তামুলপুৰ মহকুমাৰ ভাৰত-ভূটান সীমান্তৰ বগাজুলিৰ সমীপৰ পাহাৰৰ টিলাত উদ্বাৰ হৈছে ১১ দিনে নিৰুদ্দেশ হৈ থকা বিষ্ণু মগৰ নামৰ প্রায় ২২ বছৰীয়া যুৱকৰ অৰ্ধগলিত মৃতদেহ।
যোৱা ২৭ জুনৰ পৰা ভূটান সীমান্তৰ দৰঙা মেলাস্থিত মেনকা চাহ বাগিচাৰ পৰা সন্ধানহীন হৈ আছিল বিষ্ণু মগৰ নামৰ যুৱকজন।
বুধবাৰে ৰহস্যজনকভাৱে বিষ্ণুৰ মৃতদেহ পাহাৰৰ টিলাত চিপ লোৱা অৱস্থাত উদ্ধাৰ হোৱাৰ পিছতে সৃষ্টি হৈছে চাঞ্চল্যৰ।
উল্লেখ যে, যোৱা ২৭ জুন তাৰিখে বিষ্ণু মগৰ নামৰ যুৱকজনে তেওঁৰ প্ৰেমিকাক নিশা গোপনে লগ ধৰিবলৈ আহোঁতে প্ৰেমিকাৰ পৰিয়ালৰ লোকে যুৱকজনক আটক কৰি মানসিক অত্যাচাৰ চলোৱাৰ লগতে ম’বাইল ফোন কাঢ়ি লৈ ঘৰলৈ যাব দিয়াৰ অভিযোগ উত্থাপন হৈছে।
কিন্ত পিছদিনা পুৱালৈ যুৱকজন নিজ ঘৰলৈ উভতি নহাত চিন্তিত হৈ পৰে পৰিয়ালৰ লোক।
পৰিয়ালৰ লোকে বিষ্ণু নিৰুদ্দিষ্ট হোৱা বুলি এজাহাৰ দাখিল কৰে কুমাৰীকাটা আৰক্ষী চকীত।
এজেহাৰৰ ভিত্তিত আৰক্ষীয়ে তদন্ত অব্যাহত ৰখাৰ সময়তে ১১ দিনৰ অন্তত অৰ্থাৎ বুধবাৰে আবেলি ভাৰত-ভূটান সীমান্তৰ বগাজুলি বনাঞ্চলৰ ওচৰত দুৰ্গম পাহাৰৰ সু উচ্চ টিলাত স্থানীয় লোকে চিপ লৈ থকা অৰ্ধ গলিত মৃতদেহ প্ৰত্যক্ষ কৰে।
মৃতদেহ প্ৰত্যক্ষ কৰি স্থানীয় লোকে কুমাৰীকাটা আৰক্ষীক অৱগত কৰে।
আৰক্ষীয়ে লগে লগে ঘটনাস্থলীত উপস্থিত হৈ মৃতদেহটো বিষ্ণু মগৰৰ বুলি চিনাক্ত কৰাৰ পিছতে ৰহস্যৰ আৱৰ্তত সোমাই পৰিছে সমগ্ৰ ঘটনা।
বিষ্ণু মগৰৰ পৰিয়াল আৰু স্থানীয় চাহ জনজাতি ছাত্র সংগঠনৰ অভিযোগ মতে এয়া এক পৰিকল্পিত হত্যাকাণ্ড।
বিষ্ণু মগৰৰ প্ৰেয়সীৰ পৰিয়ালৰ লোকে বিষ্ণু মগৰক হত্যা কৰাৰ গুৰুতৰ অভিযোগ উত্থাপন হোৱাৰ পিছতে তদন্তৰ বাবে আৰক্ষীয়ে আটক কৰিছে ৰাজদ্বীপ দাস, ভণ্ড গৌৰ, বিকি দেউৰী, জুহাল সৰকাৰ নামৰ চাৰিজন যুৱকক।
সম্পূৰ্ণ পৰিকল্পিতভাৱে হত্যা কৰি আত্মহত্যাৰ ৰূপ দিয়াৰ চেষ্টা কৰাৰো গুৰুতৰ অভিযোগ উত্থাপন কৰিছে পৰিয়াল তথা চাহ জনজাতি ছাত্র সন্থাৰ বিষয়ববীয়া সকলে।
ঘটনাৰ তদন্তৰ বাবে মৃতদেহ উদ্ধাৰ হোৱা ঠাইত আজি উপস্থিত হয় আৰক্ষীৰ উচ্চপদস্ত বিষয়াসকল।
ঘটনাৰ সৈতে জড়িত প্ৰতিজন লোকক কঠোৰ শাস্তি বিহিবলৈ দাবী জনাইছে পৰিয়াল তথা চাহ জনজাতি ছাত্র সন্থাৰ বিষয়-ববীয়াই।
আৰক্ষীৰ তদন্তৰ অন্ততহে পোহৰলৈ আহিব এয়া প্ৰকৃততে হত্যা নে আত্মহত্যা।