বাক্সা জিলাৰ তামুলপুৰ মহকুমাৰ নাগ্ৰীজুলিৰ মেধাৱী ছাত্ৰী তথা নৱবিবাহিতা মমতা বাঢ়ৈৰ মৃতদেহ বিজনীৰ ৰে’ললাইনত উদ্ধাৰকলৈ সৃষ্টি হোৱা চাঞ্চল্য এতিয়াও মাৰ যোৱা নাই।
ঘটনাৰ বিৱৰণী অনুসৰি, নাগ্ৰীজুলি আৰক্ষী চকীৰ অন্তৰ্গত কুম্ভীঝাৰ গাঁওৰ নাৰায়ণ বাঢ়ৈৰ দ্বিতীয় কন্যা মমতা বাঢ়ৈ মাত্ৰ চাৰিমাহ পূৰ্বে বিজনীৰ ভেটাগাঁও অঞ্চলৰ পংকজ সৰকাৰ নামৰ এজন যুৱকৰ সৈতে বিবাহ পাশত আৱদ্ধ হৈছিল।
মমতাৰ পৰিয়ালৰ অভিযোগ মতে বিবাহৰ পিছৰে পৰা স্বামীগৃহত মানসিক আৰু শাৰীৰিক অত্যাচাৰৰ সন্মুখীন হৈছিল মমতা। আৰু তাৰ পিছতে যোৱা ৬ এপ্ৰিল তাৰিখে ৰহস্যজনকভাৱে বিজনীৰ ৰে’লৰ লাইনত উদ্ধাৰ হয় মমতাৰ মৃতদেহ। স্বামী পংকজ সৰকাৰে হত্যা কৰি ৰে’লৰ আলিৰ দাঁতিত পেলাই থোৱাৰ অভিযোগ মমতাৰ পৰিয়ালৰ।
যোৱা বৰ্ষত উচ্চতৰ মাধ্যমিক চূড়ান্ত পৰীক্ষাত প্ৰথম বিভাগত উত্তীৰ্ণ হৈ অসম চৰকাৰৰ ফালৰ পৰা স্কুটি লাভ কৰা মমতাৰ এই মৃত্যুক এতিয়া সহজভাৱে লব পৰা নাই পিতৃ মাতৃ, আত্মীয় তথা অঞ্চলবাসীয়ে।
সৰুৰে পৰা সামাজিক-সাংস্কৃতিক দিশত ওতঃপ্ৰোতভাৱে জড়িত মমতাৰ সহপাঠী তথা শিক্ষকসকলেও এতিয়া ভাঙি পৰিছে শোকত।
অভিযোগ মতে মমতা পঙ্কজৰ বাবে আছিল দ্বিতীয় পত্নী। প্ৰথমা পত্নীক বিবাহ বিচ্ছেদ কৰাই দ্বিতীয় বাৰৰ বাবে পঙ্কজে বিয়া কৰাইছিল মমতাক। কিন্ত বিবাহৰ পিছৰে পৰা যৌতুকৰ বাবে শাৰীৰিক আৰু মানসিক অত্যাচাৰ চলাইছিল মমতাক। বিভিন্ন অপৰাধমূলক কামৰ সৈতেও জড়িত থকাৰ অভিযোগ পঙ্কজৰ বিৰুদ্ধে।
ইতিমধ্যে মমতাৰ পিতৃ পৰিয়ালৰ লোকে বিজনী ৰে’লৱে আৰক্ষীক ঘটনা সন্দৰ্ভত দাখিল কৰিছে এখন এজাহাৰ। সম্পূৰ্ণ পৰিকল্পিতভাৱে হত্যা কৰাৰ গুৰুতৰ অভিযোগ পিতৃ পৰিয়াল, তথা ওচৰ চুবুৰীয়াৰ।
সামাজিক মাধমতো তীব্ৰ চৰ্চা লাভ কৰিছে সমগ্ৰ ঘটনাটোৱে। শীঘ্ৰেই পংকজ সৰকাৰক কৰায়ত্ত কৰি ফাঁচী দিয়াৰ দাবী উত্থাপন কৰিছে স্থানীয় দল-সংগঠন তথা ৰাইজে।
সোমবাৰে মমতাৰ পিতৃ পৰিয়ালৰ আৰু নাগ্ৰীজুলি আঞ্চলিক যুৱ ছাত্ৰ ফেডাৰেচনে আয়োজন কৰে এক শ্ৰদ্ধাঞ্জলি অনুষ্ঠানৰ। অনুষ্ঠানৰ পৰাই মমতাৰ দৰে কোনো ছোৱালী যাতে এনে ঘটনাৰ সন্মুখীন নহয় তাৰ বাবে প্ৰতিজন লোকে পঙ্কজৰ চৰম শাস্তিৰ দাবী উত্থাপন কৰিছে।
আৰক্ষীৰ তদন্তৰ পিছতে পোহৰলৈ আহিব সমগ্ৰ ঘটনা।