জন্ম ৰাজধানী দিল্লীত। কিন্তু তেওঁ অষ্ট্ৰেলিয়াৰ হৈ আন্তঃৰাষ্ট্ৰীয় ক্ৰিকেট খেলিবলৈ ওলাইছে! ৬২ বছৰৰ পাছত ভাৰতত জন্মগ্ৰহণ কৰা ক্ৰিকেটাৰ এজনক অষ্ট্ৰেলিয়াৰ দললৈ আমন্ত্ৰণ জনোৱা হৈছে। জানিব পৰা মতে নিখিল চৌধুৰী নামৰ এই ক্ৰিকেটৰক বাংলাদেশৰ বিৰুদ্ধে দলত ৰখা হৈছে।
সদ্য সমাপ্ত আই পি এলত ‘হোমলেণ্ড’ দিল্লী কেপিটেলছতো আছিল নিখিল। জানিব পৰা মতে, ভাৰতত জন্মগ্ৰহণ কৰা এইগৰাকী ক্ৰিকেটাৰক ট্ৰেভিছ হেডৰ পৰিৱৰ্ত খেলুৱৈহিচাপে মাতি অনা হৈছে।
নিখিলে এতিয়াও অষ্ট্ৰেলিয়াৰ নাগৰিকত্ব লাভ কৰা নাই। কোভিডৰ পূৰ্বে তেওঁ পঞ্জাৱৰ হৈ ক্ৰিকেট খেলিছিল। তেওঁ ১৪ খন লিষ্ট এ-ৰ মেচ খেলিছিল। ২০২০ চনত অষ্ট্ৰেলিয়াৰ কুইন্সলেণ্ডত থকা এজন আত্মীয়ৰ ঘৰলৈ গৈ অতিমাৰীৰ বাবে আবদ্ধ হৈ পৰে। অষ্ট্ৰেলিয়াত বিভিন্ন কাম কৰিবলৈ বাধ্য হৈছিল।
এসময়ত তেওঁ ডাকোৱালৰ কামো কৰিছিল। তেওঁ ক্ৰিকেটো অব্যাহত ৰাখিছিল। আগতে স্থানীয় লীগত মেচ খেলিছিল। সৌভাগ্যক্ৰমে নিখিলে অষ্ট্ৰেলিয়াৰ প্ৰাক্তন অলৰাউণ্ডাৰ জেমছ হোপছৰ দৃষ্টি আকৰ্ষণ কৰে।
লাহে লাহে বিগ বেছত নিখিলে হোবাৰ্ট হাৰিকেনছৰ দলত স্থান লাভ কৰে। এই স্পিনাৰগৰাকীয়ে দলটোক চেম্পিয়ন কৰি তোলাতো গুৰুত্বপূৰ্ণ ভূমিকা পালন কৰিছিল। অষ্ট্ৰেলিয়াৰ ঘৰুৱা ক্ৰিকেটত তেওঁ যথেষ্ট জনপ্ৰিয় হৈ পৰিছিল। এইবাৰৰ আই পি এলৰ বাবেও তেওঁ দল পাইছিল। দিল্লী কেপিটেলছে তেওঁক দললৈ লৈ আনে। ৩০ বছৰ বয়সত তেওঁ ৰাষ্ট্ৰীয় দলত অভিষেক ঘটোৱাৰ পথত। কিন্তু নিজৰ গৃহভূমি ভাৰতৰ বাবে নহয়, ‘শত্ৰু’ অষ্ট্ৰেলিয়াৰ বাবে। শুকুৰবাৰে ঢাকাত অষ্ট্ৰেলিয়া ব্ৰিগেডত যোগদান কৰিব।
মন কৰিবলগীয়া যে ১৯৬৪ চনত গুজৰাটত জন্মগ্ৰহণ কৰা ৰেক্স চেলাৰ্ছে অষ্ট্ৰেলিয়াৰ জাৰ্চি পিন্ধি খেলিছিল। কলকাতাত ভাৰতৰ বিৰুদ্ধে টেষ্ট খেলিছিল। সৰ্বকালৰ অন্যতম শ্ৰেষ্ঠ অষ্ট্ৰেলিয়ান মহিলা ক্ৰিকেটাৰ লিজা ষ্টেলেকাৰৰ জন্ম হৈছিল পুনেত। ১০ বছৰ ধৰি তেওঁ বেগী গ্ৰীণ জাৰ্চি পিন্ধি খেলিছিল। নিখিলে এতিয়াও অষ্ট্ৰেলিয়াৰ নাগৰিকত্ব লাভ কৰা নাই। অৱশ্যে তেওঁৰ স্থায়ী বাসস্থানৰ অনুমতিপত্ৰ আছে। সেই ভিত্তিতে নিখিলে ৰাষ্ট্ৰীয় দলত প্ৰৱেশ কৰিছে।
