প্ৰখ্যাত সক্ৰিয়কৰ্মী সোণম ৱাংচুকৰ আমৰণ অনশন কাৰ্যসূচী আজি ঊনবিংশ দিনত ভৰি দিছে। ককৰোচ জনতা পাৰ্টিৰ তৰফৰ পৰা জাৰি কৰা এক বিবৃতিত প্ৰকাশ কৰা হৈছে যে বৃহস্পতিবাৰে পুৱাৰে পৰা তেওঁৰ শাৰীৰিক অৱস্থা যথেষ্ট দুৰ্বল হৈ পৰিছে। অনশন আৰম্ভ কৰাৰে পৰা বৰ্তমানলৈকে তেওঁৰ শৰীৰৰ ওজন ৯ কেজিতকৈও অধিক হ্ৰাস পাইছে বুলি দলটোৱে জানিবলৈ দিছে।
আজি পুৱা কৰা চিকিৎসা পৰীক্ষাৰ প্ৰতিবেদন অনুসৰি সোণম ৱাংচুকৰ ওজন হ্ৰাস পাই এতিয়া ৫৬.৯০ কেজি হৈছেগৈ। চিকিৎসকৰ তথ্য অনুসৰি তেওঁৰ ৰক্তচাপ ১০১/৬৫ এমএমএইচজি, নাড়ীৰ স্পন্দন প্ৰতি মিনিটত ৭২ বাৰ, অক্সিজেনৰ মাত্ৰা ৯৮ শতাংশ আৰু তেজত শৰ্কৰাৰ পৰিমাণ ৮৯ এমজি/ডিএল পোৱা গৈছে। শাৰীৰিকভাৱে যথেষ্ট দুৰ্বল হৈ পৰিলেও তেওঁ মানসিকভাৱে সম্পূৰ্ণ সজাগ আৰু সক্ৰিয় হৈ আছে। তেওঁক বৰ্তমান নিৰন্তৰ চিকিৎসা পৰ্যবেক্ষণত ৰখা হৈছে। ইফালে দিল্লী উচ্চ ন্যায়ালয়েও অনশনৰ সময়ছোৱাত ৱাংচুকৰ দৈনিক স্বাস্থ্য পৰীক্ষা আৰু নিৰীক্ষণ কৰিবলৈ প্ৰশাসনক নিৰ্দেশ জাৰি কৰিছে।
ককৰোচ জনতা পাৰ্টিয়ে ভাৰত চৰকাৰক অতি সোনকালে প্ৰতিবাদকাৰীসকলৰ সৈতে আলোচনাত বহিবলৈ পুনৰ আহ্বান জনাইছে। পৰীক্ষা ব্যৱস্থাৰ সংস্কাৰ আৰু সমগ্ৰ দেশৰ ছাত্ৰ-ছাত্ৰীসকলৰ দীৰ্ঘদিনীয়া সমস্যাসমূহ সমাধান কৰিবলৈ চৰকাৰক দাবী জনোৱা হৈছে। ইয়াৰ উপৰিও দলটোৱে কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবী উত্থাপন কৰিছে। ছাত্ৰ-ছাত্ৰী আৰু শিক্ষা সংস্কাৰৰ সমৰ্থনত অহা ২০ জুলাইত আয়োজন কৰা শান্তিপূৰ্ণ সংসদ যাত্ৰা কাৰ্যসূচীত দেশৰ সাধাৰণ ৰাইজক অংশগ্ৰহণ কৰিবলৈও দলটোৱে আহ্বান জনাইছে।
