‘নিৰ্বাচনৰ পূৰ্বে বিজেপি আৰু প্ৰধানমন্ত্ৰী নৰেন্দ্ৰ মোদীয়ে দিয়া প্ৰতিশ্ৰুতি বিশ্বাস নকৰিব। বিজেপিৰ প্ৰতিশ্ৰুতি জুমলাৰ বাহিৰে আন একো নহয়। দুখীয়া মানুহৰ সৈতে বিশ্বাসঘাতকতা!’ পাঁচখন ৰাজ্যৰ নিৰ্বাচনৰ পূৰ্বে আম আদমী পাৰ্টিয়ে এনে অভিযোগ উত্থাপন কৰিছে।
দিল্লীৰ প্ৰাক্তন মুখ্যমন্ত্ৰী তথা আপ নেত্ৰী আতিশীয়ে কয় যে দিল্লীত বিজেপিয়ে চৰকাৰ গঠন কৰাৰ এবছৰ তিনিমাহ পাৰ হৈ গ’ল। কিন্তু দিল্লীৰ মহিলাক ২৫০০ টকাৰ আৰ্থিক সাহায্য প্ৰদানৰ প্ৰতিশ্ৰুতি এতিয়াও পূৰণ কৰিব পৰা নাই। অথচ সেই প্ৰতিশ্ৰুতি স্বয়ং নৰেন্দ্ৰ মোদীয়ে ঘোষণা কৰিছিল।
২০২৪ চনৰ ডিচেম্বৰৰ পৰা প্ৰধানমন্ত্ৰীয়ে দিল্লী বিধানসভা নিৰ্বাচনৰ নিৰ্বাচনী প্ৰচাৰৰ সভা-সমাৱেশত অহৰহ কৈ আহিছিল যে ‘আমি ক্ষমতালৈ আহিলে দিল্লীৰ সকলো মহিলাই মাহিলি ২৫০০ টকাৰ আৰ্থিক সাহায্য লাভ কৰিব।’ কিন্তু বাস্তৱত যোৱা বছৰৰ ফেব্ৰুৱাৰী মাহত দিল্লীত ক্ষমতালৈ অহাৰ পিছত বিজেপিয়ে নিজৰ স্বৰূপ সলনি কৰিলে।কোৱা হৈছে যে সকলো মহিলাই নাপাব। কেৱল দুখীয়া মহিলাকহে দিয়া হ’ব। তাৰো আকৌ বিভিন্ন চৰ্ত আছে।
আম আদমী পাৰ্টিৰ অভিযোগ যে সেই ঘোষণাৰ পাছতো এবছৰ পাৰ হৈ গ’ল। এতিয়ালৈকে দিল্লীৰ মহিলাসকলে এটকাও পোৱা নাই। তাতো বিজেপি আৰু মোডীৰ জুমলা শেষ হোৱা নাই বুলি কটাক্ষ কৰে আতিশীয়ে। তেওঁ কয়, ‘এইবাৰ বিজেপিয়ে কৈছিল যে অহা ৮ মাৰ্চ অৰ্থাৎ নাৰী দিৱসত মহিলা সমৃদ্ধি যোজনা আৰম্ভ কৰা হ’ব। ৮ মাৰ্চ পাৰ হৈ গ’ল। কিন্তু বিজেপিৰ প্ৰতিশ্ৰুতি পূৰণ হোৱা নাই।
আতিশীৰ এই অভিযোগৰ প্ৰতিক্ৰিয়া স্বৰূপে দিল্লীৰ বিজেপি চৰকাৰে মন্ত্ৰীসভাৰ বৈঠক অনুষ্ঠিত হোৱা বুলি কৈছে। শীঘ্ৰে এই অধিসূচনা জাৰি কৰা হ’ব। আগন্তুক মাহৰ পৰা দিল্লীৰ মহিলাসকলে সেই ধন লাভ কৰিব বুলি আশা কৰা হৈছে।
ইয়াৰ পিছতে আপৰ প্রশ্ন হ’ল, প্রধানমন্ত্রীয়ে নিজেই কৈছিল যে অনুদানৰ ধন ক্ষমতালৈ অহাৰ পিছৰ মাহৰ পৰাই উপলব্ধ হ’ব৷ দিল্লীৰ মহিলাসকলে এই এবছৰৰ ধন পাবনে? নে বিজেপি চৰকাৰে ইচ্ছাকৃতভাৱে টকা ৰাহি কৰিবলৈ কামত বিলম্ব কৰিছে?
আতিশিয়ে কয়, ‘আকৌ বিভিন্ন ৰাজ্যত নিৰ্বাচন আহি আছে। বিজেপি নেতৃত্ব আৰু প্ৰধানমন্ত্ৰীয়ে বিভিন্ন প্ৰতিশ্ৰুতি দিছে। দিল্লী ভাৰতৰ ৰাজধানী। তাতেই বিজেপিয়ে প্ৰতিশ্ৰুতি পূৰণ কৰা নাই। নিৰ্বাচনৰ পূৰ্বে সকলো মহিলাক আৰ্থিক সাহায্য দিয়া হ’ব বুলি কৈছিল যদিও ক্ষমতালৈ অহাৰ পিছত পিছহুহুকি গৈছে। গতিকে বিজেপিৰ প্ৰতিশ্ৰুতিত ভোটাৰ বিভ্ৰান্ত হোৱা উচিত নহয়। বিজেপিক বিশ্বাস কৰিলে প্ৰতাৰিত হ’ব।
