৫ অক্তোবৰত গুৱাহাটী বিশ্ববিদ্যালয়ত অধ্যয়নৰত এজন ছাত্ৰৰ আকস্মিক মৃত্যুক কেন্দ্ৰ কৰি ছাত্ৰ সমাজৰ মাজত এতিয়াও অব্যাহত আছে প্ৰতিক্ৰিয়া।
হিমাংশু নেওগ নামৰ যোৰহাটৰ ছাত্ৰজনৰ মৃত্যুক কেন্দ্ৰ কৰি বিশ্ববিদ্যালয়ত এক অস্থিৰ পৰিৱেশ সৃষ্টি হোৱাও দেখা গৈছে। আজি বিশ্ববিদ্যালয় কৰ্তৃপক্ষই এই ঘটনাটোৰ তদন্তৰ বাবে এখন তদন্ত কমিটী গঠন কৰিছে।
আনহাতে হিমাংশুৰ পিতৃ দেৱজিৎ নেওগে এই সন্দৰ্ভত এখন এজাহাৰ দাখিল কৰিছে বুলি জানিবলৈ দিয়ে জালুকবাৰীৰ এ চি পি পনজিৎ দুৱৰাই। দেউতাকে চিকিৎসালয়খনত অক্সিজেনৰ ভাল মাক্স নাই, চিকিৎসাৰ সু-ব্যৱস্থা নাই বুলি এজাহাৰত উল্লেখ কৰিছে। লগতে গুৱাহাটী বিশ্ববিদ্যালয় চিকিৎসা কেন্দ্ৰৰ পৰা মহেন্দ্ৰ মোহন চৌধুৰী হাস্পতাললৈ নিয়াৰ সময়ত মেডিকেল ষ্টাফৰ কোনোৱে ছাত্ৰজনৰ লগত যোৱা নাছিল।
ইফালে নাম প্ৰকাশত অনিচ্ছুক গুৱাহাটী বিশ্ববিদ্যালয়ৰ ছাত্ৰ এজনৰ ভাষ্য এনেধৰণৰ,- “হিমাংশুৰ হাৰ্টৰ প্ৰ’বলেম আছিল আৰু চিকিৎসকে কিছুদিন ঘৰতে থাকিবলৈ দিছিল। কিন্তু তেওঁ ঘৰত এমাহ জিৰণি লৈয়ে পুনৰ ক্লাছ কৰিবৰ বাবে আহিছিল। কালি নিশা তেওঁৰ ষ্ট্ৰ’ক হৈছিল। তাৰ পাছত গুৱাহাটী বিশ্ববিদ্যালয় চিকিৎসালয়লৈ নিয়ে যদিও তাত চিকিৎসাৰ বাবে উন্নত সঁজুলি নাই। এম্বুলেন্স আছে যদিও তাতো সঁজুলি নাই।”
ছাত্ৰজনৰ মৃত্যুৰ পিছত কালি গুৱাহাটী বিশ্ববিদ্যালয়ৰ হোষ্টেলৰ ছাত্ৰ-ছাত্ৰীসকলে চিকিৎসা কেন্দ্ৰটোৰ সন্মুখত প্ৰতিবাদ কৰে বুলি জানিব পৰা গৈছে।
উল্লেখযোগ্য যে বিশ্ববিদ্যালয়খনত বি টেকৰ তৃতীয় ষান্মাসিকত পঢ়ি থকা আৰু আৰি চি চি-২ হোষ্টেলৰ আৱাসী হিমাংশু নেওগ নামৰ ছাত্ৰজন ৫ অক্তোবৰৰ ৰাতি হঠাৎ অসুস্থ হৈ পৰাত সহপাঠীসকলে বিশ্ববিদ্যালয়খনৰ চৌহদত থকা চিকিৎসা কেন্দ্ৰত ভৰ্তি কৰিছিল। কিন্তু তাত উপযুক্ত চিকিৎসাসেৱা আৰু সঁজুলি নথকা বাবে চিকিৎসা কেন্দ্ৰৰ পৰা পাণবজাৰস্থিত মহেন্দ্ৰমোহন চৌধুৰী চিকিৎসালয়লৈ প্ৰেৰণ কৰিছিল। কিন্তু সংকটজনক অৱস্থাত থকা হিমাংশুক দিবৰ বাবে অক্সিজেনৰ ব্যৱস্থা নাছিল চিকিৎসাকেন্দ্ৰটোত। ফলত চিকিৎসালয়লৈ নিয়াৰ পথত হিমাংশুৰ মৃত্যু হয়।
আনহাতে, গুৱাহাটী বিশ্ববিদ্যালয়ৰ উপাচাৰ্য্য ড০ মৃদুল হাজৰিকাই নৰ্থ-ইষ্ট নাওক জনায় যে এই ঘটনাটোৰ তদন্ত কৰিবলৈ এখন তদন্ত কমিটী গঠন কৰি দিয়া হৈছে। সাংবাদিকতা বিভাগৰ অধ্যাপক অংকুৰণ দত্ত আৰু আন এজনক লৈ এই তদন্ত কমিটী গঠন কৰি দিয়া হৈছে।
উপাচাৰ্য্যজনে কালিৰ ঘটনাটোত চিকিৎসকৰ গাফিলতি থকা বুলি স্বীকাৰ কৰিছে। তেওঁ কয়, “ৰোগীজনক তালৈ নিয়াৰ পাছতেই যিধৰণে তৎপৰ হ’ব লাগিছিল, সেইধৰণে চিকিৎসক তৎপৰ হোৱা নাছিল। গতিকে আমি স্বাস্থ্যকেন্দ্ৰটোৰ মুখ্য চিকিৎসা বিষয়া এন এন তালুকদাৰক তাৎক্ষণিকভাৱে নিলম্বন কৰিছো আৰু লগতে ঘটনাৰ তদন্তৰ ব্যৱস্থা কৰা হৈছে।”
ইফালে উপাচাৰ্য্যজনে কয় যে সেইখন বিশ্ববিদ্যালয়ৰ ভিতৰৰ সৰু চিকিৎসাকেন্দ্ৰ। তাত সাধাৰণতে প্ৰাথমিক চিকিৎসাৰ সুবিধাখিনিহে আছে। তাত উন্নত চিকিৎসা ব্যৱস্থা কৰাটো সম্ভৱপৰ হৈ উঠা নাই, তথাপিতো যিমানখিনি পাৰি সেৱা আগ বঢ়োৱাৰ ব্যৱস্থা আছে।”
