দাৰ্জিলিঙৰ বিখ্যাত ‘টয় ট্ৰেইন’ আৰু এখন টেক্সীৰ মাজত সংঘটিত হোৱা এক সংঘৰ্ষই শেহতীয়াকৈ ব্যাপক চৰ্চা লাভ কৰিছে। শতিকাজুৰি নিৰ্দিষ্ট ৰে’ল পথৰে গৈ থকা অৱস্থাত দাৰ্জিলিং হিমালয়ান ৰে’লৱেৰ টয় ট্ৰেইনখনে ৰে’লপথৰ নিচেই কাষতে বিপজ্জনকভাৱে ৰখাই থোৱা এখন মহিন্দ্ৰা ছুম’ বাহনত ঘঁহনি খাই পাৰ হৈ যায়। আটাইতকৈ আচৰিত কথাটো হ’ল, এই ঘটনাৰ পিছতে টেক্সী চালকজনে ৰে’লখন ভুল দিশত অহা বুলি দাবী কৰি ৰে’লৰ ল’ক’ পাইলটজনৰ সৈতে তৰ্কত লিপ্ত হয়। সম্প্ৰতি এই সমগ্ৰঘটনাৰ ভিডিঅ’ সামাজিক মাধ্যমত চৰ্চাৰ কেন্দ্ৰবিন্দু হৈ পৰিছে।
সাধাৰণ পথত চলা বাহনৰ বিপৰীতে এখন ৰে’লে নিজৰ পথ সলনি কৰিব নোৱাৰে বা আন বাহনক কাষ কাটি যাব নোৱাৰে। বিগত এশ বছৰৰো অধিক সময় ধৰি এই টয় ট্ৰেইনখনে এটা নিৰ্দিষ্ট স্থায়ী ৰে’লপথৰে চলাচল কৰি আহিছে। এনে অৱস্থাত ৰে’লখন ভুল দিশত অহা বুলি টেক্সী চালকজনে কৰা দাবীয়ে পৰিস্থিতিটোক এক অদ্ভুত ৰূপ প্ৰদান কৰে।
পৰৱৰ্তী সময়ত কৰ্তৃপক্ষই সমগ্ৰ ঘটনাটোৰ তদন্ত কৰি নিশ্চিত কৰে যে টেক্সীখন সম্পূৰ্ণ বেআইনী আৰু অসাৱধানতাৰে ৰে’লপথৰ কাষত ৰখাই থোৱা হৈছিল। যাৰ ফলতেই ৰেলখনে পাৰ হৈ যোৱাৰ সময়ত বাহনখনত খুন্দা মাৰে।
ঘটনাটোৰ পিছতে কৰ্তৃপক্ষই আইনী ব্যৱস্থা গ্ৰহণ কৰে। প্ৰশাসনে ইতিমধ্যে মহিন্দ্ৰা ছুম’ বাহনখন জব্দ কৰাৰ লগতে কৰ্তব্যত গাফিলতি আৰু বেআইনীভাৱে বাহন ৰখোৱাৰ অভিযোগত চালকজনৰ বিৰুদ্ধে এক গোচৰ ৰুজু কৰিছে বুলি জানিব পৰা গৈছে।
