অষ্ট্ৰেলিয়াৰ প্ৰাক্তন অধিনায়ক ডেভিদ ৱাৰ্নাৰক গ্ৰেপ্তাৰ কৰা হৈছে। তেওঁৰ বিৰুদ্ধে মদ্যপান কৰি গাড়ী চলোৱাৰ অভিযোগ উঠিছে। অষ্ট্ৰেলিয়াৰ সংবাদ মাধ্যমৰ মতে, ছিডনীৰ মাৰৌব্ৰা অঞ্চলত আৰক্ষীয়ে ডেভিদ ৱাৰ্নাৰক ব্ৰেথ এনালাইজাৰৰ সহায়ত পৰীক্ষা কৰি আছিল। সেই সময়ত ডেভিদ ৱাৰ্নাৰৰ পৰীক্ষাত দেখা গ’ল যে তেওঁ মদ্যপান কৰি গাড়ী চলাইছিল। অহা মাহত আদালতত তেওঁৰ শুনানি আছে।
নিয়ম অনুসৰি আৰক্ষীয়ে প্ৰতিখন গাড়ীৰ পৰীক্ষা কৰি আছিল। সেই সময়ত ৱাৰ্নাৰে তালৈ গাড়ী চলাই আহিছিল। নিৰ্দিষ্ট স্থানৰ বহু আগতেই তেওঁ গাড়ীখন ৰখাই দিলে। আৰক্ষী বিষয়াই তেওঁৰ ওচৰলৈ গৈ শ্বাস পৰীক্ষাৰ অন্তত তেওঁ মদ্যপান কৰা বুলি গম পায়। মাৰৌব্ৰা থানালৈ নিয়াৰ পিছত পুনৰ পৰীক্ষা কৰা হয়, য’ত তেওঁৰ স্কোৰ আছিল ০.১০৪। যিয়ে প্ৰমাণ কৰিলে যে তেওঁ মদ্যপান কৰিছিল। ইয়াৰ পিছতে তেওঁক গ্ৰেপ্তাৰ কৰা হয়।
বৰ্তমান পাকিস্তান ছুপাৰ লীগত কৰাচী কিংছ দলৰ নেতৃত্ব দি আছে ডেভিদ ৱাৰ্নাৰে। পি এছ এলৰ বিৰতিৰ বাবে তেওঁ অষ্ট্ৰেলিয়ালৈ উভতি আহে। ৯ এপ্ৰিলৰ আগতে পাকিস্তানলৈ উভতি যোৱাৰ কথা আছিল। কিন্তু ঘৰলৈ যোৱাৰ সময়তে গ্ৰেপ্তাৰ হয়। যদিও পিছত তেওঁক মুকলি কৰি দিয়া হৈছে। অৱশ্যে এমাহৰ পাছত পুনৰ শুনানিৰ বাবে হাজিৰ হ’ব লাগিব।
যদি ডেভিদ ৱাৰ্নাৰক আটক কৰা হ’লহেঁতেন তেন্তে তেওঁৰ ফ্ৰেঞ্চাইজি সমস্যাৰ সন্মুখীন হ’লহেঁতেন। পি এছ এলৰ বিতৰ্কৰ অন্ত নাই। এনে পৰিস্থিতিত যদি তেওঁক গ্ৰেপ্তাৰৰ বাবে আটক হ’লহেঁতেন তেন্তে তেওঁলোকৰ সমস্যা আৰু অধিক বৃদ্ধি পালেহেঁতেন।
বৰ্তমান পইণ্ট তালিকাত দ্বিতীয় স্থানত আছে ডেভিদ ৱাৰ্নাৰৰ কৰাচী কিংছ। তেওঁলোকে খেলা তিনিখন মেচৰ প্ৰতিখনতে জয়লাভ কৰিছে। তালিকাৰ শীৰ্ষত আছে লাহোৰৰ কালাণ্ডাৰ। তেওঁলোকে খেলা পাঁচখন মেচৰ ভিতৰত চাৰিখন খেলত জয়লাভ কৰিছে।
আনহাতে, পি এছ এলত ডেভিদ ৱাৰ্নাৰৰ ফৰ্ম ভাল। তিনিখন মেচত ক্ৰমে ৩৫, ৮ আৰু ৫০ ৰান সংগ্ৰহ কৰিছে।
