ডাউদ ইব্ৰাহিম, অন্ধকাৰ জগতৰ এই কুখ্যাত সম্ৰাটজনক ভাৰতে ঘোষণা কৰিছে ‘ম’ষ্ট ৱাণ্টেড’ অপৰাধী হিচাপে। এসময়ত দেশৰ বিভিন্ন প্ৰান্তত অপৰাধমূলক কাৰুকাৰ্যৰে আতংকময় পৰিস্থিতিৰ সৃষ্টি কৰা এই কুখ্যাত ‘আণ্ডাৰৱৰ্ল্ড ডন’ ডাউদ ইব্ৰাহিম বৰ্তমান ক’ত আছে, সেই লৈ সময়ে সময়ে চৰ্চা চলি আহিছে।
সাম্প্ৰতিক সময়ত ভাৰতত ডাউদৰ বিধংসী কাৰ্যকলাপ হ্ৰাস পাইছে যদিও অন্ধকাৰ জগতত থকা তেওঁৰ বিশাল অপৰাধ সাম্ৰাজ্য ম্লান হোৱা নাই। গোলকীয় সন্ত্ৰাসবাদী হিচাপে ঘোষণা কৰাৰ পাছতো এইপৰ্যন্ত বিশ্বৰ শীৰ্স্থানীয় কোনো চোৰাংচোৱা সংস্থাই ডাউদৰ অৱস্থান ধৰা পেলাবলৈ সক্ষম হোৱা নাই।
উল্লেখ্য যে, আন্তঃৰাষ্ট্ৰীয় পৰ্যায়ত ভাৰতে ভাৰতে দীৰ্ঘদিন ধৰি ডাউড ইব্ৰাহিমে পাকিস্তানত আত্মগোপন কৰি আহিছে বুলি দাবী কৰি আহিছে। পাকিস্তানৰ প্ৰত্যক্ষ পৃষ্ঠপোষকতাত ডাউদে পাকিস্তানৰ কৰাচী চহৰত বাহৰ পাতি আছে বুলি ভাৰতে দাবী কৰি আহিছে। কিন্তু ভাৰতৰ এই দাবীক সদায়ে খণ্ডন কৰি আহিছে পাকিস্তানে।
ডাউদ ইব্ৰাহিমক কেন্দ্ৰ কৰি চলি অহা এই জল্পনা-কল্পনাৰ মাজতে ডাউদৰ নিজ ভতিজা আলী শ্বাহ পাৰকাৰে ভাৰতৰ এনফ’ৰ্চমেণ্ট ডাইৰেক্টৰেট, চমুকৈ ইডিৰ সন্মুখত প্ৰকাশ কৰিছে কেতবোৰ চাঞ্চল্যকৰ তথ্য। ইডিৰ সন্মুখত পাৰকাৰে দিয়া ভাষ্য অনুসৰি ডাউদ এতিয়া পাকিস্তানৰ কৰাচীত বাস কৰি আছে।
উল্লেখ্য যে আলী শ্বাহ পাৰকাৰ ডাউদ ইব্ৰাহিমৰ ভগ্নী হাছিনা পাৰকাৰৰ পুত্ৰ। কেইবছৰমান পূৰ্বে আলীৰ মাতৃ হাছিনা পাৰকাৰৰ মুম্বাইত মৃত্যু হৈছিল।
উল্লেখ্য যে ইডি-এ ধনৰ অবৈধ সৰবৰাহৰ এটা গোচৰৰ তদন্ত চলাই আছে। এই গোচৰ সন্দৰ্ভতে ইডিয়ে আলী শ্বাহ পাৰকাৰকো জেৰা চলাইছে। জেৰাৰ সময়তে পাৰকাৰে ইডিৰ সন্মুখত এই চাঞ্চল্যকৰ তথ্য সদৰি কৰে।
পাৰকাৰৰ ভাষ্য অনুসৰি ১৯৮৬ চনৰ আশে পাশে ডাউদ ইব্ৰাহিমে ভাৰত ত্যাগ কৰিছিল। ১৯৮৬ চনলৈকে ডাউদে দক্ষিণ মুম্বাইৰ ডাম্বাৰৱালা ভৱনৰ চতুৰ্থ মহলাত বাস কৰিছিল বুলিও সদৰি কৰে পাৰকাৰে।
বিভিন্ন উৎস আৰু আত্মীয়ৰ পৰা লাভ কৰা তথ্য অনুসৰি ডাউদ ইব্ৰাহিম বৰ্তমান কৰাচীত বসতি কৰি আছে বুলি পাৰকাৰে নিজ বিবৃতিত উল্লেখ কৰে।
পাৰকাৰে লগতে কয় যে তেওঁৰ জন্মৰ পূৰ্বেই ডাউদে ভাৰত ত্যাগ কৰিছিল। ইয়াৰ পাছত তেওঁৰ সৈতে পাৰকাৰৰ পৰিয়ালৰ কোনো যোগসূত্ৰ নাছিল বুলিও পাৰকাৰে সদৰি কৰে।অৱশ্যে কোনো উৎসৱ-পাৰ্বনৰ সময়ত ডাউদ ইব্ৰাহিমৰ পত্নী মেহজাবীনে পাৰকাৰৰ পত্নী তথা ভগ্নীৰ সৈতে যোগাযোগ কৰে বুলি তেওঁ লগতে কয়।