ক্ৰমাৎ অৱনতি ঘটিছে অসমৰ বান পৰিস্থিতি। অসম ৰাজ্যিক দুৰ্যোগ ব্যৱস্থাপনা কৰ্তৃপক্ষই প্ৰকাশ কৰা অনুসৰি বানপানীত আৰু ৮ জন লোকৰ মৃত্যু হোৱাৰ পিছত মৃত্যুৰ সংখ্যা ৬৬ জনলৈ বৃদ্ধি পাইছে।
শেহতীয়াকৈ মৃত্যু হোৱা লোকসকলৰ ভিতৰত আছে ধুবুৰী আৰু নলবাৰী জিলাৰ দুজনকৈ, আৰু কাছাৰ, গোৱালপাৰা, ধেমাজি, আৰু শিৱসাগৰৰ এজনকৈ লোক।
খবৰ অনুসৰি ৰৌমাৰী পথাৰৰ প্ৰায় ৫০০ পৰিয়ালে গৰাখহনীয়া আৰু বানপানীৰ ফলত ঘৰ-দুৱাৰ আৰু খেতি-মাটি হেৰুৱাইছে পেলাইছে।
আটাইতকৈ বেছি ক্ষতিগ্ৰস্ত অঞ্চলৰ ভিতৰত অন্যতম বৰপেটা জিলাত ১৭৯খন গাঁও প্লাৱিত হোৱাৰ ফলত প্ৰায় ১ লাখ ৪০ হাজাৰ লোক ক্ষতিগ্ৰস্ত হৈছে।
বানৰ ফলত কৃষি খণ্ডতো যথেষ্ট প্ৰভাৱ পৰিছে। সমগ্ৰ ৰাজ্যতে ৬৩,৪৯০ হেক্টৰতকৈ অধিক শস্য বানত ডুব গৈছে।
কেৱল ধুবুৰী জিলাতেই ৭ লাখ ৭৫ হাজাৰ ৭২১ জন বাসিন্দা বানপানীৰ ফলত গুৰুতৰভাৱে ক্ষতিগ্ৰস্ত হৈছে।
চৰকাৰী তথ্য অনু্সৰি, অসমৰ ৩০ খন জিলাৰ ২০ লাখৰো অধিক লোক বানত ক্ষতিগ্ৰস্ত হৈছে।
ইফালে এই বানত অকল কাজিৰঙা ৰাষ্ট্ৰীয় উদ্যানতে ১১৪ টা বন্যপ্ৰাণীৰ মৃতদেহ উদ্ধাৰ কৰা হৈছে।
