মধ্য আফ্ৰিকাৰ পৰা বিয়পি পৰা মাৰাত্মক ইব’লা ভাইৰাছৰ ক্ৰমবৰ্ধমান ভাবুকিৰ মাজতে ভাৰত চৰকাৰে কাৰ্যকৰী ব্যৱস্থা গ্ৰহণ কৰিছে। বিশ্ব স্বাস্থ্য সংস্থাই আন্তঃৰাষ্ট্ৰীয় জৰুৰীকালীন অৱস্থা ঘোষণা কৰাৰ পিছতে ৰাষ্ট্ৰীয় ৰাজধানী দিল্লীৰ ইন্দিৰা গান্ধী আন্তঃৰাষ্ট্ৰীয় (আই জি আই) বিমানবন্দৰত হাই এলাৰ্ট জাৰি কৰা হৈছে।
দিল্লী বিমানবন্দৰ কৰ্তৃপক্ষ আৰু স্বাস্থ্য মন্ত্ৰালয়ৰ অধীনস্থ স্বাস্থ্য সেৱা সঞ্চালকালয়ে বিদেশৰ পৰা অহা যাত্ৰীসকলৰ বাবে বিশদ স্বাস্থ্য পৰামৰ্শ জাৰি কৰিছে। এই পৰামৰ্শ বিশেষভাৱে এই ভাইৰাছৰ দ্বাৰা অধিক আক্ৰান্ত দেশৰ পৰা পোনপটীয়াকৈ বা ট্ৰেনজিটৰ জৰিয়তে ভাৰতত উপস্থিত হোৱাসকলৰ বাবে।
বিমানবন্দৰ কৰ্তৃপক্ষই জাৰি কৰা নিৰ্দেশনা অনুসৰি তিনিখন দেশক “অতি বিপদজনক দেশ” হিচাপে শ্ৰেণীভুক্ত কৰা হৈছে। তলত উল্লেখ কৰা দেশসমূহৰ পৰা বা তাৰ পিছত সংযোগী বিমানৰ জৰিয়তে দিল্লীত উপস্থিত হোৱা যিকোনো যাত্ৰীক শীঘ্ৰে পৰীক্ষাৰ আওতালৈ অনা হ’ব:
১) কংগো
২) উগাণ্ডা
৩) দক্ষিণ চুডান
পৰামৰ্শৱলীৰ মূল কথা
দিল্লী বিমানবন্দৰত নিয়োজিত বিমানবন্দৰ স্বাস্থ্য সংস্থাই ভ্ৰমণকাৰীসকলক নিজৰ স্বাস্থ্যৰ অৱস্থা লুকুৱাই নাৰাখিবলৈ আৰু তলত উল্লেখ কৰা নিয়মসমূহ কঠোৰভাৱে মানি চলিবলৈ আহ্বান জনাইছে।
লক্ষণসমূহ তৎক্ষণাত জনাওক: যদি কোনো ভ্ৰমণকাৰীয়ে বিমানবন্দৰত অৱতৰণ কৰাৰ সময়ত ইব’লাৰ আগতীয়া লক্ষণ দেখা দিয়ে, তেন্তে ইমিগ্ৰেচন ক্লিয়াৰেন্স কাউণ্টাৰলৈ যোৱাৰ আগতে তৎক্ষণাত বিমানবন্দৰৰ স্বাস্থ্য বিষয়া বা স্বাস্থ্য ডেস্কৰ সৈতে যোগাযোগ কৰিব লাগে।
তৰল পদাৰ্থৰ সংস্পৰ্শৰ তথ্য: যদি কোনো ভ্ৰমণকাৰীয়ে ভ্ৰমণৰ সময়ত বা তাৰ আগতে ইব’লা আক্ৰান্ত ৰোগীৰ তেজ বা শৰীৰৰ তৰল পদাৰ্থৰ প্ৰত্যক্ষ সংস্পৰ্শলৈ অহা বুলি সন্দেহ কৰে, তেন্তে তেওঁলোকে এই তথ্য তৎক্ষণাত চিকিৎসা দলক জনাব লাগিব।
এই লক্ষণসমূহ ভালদৰে নিৰীক্ষণ কৰিব লাগিব
স্বাস্থ্য বিভাগে ইব’লা ভাইৰাছৰ সৈতে জড়িত মূল লক্ষণসমূহৰ তালিকা প্ৰস্তুত কৰি পৰামৰ্শ জাৰি কৰিছে, যিবোৰক আওকাণ কৰিলে মাৰাত্মক হ’ব পাৰে:
• উচ্চ জ্বৰ আৰু মূৰৰ বিষ
• অত্যন্ত দুৰ্বলতা বা ক্লান্তি
• পেশীৰ তীব্ৰ বিষ
• বমি আৰু ডায়েৰিয়া
• ডিঙিৰ সুৰসুৰনি বা বিষ
• হঠাৎ বা অকাৰণে ৰক্তক্ষৰণ
২১ দিনৰ উইণ্ড’ৰ সময়সীমা; ঘৰলৈ উভতি অহাৰ পিছতো সাৱধানতা অৱলম্বন কৰিব লাগিব
ইব’লা ভাইৰাছৰ ইনকিউবেচন পিৰিয়ড, অৰ্থাৎ ইয়াৰ লক্ষণসমূহ দেখা দিবলৈ বহু সময় লাগিব পাৰে। সেয়ে স্বাস্থ্য বিভাগে যাত্ৰীসকলৰ বাবে ২১ দিনীয়া এক গুৰুত্বপূৰ্ণ পৰামৰ্শ জাৰি কৰিছে।
যদি কোনো ভ্ৰমণকাৰীয়ে অতি বিপদজনক দেশৰ পৰা উভতি আহিছে আৰু ভাৰতত উপস্থিত হোৱাৰ ২১ দিনৰ ভিতৰত ওপৰত উল্লেখ কৰা কোনো লক্ষণ দেখা দিয়ে তেন্তে তেওঁলোকে পলম নকৰাকৈ তৎক্ষণাত ওচৰৰ চিকিৎসা কেন্দ্ৰৰ সৈতে যোগাযোগ কৰিব লাগে। তেওঁলোকৰ ভ্ৰমণ ইতিহাসো চিকিৎসকৰ সৈতে শ্বেয়াৰ কৰিব লাগে।
বিমানবন্দৰ প্ৰশাসনে ৰাষ্ট্ৰীয় নিৰাপত্তা আৰু জনস্বাস্থ্যৰ স্বাৰ্থত বিমানবন্দৰত চলি থকা স্বাস্থ্য পৰীক্ষা আৰু সুৰক্ষা ব্যৱস্থাত স্বাস্থ্যকৰ্মীসকলৰ সৈতে পূৰ্ণ সহযোগিতা আগবঢ়াবলৈ সকলো আন্তঃৰাষ্ট্ৰীয় যাত্ৰীক অনুৰোধ জনাইছে।
