বোকাখাত মহকুমা সাংবাদিক সন্থা, বোকাখাত প্ৰেছ ক্লাব আৰু ইলেক্ট্ৰনিক্স মেডিয়া জাৰ্নেলিষ্ট এছ’চিয়েচন ( ইমজা)ৰ উদ্যোগত বোকাখাত নাট্য মন্দিৰত আজি বোকাখাতৰ প্ৰাক্তন বিধায়ক শ্ৰমিক নেতা তথা সাংবাদিক ভূপেন্দ্ৰ নাথ ভূঞাৰ মৃত্যু বাৰ্ষিকীৰ লগত সংগতি ৰাখি এক বিশেষ স্মৃতিচাৰণ আৰু স্মৃতিগ্ৰন্থৰ উন্মোচনী অনুষ্ঠান অনুষ্ঠিত হয়।
বোকাখাতৰ জ্যেষ্ঠ সাংবাদিক তথা সাহিত্যিক পেঞ্চনাৰ ভৱেশ শইকীয়াৰ পৌৰহিত্যত অনুষ্ঠিত এই অনুষ্ঠানত বন্তি প্ৰজ্বলন কৰে প্ৰয়াত নেতা গৰাকীৰ সহধৰ্মিনী দিব্য ভূঞা আৰু বোকাখাত জে ডি এছ জি মহাবিদ্যালয়ৰ প্ৰাক্তন অধ্যক্ষ ড০ বিভা বৰাই।
বোকাখাতৰ বিশিষ্ঠ লোকসকলৰ লগতে বিভিন্ন দল-সংগঠনৰ প্ৰতিনিধিৰ উপস্থিতিত অনুষ্ঠিত এই অনুষ্ঠানত প্ৰয়াত ভূপেন্দ্ৰ নাথ ভূঞাৰ জীৱনৰ বিভিন্ন দিশ সামৰি আৰু বিভিন্ন লোকৰ লেখনিৰে সমৃদ্ধ ‘কৰ্মযোগী’ নামৰ এখন স্মৃতিগ্ৰন্থ উন্মোচন কৰা হয়। স্মৃতিগ্ৰন্থ উন্মোচন কৰে গোলাঘাটৰ বিশিষ্ট সাংবাদিক তথা সাপ্তাহিক ধনশিৰিৰ সম্পাদক অপূৰ্ব কুমাৰ বৰুৱাই ৷
অনুষ্ঠানত নিৰ্দিষ্ট বক্তা হিচাপে উপস্থিত থাকি বিশিষ্ট নিৱন্ধকাৰ প্ৰফুল্ল প্ৰাণ মহন্তই প্ৰয়াত নেতা গৰাকীৰ জীৱনৰ বিভিন্ন দিশ আলোকপাত কৰি বক্তব্য আগবঢ়ায়। অসম বিধানসভাৰ প্ৰাক্তন উপাধ্যক্ষ তথা বোকাখাতৰ প্ৰাক্তন বিধায়ক বলোভদ্ৰ তামুলী, গোলাঘাটৰ জ্যেষ্ঠ সাংবাদিক উপেন দত্ত, প্ৰাক্তন বিধায়ক অৰুণ ফুকন, অৱসৰপ্ৰাপ্ত শিক্ষক তোষেশ্বৰ বৰা, বোকাখাট নাট্য মন্দিৰ সমিতিৰ সভাপতি গোলাপ কলিতা আৰু সমাজকৰ্মী ৰাজেন্দ্ৰ প্ৰসাদ নিমোদিয়া অনুষ্ঠানটোত আমন্ত্ৰিত অতিথি হিচাপে উপস্থিত থাকে ৷