বীৰ সাৱৰকাৰক লৈ কংগ্ৰেছ নেতা ৰাহুল গান্ধীয়ে কৰা মন্তব্যৰ পিছতে তেওঁৰ বিৰুদ্ধে এখন মানহানিৰ গোচৰ ৰুজু কৰা হৈছিল। কিন্তু আশ্চৰ্যজনকভাৱে পুনেৰ সাংসদ-বিধায়ক আদালতত এই গোচৰৰ শুনানি চলি থকাৰ সময়তে এক চাঞ্চল্যকৰ তথ্য পোহৰলৈ আহিছে। সাৱৰকাৰৰ নাতি সাত্যকি সাৱৰকাৰে নিজেই আদালতত ৰাহুল গান্ধীৰ সৰহভাগ অভিযোগ স্বীকাৰ কৰি লৈছে। যিবোৰ অভিযোগৰ ভিত্তিত তেওঁ ৰাহুল গান্ধীৰ বিৰুদ্ধে গোচৰ তৰিছিল, এতিয়া সেইবোৰৰ সত্যতা তেওঁ নিজেই মানি লোৱা দেখা গৈছে।
আদালতত জেৰাৰ সময়ত সাত্যকি সাৱৰকাৰে মানি লয় যে বীৰ সাৱৰকাৰে সঁচাকৈয়ে ব্ৰিটিছ চৰকাৰৰ ওচৰত পাঁচবাৰকৈ ক্ষমা বিচাৰি আবেদন দাখিল কৰিছিল। তেওঁ উল্লেখ কৰে যে চেলুলাৰ জেলত বন্দী হৈ থকাৰ সময়ত সাৱৰকাৰে এই দয়াৰ আবেদনবোৰ দিছিল। অৱশ্যে তেওঁ লগতে কয় যে কেৱল তেৱেঁই নহয়, সেই সময়ত আন বহুতো ৰাজনৈতিক বন্দীয়েও একেধৰণৰ আবেদন কৰিছিল। ইয়াৰ উপৰিও দ্বিতীয় বিশ্বযুদ্ধৰ সময়ত সাৱৰকাৰে ব্ৰিটিছ সেনাবাহিনীত যোগদান কৰিবলৈ আবেদন জনোৱা কথাও সাত্যকীয়ে স্বীকাৰ কৰে। অৱশ্যে তেওঁ যুক্তি দৰ্শাইছিল যে ইয়াৰ মূল উদ্দেশ্য আছিল ভাৰতীয় যুৱকসকলক সামৰিক প্ৰশিক্ষণ আৰু আগ্নেয়াস্ত্ৰৰ জ্ঞান প্ৰদান কৰা, যাতে স্বাধীনতাৰ পিছত ভাৰতে নিজৰ এটা শক্তিশালী ৰাষ্ট্ৰীয় সশস্ত্ৰ বাহিনী গঠন কৰিব পাৰে।
ৰাহুল গান্ধী আৰু কংগ্ৰেছ দলৰ আন এক গুৰুতৰ অভিযোগ আছিল যে সাৱৰকাৰেই দুই জাতি তত্ত্বৰ জন্মদাতা। এই সন্দৰ্ভত সাত্যকীয়ে কয় যে সাৱৰকাৰে এই তত্ত্বৰ সমৰ্থক নাছিল, বৰঞ্চ তেওঁ কেৱল কিছুমান বাস্তৱসন্মত পৰ্যবেক্ষণহে কৰিছিল। তেওঁ দাবী কৰে যে এই মূল ধাৰণাটো প্ৰথমে ছাৰ চৈয়দ আহমেদ খানেহে আগবঢ়াইছিল। আনহাতে, গৰুক লৈ থকা সাৱৰকাৰৰ দৃষ্টিভংগীৰ বিষয়েও সাত্যকীয়ে এক গুৰুত্বপূৰ্ণ মন্তব্য কৰে। তেওঁৰ মতে, সাৱৰকাৰে গৰুক কেতিয়াও ভগৱান বা দেৱতা হিচাপে উপাসনা কৰা নাছিল, বৰঞ্চ গৰুক কেৱল এবিধ উপকাৰী প্ৰাণী হিচাপেহে গণ্য কৰিছিল।
উল্লেখ্য যে, ২০২৩ চনৰ ৫ মাৰ্চত লণ্ডন ভ্ৰমণৰ সময়ত ৰাহুল গান্ধীয়ে সাৱৰকাৰক লৈ কৰা মন্তব্যৰ বিৰোধিতা কৰি সাত্যকি সাৱৰকাৰে নিজেই এই মানহানিৰ গোচৰ দাখিল কৰিছিল। তেওঁ অভিযোগ কৰিছিল যে ৰাহুল গান্ধীয়ে ৰাজনৈতিক স্বাৰ্থ পূৰণৰ বাবে ইচ্ছাকৃতভাৱে সাৱৰকাৰৰ বিৰুদ্ধে বছৰ বছৰ ধৰি ভুৱা তথ্য প্ৰচাৰ কৰি আহিছে। কিন্তু এতিয়া ৰাহুল গান্ধীৰ অধিবক্তাৰ প্ৰশ্নোত্তৰত সাত্যকীয়ে নিজেই গৰু সম্পৰ্কীয় বিষয়টোৰ বাহিৰে বাকী প্ৰায় সকলোবোৰ অভিযোগ সঁচা বুলি মানি লোৱা কাৰ্যই সমগ্ৰ বিষয়টোক এক আমোদজনক মোৰ দিছে।
