বিমানখনৰ তেলৰ টেংকীত এটা ফুটা হৈছিল। ফলত ৩০০ জন যাত্ৰী কঢ়িয়াই অনা এয়াৰ ইণ্ডিয়াৰ এখন বিমানে চুইডিছ বিমানবন্দৰত জৰুৰী অৱতৰণ কৰে। বিমানখনে আমেৰিকা যুক্তৰাষ্ট্ৰৰ নেৱাৰ্ক বিমানবন্দৰৰ পৰা দিল্লীলৈ উৰা মাৰিছিল। মাজ আকাশতে বিমানখনৰ তেলৰ টেংকীটোৰ ফুটাৰ পৰা ইন্ধন লিক হ’বলৈ আৰম্ভ কৰাৰ পিছতে সমস্যাৰ সৃষ্টি হয়।
সূত্ৰ অনুসৰি, বোয়িং ৭৭৭-৩০০ আৰ নম্বৰৰ বিমানখনৰ এটা ইঞ্জিনত তেলৰ টেংকত লিক হোৱাৰ বাবে সমস্যা হৈছিল। ইয়াৰ পিছত ষ্টকহোম বিমানবন্দৰত জৰুৰী অৱতৰণৰ বাবে অনুমতি বিচৰা হয়। বিমানখনত থকা সকলো ৩০০ জন যাত্ৰী সুৰক্ষিত বুলি জনা গৈছে।
বিমানখনে ষ্টকহোমত জৰুৰী অৱতৰণ কৰাৰ আগতে অগ্নিনিৰ্বাপক বাহিনী উপস্থিত আছিল। অৱতৰণৰ সময়ত যিকোনো দুৰ্যোগ প্ৰতিহত কৰিবলৈ দুৰ্যোগ ব্যৱস্থাপনা দলো মোতায়েন কৰা হৈছিল। অৱশ্যে, কোনো সমস্যা নোহোৱাকৈ ৩০০ যাত্ৰীৰ সৈতে এয়াৰ ইণ্ডিয়াৰ বিমানখনে ষ্টকহোমৰ বিমানবন্দৰত সুৰক্ষিতভাৱে অৱতৰণ কৰে।
জানিব পৰা গৈছে যে টেংকাৰত লিকেজ হোৱাৰ বাবে তেল ওলাই আহিছিল। বিমানখনৰ সেই ইঞ্জিনটো তৎক্ষণাৎ বন্ধ কৰি দিয়া হয়। অৱতৰণৰ পিছত পৰীক্ষা কৰাত দেখা গৈছিল যে বিমানখনৰ দুই নম্বৰ ইঞ্জিনৰ তেলৰ টেংকীৰ পৰা তেল ওলাই আহিছিল। বিমানবন্দৰত সেইটো ঠিক কৰা হৈছে।
উল্লেখ্য যে যোৱা সোমবাৰেও নিউয়ৰ্কৰ পৰা দিল্লীলৈ অহা এয়াৰ ইণ্ডিয়াৰ এখন বিমান লণ্ডনত জৰুৰী অৱতৰণ কৰে। তাৰ পিছত এইবাৰ ষ্টকহোমত পুনৰ জৰুৰী অৱতৰণ কৰা হৈছে।
