীয়াই আত্মহত্যা কৰা জোৱান গৰাকী অবিবাহিত আছিল বুলি উল্লেখ কৰি পৰিয়ালকেন্দ্ৰীক কিবা কাৰণতো আত্মহত্যা কৰিব পাৰে বুলি সন্দেহ প্ৰকাশ কৰিছে।
উল্লেখযোগ্য যে, বিগত সময়ছোৱাত ভাৰতৰ বিভিন্ন প্ৰান্তত কৰ্মৰত সুৰক্ষা বাহিনীৰ জোৱান সকলে আত্মহত্যা কৰাৰ বাতৰি প্ৰকাশ হৈ আহিছে।
