গোলাঘাট জিলাৰ শালমৰা চাহ বাগিচাত বিষাক্ত চুলাই ট্ৰেজেডিত অভিভাৱকহীন হোৱা শিশুসকলৰ অৱস্থা সম্পৰ্কে বুজ লোৱাৰ উদ্দেশ্যে বুধবাৰে ৰাজ্যিক শিশু অধিকাৰ সুৰক্ষা আয়োগৰ এটি প্ৰতিনিধি দলে বাগিচাখন ভ্ৰমণ কৰে।
আয়োগৰ অধক্ষ্য সুনিতা চাংকাকতি, সদস্য পিলু হাজৰিকা, ৰূপা হাজৰিকা আৰু কাৰিকৰী পৰামৰ্শদাতা ৰাজীৱ কুমাৰ ঝাসহ অহা চাৰিজনীয়া প্ৰতিনিধি দলটোক জিলা শিশু সুৰক্ষা সমিতিৰ অধক্ষ্য ড০ লুকুমণি গোস্বামী, জিলা শিশু সুৰক্ষা বিষয়া বিকাশৰঞ্জন কোৱাৰ আৰু বাগিচা কৰ্তৃপক্ষই সহযোগ কৰে।
দলটোৱে পুৱাৰ ভাগত বাগিচাখন ভ্ৰমণ কৰি অনাথ শিশু আৰু তেওঁলোকৰ আত্মীয়সকলক লগ ধৰি শিশুসকলৰ সুৰক্ষিত ভৱিষ্যতৰ বাবে ল’বলগীয়া বিভিন্ন পদক্ষেপৰ সম্পৰ্কে তেওঁলোকৰ দায়িত্ব পালন কৰি থকা আত্মীয় সকলক অৱগত কৰাৰ লগতে আইনগত বিভিন্ন সুবিধা, এনে শিশুৰ ক্ষেত্ৰত আয়োগ আৰু শিশু সুৰক্ষা সমিতিৰ দৰে অনুষ্ঠানসমূহৰ কৰণীয় কাম-কাজ সম্পৰ্কে উল্লেখ কৰে।
এই উদেশ্য শালমৰা বাগিচা আৰু গোলামপট্টি অঞ্চলত দুখন সভাও অনুষ্ঠিত হয়।
ইয়াৰ পিছত দলটোৱে বিয়লি জিলা উপায়ুক্ত ধীৰেন হাজৰিকাক সাক্ষাৎ কৰি শিশুসকলে লাভ কৰিবলগীয়া ক্ষতিপূৰণৰ ধনৰাশি কোনো ভুল গৰাকীৰ হাতত অৰ্পণ কৰাতকৈ শিশুসকলৰ নামত একাউণ্ট খুলি জমা ৰখাৰ ব্যৱস্থা কৰিবলৈ উপায়ুক্তক আহ্বান জনায়।
উল্লেখযোগ্য যে সুৰা ট্ৰেজেডিত শালমৰা আৰু ইয়াৰ কাষতে থকা গোলামপট্টি এলেকাত অনাথ হোৱা মুঠ ৩৪তা শিশু চিনাক্ত কৰা হৈছে। ইয়াৰে দুটা শিশুক জিলা শিশু সুৰক্ষা সমিতিয়ে বোকাখাটত থকা শিশুগৃহলৈ প্ৰেৰণ কৰিছে যদিও অধিকাংশ শিশুৰ আত্মীয়-স্বজনে নানান আজুহাত দেখুৱাই শিশুগৃহলৈ প্ৰেৰণত অনিচ্ছা প্ৰকাশ কৰি আহিছে।
বিশেষকৈ শিশুসকলে লাভ কৰিবলগীয়া ক্ষতিপূৰণৰ বাবেই বহুত লোকে তেওঁলোকক নিজৰ লগতে ৰাখিব খোজাত শিশুসকলক প্ৰয়োজনীয় সুৰক্ষা প্ৰদানৰ দিশত জিলা শিশু সুৰক্ষা সমিতি থমকি ৰ’ব লগা হৈছে।
