পশ্চিম বংগ আৰক্ষীৰ চাইবাৰ ক্ৰাইম শাখাই গ্ৰেপ্তাৰ কৰিছে ৰাজ্যখনৰ এজন শক্তিশালী উদ্যোগপতি ডানলপ আৰু জেছপৰ প্ৰাক্তন অধ্যক্ষক। মঙলবাৰে নিউ টাউনৰ এখন হোটেলৰ সন্মুখৰ পৰা তেওঁক গ্ৰেপ্তাৰ কৰা হয়। কমেও ৬০০ কোটি টকাৰ চাইবাৰ জালিয়াতিৰ গোচৰত গ্ৰেপ্তাৰ কৰা হৈছে।
কলিকতা উচ্চ ন্যায়ালয়ে ২০২৫ চনৰ ৩১ ডিচেম্বৰত এই গোচৰত তেওঁক সুৰক্ষা প্ৰদান কৰিছিল। কিন্তু সেই সুৰক্ষা আদালতে আজি প্ৰত্যাহাৰ কৰে। তাৰ কেই ঘণ্টাৰ পাছত পশ্চিম বংগ আৰক্ষীৰ চাইবাৰ ক্ৰাইম শাখাই তেওঁক গ্ৰেপ্তাৰ কৰে।
আৰক্ষীৰ সূত্ৰ অনুসৰি, ২০২৪ চনত স্বপন কুমাৰ মণ্ডল নামৰ এজন ব্যক্তিয়ে ইকো পাৰ্ক আৰক্ষী থানাত অভিযোগ কৰিছিল যে তেওঁক ‘হাই ৰিটাৰ্ণ’ৰ প্ৰলোভন দি ‘KKRMF.apk’ নামৰ মোবাইল এপ এটা ইনষ্টল কৰাই ৯৩ লাখ টকাৰ প্ৰতাৰণা কৰা হৈছিল। এই জালিয়াতিৰ তদন্তৰ সময়ত আৰক্ষীয়ে এটা বিশাল চাইবাৰ জালিয়াতিৰ চক্ৰ উদ্ধাৰ কৰে।
তদন্তত প্ৰকাশ পাইছে যে দেশৰ বিভিন্ন প্ৰান্তৰ পৰা চাইবাৰ জালিয়াতিৰ জৰিয়তে উপাৰ্জন কৰা বিপুল পৰিমাণৰ ধন একাধিক শ্বেল কোম্পানীৰ একাউণ্টলৈ প্ৰেৰণ কৰা হৈছিল। কলকাতাৰ ৪৬ চৈয়দ আমিৰ আলী এভিনিউত থকা ‘ৰুইয়া চেণ্টাৰ’ৰ পৰা চলিছিল এই শ্বেল কোম্পানীবোৰ। তদন্তকাৰীয়ে প্ৰায় ১৪৮টা এনে শ্বেল কোম্পানী বা ভুৱা সংস্থা বিচাৰি উলিয়াইছে।
তেওঁলোকে নিজৰ অবৈধ কাৰ্যকলাপ লুকুৱাই ৰাখিবলৈ আৰু বিদেশলৈ সৰবৰাহ কৰিবলৈ সেই ধন ক্ৰিপ্টোকাৰেন্সীলৈ ৰূপান্তৰিত কৰিছিল। ইয়াৰ পূৰ্বে ২০২৫ চনৰ ১ নৱেম্বৰত এই চক্ৰৰ অন্যতম নায়ক ৰাহুল ভাৰ্মাক দিল্লী বিমানবন্দৰৰ পৰা গ্ৰেপ্তাৰ কৰা হৈছিল। পৱন ৰুইয়াৰ লগতে তেওঁৰ পুত্ৰ ৰাঘৱ আৰু কন্যা পল্লৱীও এই গোচৰত অভিযুক্ত।
নেশ্যনেল চাইবাৰ ক্ৰাইম ৰিপ’ৰ্টিং পৰ্টেল (এনচিআৰপি)ৰ তথ্য অনুসৰি সমগ্ৰ দেশতে অভিযুক্তসকলৰ সৈতে জড়িত কমেও ১৩৭৯টা চাইবাৰ জালিয়াতিৰ গোচৰ পোহৰলৈ আহিছে। ১৯০০ৰো অধিক ভুক্তভোগীয়ে আৰক্ষীক অভিযোগ দাখিল কৰিছে। তদন্তকাৰীৰ মতে এই চক্ৰৰ নেটৱৰ্ক বহুদূৰ বিস্তৃত।
