বৃহস্পতিবাৰে ছানৰাইজাৰ্ছ হায়দৰাবাদ আৰু কিংছ ইলেভেন পঞ্জাৱৰ মাজত অনুষ্ঠিত হোৱা মেচখনত ছানৰাইজাৰ্ছে জয়ী হোৱাৰ লগতে অধিনায়ক ডেভিড ৱাৰ্ণাৰে এক ইতিহাস ৰচিবলৈও সক্ষম হয়।
অপেনাৰদ্বয় ৱাৰ্ণাৰ আৰু জনি বেয়াৰষ্ট’ আৰু স্পিনাৰ ৰাছিদ খানৰ দুৰ্দান্ত প্ৰদৰ্শনৰ ভিত্তিত ছানৰাইজাৰ্ছে কিংছ ইলেভেনক পৰাস্ত কৰে।
মেচখনত ৱাৰ্ণাৰে অৰ্ধশতকীয় ইনিংছ খেলে আৰু ইয়াৰ পিছতে তেওঁ আই পি এলত এক ইতিহাস গঢ়াৰ অধিকাৰী হয়।
আই পি এল ইতিহাসত ৱাৰ্ণাৰে ৫০ বাৰ ৫০ৰ অধিক স্ক’ৰ কৰাৰ অভিলেখ গঢ়ে। ইয়াৰ পূৰ্বে কোনেও এই অভিলেখ গঢ়িবলৈ সক্ষম হোৱা নাই।
মেচৰ অন্তত ৱাৰ্ণাৰে কয় যে কিদৰে তেওঁ বেয়াৰষ্ট’ৰ সৈতে মিলি দলক সুন্দৰ জয়ৰ উপহাৰ দিয়াৰ লগতে এই অভিলেখ গঢ়ে।
ৱাৰ্ণাৰ আৰু বেয়াৰষ্ট’ৱে প্ৰথম উইকেটৰ যুটীত ১৬০ ৰান কৰে।
উল্লেখ্য যে ক্ৰিকেট ফিল্ডত অষ্ট্ৰেলিয়া আৰু ইংলেণ্ডৰ খেলুৱৈ সকলক আক্ৰমক তথা শত্ৰু মনোভাৱ ৰূপত দেখা পোৱা যায়।
কিদৰে ইংলেণ্ডৰ এগৰাকী খেলুৱৈৰ সৈতে মিলি ইমান সুন্দৰ প্ৰদৰ্শন আগবঢ়াইছৈ বুলি ৱাৰ্ণাৰক সোধা এক প্ৰশ্নৰ উত্তৰত তেওঁ কয় যে দুয়োখন দেশৰ মাজত শত্ৰুতা তথা বেয়া ভাব থকা বুলি মানুহে কিয় ভাবে মই নাজানো।
ইয়াৰ উপৰি বেয়াৰষ্ট’ৰ সৈতে ৱাৰ্ণাৰে বেটিং কৰি সদায় আনন্দ লাভ কৰে বুলিও জানিবলৈ দিয়ে।
উল্লেখ্য যে ৱাৰ্ণাৰে বৃহস্পতিবাৰৰ মেচখনত ৪০টা বলত ৫২ ৰান কৰে। আই পি এলত ৱাৰ্ণাৰৰ এয়া ৫০ বাৰ ৫০ৰ অধিক স্ক’ৰ কৰাৰ ৰেকৰ্ড। তেওঁৰ এই পৰ্যন্ত ৪৬টা অৰ্ধশতক আৰু চাৰিটা শতক অৰ্জন কৰিছে।
ৱাৰ্ণাৰৰ পিছতে এই তালিকাত আছে বিৰাট কোহলী। তেওঁ ৪২ বাৰ ৫০ৰ অধিক স্ক’ৰ কৰিছে। ইয়াৰ ভিতৰত আছে ৩৭টা অৰ্ধশতক আৰু পাঁচটা শতক।
তৃতীয় আৰু চতুৰ্থ স্থানত আছে ক্ৰমে সুৰেশ ৰাইনা আৰু ৰোহিত শৰ্মা। দুয়োৰে নামত আছে ৩৮টা অৰ্ধশতক আৰু এটা শতক।