আহমেদাবাদৰ মেঘনিনগৰত সংঘটিত ভয়াবহ বিমান দুৰ্ঘটনাত মৃত্যু তালিকা আৰু দীঘলীয়া হৈ আহিছে। ইতিমধ্যে ধ্বংসাৱশেষৰ পৰা উদ্ধাৰ কৰা হৈছে আৰু অধিক মৃতদেহ। অসমৰ্থিত সূত্ৰৰ মতে, মৃত্যুৰ সংখ্যা ২৭৪ লৈ বৃদ্ধি পাইছে।
আহমেদাবাদৰ পৰা লণ্ডন গেটৱিক অভিমুখী AI171 বিমানত মৃত্যু হোৱা ২৪১ জন লোকৰ তালিকাত দুৰ্ঘটনাস্থলীত থকা অধিক লোকৰ নাম যোগ হৈছে।
যোৱা ১২ জুন বৃহস্পতিবাৰে দিনৰ ১:৩৮ বজাত দুৰ্ঘটনাগ্ৰস্ত বয়িং ৭৮৭-৮ ড্ৰিমলাইনাৰ বি জে মেডিকেল কলেজৰ হোষ্টেলৰ ছাদত খুন্দা মাৰে। ইয়াৰ পিছতে এক বৃহৎ বিস্ফোৰণ সংঘটিত হয়।
বিমানখনৰ বাকী থকা জ্বলি থকা অংশবোৰ খহি পৰে। ইয়াৰ বাবে হোষ্টেলৰ বাসিন্দাসকলৰ উপৰিও অঞ্চলটোত বসবাস কৰা সাধাৰণ লোকসকলো এই দুৰ্ঘটনাৰ বলি হয়।
অসমৰ্থিত সূত্ৰৰ মতে, বিমানখনত থকা ২৪১ জন লোকৰ বাহিৰেও এই ঘটনাত ৩৩ জন সাধাৰণ নাগৰিকৰ মৃত্যু হয়। জানিব পৰা মতে, ৩৩জন লোকৰ ভিতৰত এজন ১০ বছৰীয়া ল’ৰাও আছে।
উল্লেখ্য যে আহমেদাবাদ বিমানবন্দৰৰ পৰা উৰণৰ কেইছেকেণ্ডমানৰ ভিতৰতে এয়াৰ ইণ্ডিয়াৰ এআই১৭১ বিমানখনে ওচৰৰ এটা অট্টালিকাত খুন্দা মাৰে। সেইটো ডাক্তৰৰ হোষ্টেল বিল্ডিং আছিল। সংঘৰ্ষৰ লগে লগে তীব্ৰ বিস্ফোৰণ হয় আৰু বিমানখনত অগ্নিকাণ্ড সংঘটিত হয়।
য’ত বিমানখন ভাঙি যায় তাতেই বহু লোকৰ মৃত্যু হয়। বিমানখনৰ কোনো এটা অংশৰ খুন্দাত বা বিস্ফোৰণৰ জুইত তেওঁলোক অগ্নিদগ্ধ হৈ পৰে। আহতসকল স্থানীয় আহমেদাবাদ অসামৰিক চিকিৎসালয় আৰু বি জে মেডিকেল কলেজ হাস্পতালত চিকিৎসাধীন হৈ আছে।
স্থানীয় সূত্ৰৰ মতে, বহুতৰে সম্পূৰ্ণ দেহ বিচাৰি পোৱা নাই। ধ্বংসাৱশেষত বিচাৰি উদ্ধাৰ হৈছে শৰীৰৰ অংগ। কোনোবাই মাত্ৰ হাতহে পাইছে, কোনোবাই কেৱল ভৰিহে পাইছে। শৰীৰৰ এই সকলোবোৰ অংগ চিনাক্ত কৰাটো কঠিন। বহুতো সম্পূৰ্ণ মৃতদেহ বিচাৰি পালেও চিনাক্ত কৰিব পৰা নাই।
চিনাক্তকৰণৰ বাবে গুজৰাট প্ৰশাসনে ডি এন এ পৰীক্ষাৰ ব্যৱস্থা কৰিছে। যিসকলক বিচাৰি পোৱা নগ’ল, যিসকল বিমানত আছিল বা বিমান দুৰ্ঘটনাস্থলীত আছিল তেওঁলোকৰ পৰিয়ালৰ সদস্যৰ পৰা ডি এন এ নমুনা বিচৰা হৈছে।
আহমেদাবাদৰ মেঘানিনগৰত এতিয়াও উদ্ধাৰ অভিযান অব্যাহত আছে। ৰাষ্ট্ৰীয় আৰু ৰাজ্যিক দুৰ্যোগ সঁহাৰি বাহিনীয়ে এই উদ্ধাৰ অভিযান চলাই আছে। ধ্বংসাৱশেষ এতিয়াও সম্পূৰ্ণৰূপে আঁতৰোৱা হোৱা নাই।
উদ্ধাৰকাৰীয়ে জনোৱা মতে, ধ্বংসাৱশেষ আঁতৰাবলৈ কিছু সময় লাগিব। ফলত ইয়াৰ তলত কোনোবা পিষ্ট হৈ আছে নে নাই কোৱা সম্ভৱ নহয়। যদি ধ্বংসাৱশেষ সম্পূৰ্ণৰূপে আঁতৰাই পেলোৱাৰ পিছত চৰকাৰীভাৱে মৃত্যু হোৱা লোকৰ পৰিসংখ্যা পোৱা যাব পাৰে।
