কেন্দ্ৰীয় চৰকাৰে এখন অধিসূচনা জাৰি কৰি মাৰাত্মক অপতৃণ নাশক পৰাকুৱাট সমগ্ৰ দেশতে সম্পূৰ্ণৰূপে নিষিদ্ধ ঘোষণা কৰিছে। এই নিষেধাজ্ঞা তাৎক্ষণিকভাৱে কাৰ্যকৰী হ’ব। বহুতো চিকিৎসক, বিজ্ঞানী আৰু কৃষি বিশেষজ্ঞই দীৰ্ঘদিন ধৰি ইয়াৰ ব্যৱহাৰ বন্ধ কৰিবলৈ দাবী জনাই আহিছিল। বিশ্বৰ ৭০ খনতকৈও অধিক দেশত ইতিমধ্যে পৰাকুৱাট নিষিদ্ধ কৰা হৈছে, আনকি যিবোৰ দেশত ইয়াক আৱিষ্কাৰ কৰা হৈছিল বা প্ৰস্তুত কৰা হয়, তাতো ইয়াৰ ব্যৱহাৰ বন্ধ আছিল। কিন্তু ভাৰতত ইমান দিনে এই মাৰাত্মক ৰাসায়নিকবিধ খেতি পথাৰত আইনীভাৱে ছটিয়াই থকা হৈছিল। কেন্দ্ৰীয় কৃষি আৰু কৃষক কল্যাণ মন্ত্ৰালয়ে এই খচৰা অধিসূচনা জাৰি কৰি অংশীদাৰসকলক ইয়াৰ ওপৰত আপত্তি বা পৰামৰ্শ দাখিল কৰিবলৈ ৩০ দিনৰ সময় দিছে।
চিকিৎসকসকলৰ মতে পৰাকুৱাট কোনো সাধাৰণ ঘাঁহ মৰা ঔষধ নহয়, বৰঞ্চ ই আটাইতকৈ মাৰাত্মক কৃষি ৰাসায়নিক পদাৰ্থসমূহৰ ভিতৰত অন্যতম। আটাইতকৈ চিন্তনীয় কথাটো হ’ল ইয়াৰ কোনো নিৰ্দিষ্ট প্ৰতিষেধক ঔষধ নাই আৰু শৰীৰত ইয়াৰ সামান্য পৰিমাণ প্ৰৱেশ কৰিলেও মানুহৰ মৃত্যু পৰ্যন্ত হ’ব পাৰে। ই মানুহৰ হাওঁফাওঁ বেয়াকৈ ক্ষতিগ্ৰস্ত কৰে যাৰ ফলত ৰোগীয়ে উশাহ ল’বলৈ অক্ষম হৈ পৰে। ইয়াৰ উপৰিও কিডনী, লিভাৰ, ছাল আৰু চকুৰো ই ব্যাপক ক্ষতি কৰে। খেতি পথাৰত কাম কৰা কৃষক আৰু শ্ৰমিকসকলে ইয়াক ছটিয়াবৰ সময়ত দুৰ্ঘটনাবশতঃ গিলিব পাৰে, উশাহত ল’ব পাৰে বা ছালৰ সংস্পৰ্শলৈ আহি আক্ৰান্ত হ’ব পাৰে। এই কাৰণতে ইউৰোপীয় ইউনিয়ন, ব্ৰিটেইন, ছুইজাৰলেণ্ড আৰু চীনৰ দৰে দেশে ইয়াক বহু আগতেই নিষিদ্ধ কৰিছিল।
ভাৰতত ইয়াৰ পূৰ্বেও কেৰেলা আৰু অন্ধ্ৰপ্ৰদেশৰ দৰে কেইখনমান ৰাজ্যই পৰাকুৱাট নিষিদ্ধ কৰিবলৈ চেষ্টা কৰিছিল যদিও বিভিন্ন আইনী আৰু কাৰিকৰী বাধাৰ সন্মুখীন হৈছিল। কিন্তু এইবাৰ চৰকাৰে গঠন কৰা বিশেষজ্ঞ পেনেলৰ পৰামৰ্শৰ ভিত্তিত সমগ্ৰ দেশতে এই নিষেধাজ্ঞা জাৰি কৰা হৈছে। এই খচৰা নিৰ্দেশনাটো সম্পূৰ্ণ আইনত পৰিণত হোৱাৰ পাছত পৰাকুৱাটৰ আমদানি, উৎপাদন, বিক্ৰী, পৰিবহন আৰু ব্যৱহাৰ সম্পূৰ্ণ বেআইনী হৈ পৰিব। উৎপাদনকাৰী আৰু বিক্ৰেতাসকলে নিজৰ পঞ্জীয়ন প্ৰমাণপত্ৰ তিনি মাহৰ ভিতৰত জমা দিব লাগিব। ভাৰতত ইয়াক কেৱল ৯ বিধ নিৰ্দিষ্ট শস্য যেনে চাহ, আলু, কপাহ, ৰবৰ, কফি, ধান, মাকৈ, ঘেঁহু আৰু আঙুৰৰ বাবেহে অনুমোদন দিয়া হৈছিল। কিন্তু বহু ঠাইত কৃষকসকলে শস্য চপোৱাৰ ঠিক আগতে সোনকালে শুকুৱাবলৈ মগুমাহৰ দৰে শস্যৰ ওপৰত ইয়াক অপপ্ৰয়োগ কৰিছিল, যাৰ ফলত ই মানুহৰ খাদ্য শৃংখলত প্ৰৱেশ কৰাৰ আশংকাই দেখা দিছিল।
এই মাৰাত্মক কেমিকেলবিধ নিষিদ্ধ কৰাৰ সিদ্ধান্তক এক গুৰুত্বপূৰ্ণ পদক্ষেপ হিচাপে গণ্য কৰা হৈছে। কিয়নো ভাৰতত এতিয়াও এনে বহুতো বিতৰ্কিত কীটনাশক ব্যৱহাৰ কৰিবলৈ অনুমতি দিয়া হৈছে যিবোৰ কেন্সাৰ বা স্নায়ৱিক ৰোগৰ আশংকাৰ বাবে বিদেশত নিষিদ্ধ। গ্লাইফ’ছেট, ২,৪-ডি আদিৰ দৰে আন কেইবাটাও ৰাসায়নিক পদাৰ্থ এতিয়াও ভাৰতৰ পথাৰত ব্যৱহাৰ হৈ আছে। বিশেষজ্ঞসকলৰ মতে পৰাকুৱাটৰ এই নিষেধাজ্ঞাই দেশৰ নিয়ন্ত্ৰক সংস্থাসমূহক জনস্বাস্থ্যৰ প্ৰতি লক্ষ্য ৰাখি আন আন ক্ষতিকাৰক ৰাসায়নিক পদাৰ্থসমূহৰ ওপৰতেও পুনৰীক্ষণ কৰিবলৈ আৰু ব্যৱস্থা গ্ৰহণ কৰিবলৈ এক স্পষ্ট সংকেত প্ৰেৰণ কৰিছে।
