তিনিচুকীয়া জিলাৰ লেখাপানী থানাৰ অন্তৰ্গত জাগুনৰ টিৰাপ নৈত জে, চি, বিয়ে খনন কৰা গাঁতত সোমাই এজন লোক যোৱা ১৮ মেৰ পৰা সন্ধানহীন হৈ থকাৰ ঘটনাই অঞ্চলটোত চাঞ্চল্যৰ সৃষ্টি কৰি আহিছিল৷
উক্ত দিনা সন্ধিয়া খোজেৰে নৈ পাৰ হওঁতে পানীৰ কোবাল সোঁতে উটুৱাই লৈ যায় লোকজনক।
লোকজনৰ নাম তুফান খাৰিয়া, বয়স ৪৩ বছৰ।
প্ৰত্যক্ষদৰ্শীৰ ভাষ্য অনুসৰি লোকজন পানীৰ কোবাল সোঁতত উটি যোৱাৰ সময়তে নৈ খনৰ পাৰত কাম কৰি থকা এগৰাকী মহিলাই দেখা পাই তেওঁক সহায়ৰ হাত আগবঢ়াইছিল যদিও লোকজন নিমিষতে পানীৰ মাজত হেৰাই গৈছিল৷
ইয়াৰ পাছৰে পৰা লোকজনৰ সন্ধানত এচ, ডি, আৰ, এফৰ জোৱানে নৈত অভিযান অব্যাহত ৰাখিছিল যদিও ব্যক্তিজনক উদ্ধাৰ কৰিব পৰা নাছিল৷
আজি সন্ধ্যা টিৰাপ নৈৰ লামা ঘাটত এজন স্থানীয় লোকে গা ধুবলৈ যাওঁতে নৈত এটা মৃতদেহ উপঙি থকা অৱস্থাত দেখা পাই জাগুন আৰক্ষীক খবৰ দিয়াত নৈৰ পৰা আৰাক্ষীয়ে স্থানীয় ৰাইজৰ সহযোগত মৃতদেহটো উদ্ধাৰ কৰে।
পিছত উক্ত মৃতদেহটো ফানেঙৰ তুফান খাৰিয়া বুলি চিনাক্ত কৰা হয়। ইতিমধ্যে তুফানৰ মৃতদেহ জাগুন আৰক্ষীয়ে মৰণোত্তৰ পৰীক্ষাৰ বাবে প্ৰেৰণ কৰিছে৷
উল্লেখযোগ্য যে অঞ্চলটোত দীৰ্ঘদিন ধৰি অবৈধভাৱে জে চি বিৰে শিল খনন কৰি অহা হৈছে। টিৰাপ নৈত জে চি বিয়ে খন্দা গাঁতত সোমাইয়ে তুফানৰ মৃত্যু হ’ল বুলি স্থানীয় ৰাইজে অভিযোগ কৰাৰ লগতে বন বিভাগৰ বিৰুদ্ধে ক্ষোভ প্ৰকাশ কৰে।
